វប្បធម៌-សិល្បៈ វប្បធម៌

18/07/2022 - 14:38

វត្តស្វាយ៖ រួមចំណែកអភិរក្សតម្លៃប្រពៃណីរបស់ជនរួមជាតិខ្មែរ

វត្តរាជកុសលបំពេញជ័យ (ហៅវត្តស្វាយ) ស្ថិតនៅមណ្ឌលសើុងតៀង ទីប្រជុំជនសុកសើុង ស្រុកហងដឹក ខេត្តគៀងយ៉ាង គឺជាកេរដំណែលប្រវត្តិសាស្រ្តវប្បធម៌ថ្នាក់ជាតិ ត្រូវបានទទួលស្គាល់នៅឆ្នាំ ១៩៨៩។ វត្តតែងបានរដ្ឋអំណាចផ្តោតការយកចិត្តទុកវិនិយោគ ជួសជុល ម្ល៉ោះហើយមានភាពស្រស់ស្អាត ឆ្លើយតបទៅនឹងតម្រូវការសកម្មភាពសាសនារបស់ព្រះសង្ឃនិងពុទ្ធបរិស័ទ រួមចំណែកអភិរក្សនូវតម្លៃវប្បធម៌ ប្រវត្តិសាស្រ្តរបស់ជនរួមជាតិខ្មែរ។

សមមិត្តយ័ញភុក សមាជិកគណៈកម្មាធិការបក្សខេត្ត ប្រធានគណៈជនជាតិខេត្តគៀងយ៉ាង មកសួរសុខទុក្ខព្រះសង្ឃវត្តស្វាយ។

វត្តស្វាយ ត្រូវបានកសាងឡើងនៅចុងសតវត្សរ៍ទី ១៨ ដោយស្នាព្រះហស្ដព្រះឧបជ្ឈាយ៍យ័ញពេជ្រ។ ឆ្លងកាត់ព្រះចៅអធិការ ១៩ ជំនាន់ វត្តស្វាយមិនត្រឹមតែជាមជ្ឈមណ្ឌលអប់រំបណ្តុះបណ្តាលអក្សរសាស្រ្ត វប្បធម៌ដល់ព្រះសង្ឃនិងពុទ្ធបរិស័ទខ្មែរប៉ុណ្ណោះទេ ថែមទាំងជាកន្លែងចិញ្ចឹមលាក់បំពួនកម្មាភិបាលបដិវត្តន៍ក្នុងដំណាក់កាលតស៊ូប្រឆាំងបារាំង និងអាមេរិក រំដោះប្រទេសជាតិទៀតផង។

កាលពីថ្ងៃទី ៦ ខែធ្នូ ឆ្នាំ ១៩៨៩ ក្រសួងវប្បធម៌ បានចេញសេចក្តីសម្រេចលេខ ១៥៧០/VHQĐ ទទួលស្គាល់វត្តស្វាយ ជាកេរដំណែលវប្បធម៌ថ្នាក់ជាតិ។ ឆ្នាំ ២០១៧ ព្រះតេជព្រះគុណ យ័ញផាង បានបវារណាពុទ្ធបរិស័ទរួមវិភាគទានកសាងសមណកុដិ សាលាបាលី-ធម្មវិន័យ របង និងខ្លោងទ្វារ។ល។ គិតជាតម្លៃទឹកប្រាក់សរុប ៧,៥៨៥ ពាន់លានដុង។ តាំងពីកសាងសាលាបាលី-ធម្មវិន័យមកទល់ពេលនេះ វត្តក្លាយជាកន្លែងសម្រាប់ព្រះសង្ឃសិក្សារៀនសូត្រលើភូមិសាស្រ្តខេត្ត។ រៀងរាល់ឆ្នាំ សាលាមានសមណសិស្សមធ្យមភាគប្រមាណ ២០០ អង្គ មានឆ្នាំខ្លះឡើងដល់ ៥០០ អង្គ។ ជាពិសេស សមណសិស្សជាច្រើនព្រះអង្គដែលបានបណ្តុះបណ្តាលនៅសាលាបាលី-ធម្មវិន័យ មកទល់ពេលនេះ តែងមានការងារធ្វើលំនឹង។ មហាបរិញ្ញាយ័ញដុង ធ្វើការនៅការិយាល័យអធិការកិច្ចនិងនីតិកម្មនៃមហាវិទ្យាល័យគៀងយ៉ាង ឱ្យដឹង៖ “សាលាគឺជាថ្នាលបណ្តុះបណ្ដាលនិងចិញ្ចឹមនូវក្តីប្រាថ្នា ដើម្បីខ្ញុំមានថ្ងៃនេះ ខ្ញុំពិតជាអរគុណខ្លាំងណាស់”។

ព្រះតេជព្រះគុណយ័ញផាង សមាជិកក្រុមប្រឹក្សាភិបាលមជ្ឈិម អនុប្រធានគណៈអភិបាល សមាគមពុទ្ធសាសនាវៀតណាមខេត្ត អនុប្រធានសមាគមព្រះសង្ឃសាមគ្គីស្នេហាជាតិខេត្ត ព្រះចៅអធិការវត្តស្វាយ មានថេរដីកា៖ “ឆ្នាំ ២០២០ មន្ទីរវប្បធម៌ កីឡានិងទេសចរណ៍ បានសហការនឹងព្រះសង្ឃព្រមទាំងគណៈកម្មការវត្ត ជួសជុល បង្កើនកម្រិតសមិទ្ធផលផ្សេងៗក្នុងវត្ត គិតជាទឹកប្រាក់សរុបជាង ៣,៤២ ពាន់លានដុង។ មកទល់ពេលនេះ ការបង្កើនកម្រិត ក៏បានសម្រេចជាស្ថាពរនាំមកនូវក្តីរីករាយដល់ព្រះសង្ឃនិងពុទ្ធបរិស័ទចំណុះជើងវត្តផងដែរ”។ ម្យ៉ាងទៀត ព្រះវិហារវត្តស្វាយជាស្ថាបត្យកម្ម មានក្បូរក្បាច់រចនាវិចិត្រប្រកបដោយលក្ខណៈនៃព្រះពុទ្ធសាសនាទក្ខិណនិកាយខ្មែរ។ ខាងក្នុងព្រះវិហារក្រៅពីតម្កល់ព្រះជីវ៍ នៅតាមជញ្ជាំងក៏មានរចនាគំនូរពុទ្ធប្បវត្តិ មានក្បូរក្បាច់រចនារស់រវើក និងរំលេចពណ៌ស្រាស់ស្អាត ឯតាមសសររបៀងព្រះវិហារមានបន្ទំលម្អដោយរូបគ្រុឌនិងកិន្នរ។ល។ ក្នុងអត្ថន័យសម្តែងនូវការសាមគ្គីភាព ជួយថែរក្សា ការពារវត្តអារាម៕

យោង៖ កាសែតគៀងយ៉ាង -លីសៀ

ចែករំលែកអត្ថបទ

ពាក្យគន្លឹះ