មហាសាមគ្គីជនជាតិ ភូមិស្រុកផ្លាស់ថ្មី

16/01/2023 - 10:11

ដាំបន្លែលក់ក្នុងឱកាសបុណ្យចូលឆ្នាំថ្មីវៀតណាម

កសិករឃុំង៉ុកបៀង ស្រុកថ្កូវ ខេត្តត្រាវិញ កំពុងមមាញឹកថែទាំបន្លែបង្ការគ្រប់ប្រភេទ ពិសេសគឺបន្លែសម្រាប់លក់ក្នុងឱកាសបុណ្យចូលឆ្នាំថ្មីវៀតណាម ២០២៣។

កសិករនៅភូមិព្រៃវល្លិ ចុះពូជបន្លែបង្ការសម្រាប់លក់ក្នុងឱកាសបុណ្យចូលឆ្នាំថ្មីវៀតណាម។

រដូវបន្លែសម្រាប់លក់ក្នុងឱកាសបុណ្យចូលឆ្នាំថ្មីវៀតណាមឆ្នាំនេះ កសិករនៅឃុំង៉ុកបៀង ចុះពូជដាំដំណាំប្រមាណ ៣៧៥ ហិកតា ប្រមូលផ្ដុំនៅភូមិប្រាង្គ ភូមិព្រៃវល្លិ ភូមិទឹកហូរ និងភូមិកំពង់សាលា។ ក្នុងរដូវដាំដុះនេះ គណៈកម្មាធិការប្រជាជនឃុំង៉ុកបៀង បានសហការជាមួយនឹងក្រុមហ៊ុនពូជដំណាំមៀងណាម ក្រុមហ៊ុន Sygenta ធានាម៉ៅទិញ ៩០ ហិកតា មានដូច៖ ឪឡឹក ស្ពៃគ្រប់ប្រភេទ ត្រាវ ដំឡូងជ្វា ម្រះ សណ្ដែកដី។ល។

លោក គឹមថឿង នៅភូមិព្រៃវល្លិ ឱ្យដឹង៖ “ការដាំបន្លែបង្ការសម្រាប់លក់ឱកាសបុណ្យចូលឆ្នាំថ្មីវៀតណាមឆ្នាំនេះ គ្រួសារខ្ញុំដាំស្ពៃជើងទា ម្រះ សណ្ដែកដីចំនួន ៨ កុង។ រដូវនេះអាកាសធាតុអំណោយផលបង្គួរ សត្វល្អិតមិនសូវបំផ្លាញ សង្ឃឹមថានឹងបានផលកាក់កប។ តាមការប៉ាន់ស្មានរបស់ខ្ញុំ ក្នុងអំឡុងថ្ងៃ ២៥-២៧ ខែ១២ (ចន្ទគតិវៀតណាម) ដំណាំនឹងដល់ពេលប្រមូលផល សព្វថ្ងៃ ស្ពៃជ្រក់មានតម្លៃពី ១៥.០០០- ១៧.០០០ ដុង/គីឡូក្រាម ម្រះតម្លៃពី ១៧.០០០- ១៨.០០០ ដុង/គីឡូក្រាម សណ្ដែកដីតម្លៃពី ១៥.០០០ - ១៦.០០០ ដុង/គីឡូក្រាម។ យោងតាមឈ្មួញកណ្ដាលក្នុងឱកាសបុណ្យចូលឆ្នាំថ្មីវៀតណាម តម្លៃបន្លែបង្ការគ្រប់ប្រភេទនឹងកើនឡើងប្រមាណ ៣០% ។ ជាមួយនឹងផ្ទៃដី ដាំបន្លែបង្ការចំនួន ៨ កុង ប្រសិនបើថែទាំបានល្អ តម្លៃលំនឹងដូចសព្វថ្ងៃ ក្រោយពីទូទាត់ចំណូលចំណាយរួច ខ្ញុំនៅចំណេញប្រមាណ ៤០ លានដុង”។

អ្នកមីង សើុងធីចិន្ដា អ្នកធ្វើឈ្នួលប្រមូលផលបន្លែនៅភូមិព្រៃវល្លិ ឱ្យដឹង៖ “គ្រួសារខ្ញុំតែងទៅធ្វើការឈ្នួល ទើបខ្ញុំបង្កើតក្រុមធ្វើការឈ្នួល មានសមាជិក ១០ នាក់ ក្រុមតែងទទួលប្រមូលផលបន្លែបង្ការ ដោយយកថ្លៃឈ្នួលប្រមាណ ៦,៥ លានដុង/ហិកតា។ រៀងរាល់ថ្ងៃ ក្រុមប្រមូលផលបន្លែបង្ការរបស់កសិករប្រមាណ ១ ហិកតា គិតមធ្យមភាគក្នុងសមាជិកម្នាក់ៗ រកបានប្រាក់ចំណូលប្រមាណ ៦៥០.០០០ ដុង /ថ្ងៃ”។

លោក ង្វៀងវ៉ាន់ហុង ប្រធានសមាគមកសិករ ឃុំង៉ុកបៀង ឱ្យដឹង៖ “ដោយកំណត់ច្បាស់ថា បន្លែបង្ការ គឺប្រភេទដំណាំសំខាន់ម្យ៉ាងក្នុងចំណោមប្រភេទដំណាំសំខាន់ៗរបស់ឃុំ រយៈពេលកន្លង គណៈកម្មាធិការបក្ស គណៈកម្មាធិការប្រជាជនឃុំ ចង្អុលការសមាគមកសិករ ចលនាកសិករបង្វែររចនាសម្ព័ន្ធផលិតកម្មមកដាំបន្លែបង្ការ។ បន្លែបង្ការដែលកសិករជ្រើសដាំដូចជាពោតបង្កាត់សណ្ដែកដី ម្រះ ត្រសក់ ស្ពៃគ្រប់ប្រភេទ។ ឆ្នាំ ២០២២ អាស្រ័យបន្លែបង្ការមានតម្លៃលំនឹង កសិកររកបានប្រាក់ចំណូលខ្ពស់។ តាមការវាយតម្លៃរបស់ផ្នែកឯកទេសនិងកសិករចំពោះផ្ទៃដីបង្វែររចនាសម្ព័ន្ធផលិតកម្ម កសិកររកបានប្រាក់ចំណូលខ្ពស់់លើសពី ៣-៤ ដងបើប្រៀបនឹងផ្ទៃដីមិនទាន់ផ្លាស់ប្ដូរ។ រៀងរាល់ឆ្នាំ ទូទាំងឃុំដាំបន្លែបង្ការ ប្រមាណ ៩០០ ហិកតា ចំណែករដូវដាំបន្លែ បង្ការសម្រាប់លក់ក្នុងឱកាសបុណ្យចូលឆ្នាំថ្មីវៀតណាមឆ្នាំនេះ កសិករចុះពូជប្រមាណ ៣៧៥ ហិកតា។ ដើម្បីជួយកសិករទទួលបានផលកាក់កប សមាគមកសិករ បានសហការជាមួយនឹងផ្នែកឯកទេស រៀបចំបើកវគ្គហ្វឹកហាត់បច្ចេកទេសដាំដុះបន្លែបង្ការ ជួយកសិករបង្កើនប្រាក់ចំណូល កែលម្អជីវភាព”៕

សើុងម៉ាល័យ - ថាច់ធី

ចែករំលែកអត្ថបទ

ពាក្យគន្លឹះ