កីឡា - ទេសចរណ៍ ទេសចរណ៍

11/07/2022 - 16:29

មកកាន់ដីកោះរដូវផ្លែឈើ

វស្សានរដូវក៏ជាអំឡុងពេលដែលផ្លែឈើនៅកឹងធើទុំស្រុះ នៅតាមចម្ការនីមួយៗសម្លឹងឃើញផ្លែឈើរយោនរយានទន់មែក។ ពិសេសនៅតាមកោះកណ្តាលទន្លេ ដូចជាកោងសើុង (នៅមណ្ឌល ១ សង្កាត់ប៊ូយហឺវងៀ ខណ្ឌប៊ិញធ្វី ក្រុងកឹងធើ) ខួបឆ្នាំតែងមានដីល្បាប់ហូរចាក់មកធ្វើឱ្យដំណាំឈើហូបផ្លែកាន់តែលូតលាស់ល្អ មានឱជារសផ្អែមឆ្ងាញ់។

ភ្ញៀវទេសចរទស្សនាចម្ការសាវម៉ាវ នៅកោងសើុង។

ជាមួយផ្ទៃដីជាង ៧៥ ហិកតា ក្នុងនោះ ភាគច្រើនប្រជាជនដែលរស់នៅលើកោះបានប្រកបរបរកសិកម្ម។ ផ្លែឈើនៅទីនេះមានខួបឆ្នាំ មានដូច៖ ក្រូចពោធិ៍សាត់ ក្រូចថ្លុង សាវម៉ាវ មៀន ត្របែក ផ្លែទឹកដោះ និងផ្ញៀវ។ល។ ឆ្លៀតយកឧត្តមភាពនេះ ប្រជាជនក៏បានបង្វែរទម្រង់ធ្វើកសិកម្មគួបផ្សំនឹងសេវាទេសចរណ៍ក្នុងអំឡុងពេលប៉ុន្មានឆ្នាំមកនេះ។ ហេតុនោះ រកបានប្រាក់ចំណូលខ្ពស់ជាង ទាំងតម្លៃកសិផលក៏បានកើនឡើងផងដែរ។

បច្ចុប្បន្ន នៅកោងសើុងមានអ្នកចម្ការជាង ៣០ គ្រួសារ បានចូលរួមធ្វើសេវាទេសចរណ៍ តាមរូបភាព ២ បែប គឺ៖ ធ្វើសេវាកម្មនិងបម្រើភ្ញៀវដោយខ្លួនឯងមួយបែប និងចងសម្ព័ន្ធសហគមន៍រួមគ្នាទទួលភ្ញៀវទេសចរមួយបែប។ ក្នុងនោះ ទម្រង់ចងសម្ព័ន្ធរួមគ្នាធ្វើសេវាទេសចរណ៍ មានប្រសិទ្ធភាពជាង ដោយអាចធានាម្ចាស់ចម្ការគ្រប់គ្នាសុទ្ធសឹងតែទទួលបានភ្ញៀវទេសចរទាំងអស់។ យោងទៅតាមរដូវកាលគ្រួសារប្រជាជនដែលចងសម្ព័ន្ធ ក៏ទទួលបានចំនួនភ្ញៀវគួរសមជាង។ តួយ៉ាងដូចរដូវសាវម៉ាវឆ្នាំនេះ ចម្ការរបស់ពូបាប៊ិញផ្លែទុំមុនគេ ម្ល៉ោះហើយគាត់ទទួលភ្ញៀវទេសចរចាប់ពីខែឧសភាមកម៉្លេះ។ ពេលចម្ការរបស់ពូបាប៊ិញជិតអស់ផ្លែ គឺដល់ចម្ការរបស់គ្រួសារពូតាម ផ្លែសាវម៉ាវក៏ចាប់ទុំ រង់ចាំទទួលភ្ញៀវទេសចរនៅខែក្រោយ។ បន្ទាប់ពីនោះគឺចម្ការរបស់គ្រួសារមីងណាំភឿក។ ដូចគ្នានឹងចម្ការសាវម៉ាវ គឺចម្ការមៀន ចម្ការជម្ពូ និង ផ្ញៀវ។ល។ របស់គ្រួសារដទៃទៀតដែលចងសម្ព័ន្ធក៏បានប្តូរវេនគ្នា ទទួលភ្ញៀវជាបន្តបន្ទាប់។ ការទាញយកផលតាមទិសដៅនេះ ភ្ញៀវទេសចរអាចមកទស្សនាចម្ការចំរដូវផ្លែឈើទុំ បានភ្លក់រសជាតិផ្លែឈើទុំដើមយ៉ាងឆ្ងាញ់ រីឯអ្នកចម្ការក៏មិនបារម្ភពីប្រភពភ្ញៀវទេសចរផងដែរ។ បងស្រីត្រឹងធីក្វិញត្រាង (នៅក្រុងហូជីមិញ) ឱ្យដឹង៖ “ចម្ការនៅទីនេះ ពិតជាចម្ការមានគុណភាពប្រាកដមែន ដើមឈើសុទ្ធតែធំៗ បានដាំយូរឆ្នាំ និងមានផ្លែទន់មែក។ នៅទីនេះអនុញ្ញាតឱ្យភ្ញៀវបេះផ្លែឈើតាមការណែនាំរបស់មគ្គុទេសក៍ភូមិភាគ មិនមែនធ្វើទេសចរណ៍ត្រឹមតែឱ្យមើលមិនឱ្យបេះនោះទេ។ ផ្លែឈើបេះនៅចម្ការហូបឆ្ងាញ់ណាស់”។

អ្នកចម្ការម្នាក់ៗនៅកោងសើុងមានផ្ទៃដីពីរបីហិកតាប៉ុណ្ណោះ ប៉ុន្តែបានដាំឈើហូបផ្លែច្រើនប្រភេទ ម្ល៉ោះហើយទាំងប្រាំងវស្សាសុទ្ធតែមានផ្លែឈើបម្រើភ្ញៀវទេសចរ។ បងង្វៀងថាញ់តឹម ម្ចាស់ចម្ការថាញ់តឹម ឱ្យដឹង៖ “ចម្ការរបស់ខ្ញុំដាំមៀនសាច់ក្រាស់ឆ្លាស់នឹងត្របែក។ ផ្លែមៀនមានតម្លៃសេដ្ឋកិច្ចខ្ពស់ ប៉ុន្តែក្នុងមួយឆ្នាំប្រមូលផលបានតែពី ១-២ រដូវប៉ុណ្ណោះ។ ចំណែកត្របែកលក់មិនសូវបានថ្លៃប៉ុន្មានទេ ប៉ុន្តែ ឆាប់ផ្លែនិងមានផ្លែខួបឆ្នាំ។ អាស្រ័យហេតុនោះ ភ្ញៀវមកទេសចរណ៍ចម្ការខ្ញុំរដូវណាក៏មានផ្លែឈើទុំទាំងអស់”។ នៅកោងសើុង ក៏មានចម្ការមៀនច្រើនប្រភេទដែរ នៅខែមីនា មានផ្លែមៀនស្បែកគោនៅចម្ការណាំមិញ លុះដល់វស្សានរដូវមានចម្ការមៀនសាច់ក្រាស់ថាញ់តឹម មៀន Ido នៅចម្ការសាវកឹន និងមៀនសាច់ក្រាស់នៅចម្ការកុងមិញជាដើម៕

អាយឡាម-វិមាន

ចែករំលែកអត្ថបទ

ពាក្យគន្លឹះ