វប្បធម៌-សិល្បៈ វប្បធម៌

12/07/2021 - 13:16

ភាពស័ក្តិសិទ្ធិនៃទីសក្ការបូជាយិញកូវ

ជាទីតាំងសក្ការបូជាមួយដែលភ្ញៀវទេសចរមិនគួររំលង ពេលធ្វើដំណើរទៅកម្សាននៅភូក្វឹក នោះគឺ ទីសក្ការបូជាយិញកូវ។ ហេតុអ្វីបានជាទីសក្ការបូជាយិញកូវ”ទាក់ទាញ”ភ្ញៀវទេសចរមកកម្សាន្តដូច្នេះ?

កន្លែងទីសក្ការបូជាដ៏ស័ក្តិសិទ្ធិ។

សួនច្បារក្បែរទីសក្ការបូជាយិញកូវ។

ស្ពានតភ្ជាប់ទីសក្ការបូជាយិញកូវលយចេញទៅសមុទ្រ។

បើតាមអ្នកទេសចរជាច្រើន បានឱ្យដឹង៖ ទីសក្ការបូជាយិញកូវ ទាក់ទាញភ្ញៀវទេសចរ ពីព្រោះជាកន្លែងមានលក្ខណៈបុរាណ ស័ក្តិសិទ្ធិនិងមានទីតាំងស្អាត។ ពោលគឺទីសក្ការបូជាយិញកូវបានកសាងតាំងពីសតវត្សទី ១៧ ស្ថិតនៅលើផែនថ្មមួយ នៅចំមាត់ទន្លេយឿងដុង ក្បែរឆ្នេរសមុទ្រ។ ពីច្រកទ្វារនៃទីសក្ការបូជាយិញកូវ សម្លឹងចេញទៅសមុទ្រល្វឹងល្វើយ។ ផែនថ្មកសាងទីសក្ការនេះខ្ពស់ត្រដែត ម្ល៉ោះហើយទីសក្ការបូជាយិញកូវ តែងមានជំនោរខ្យល់ត្រជាក់បក់មកពីសមុទ្រនិងទន្លេយឿងដុង។

មានឯកសារខ្លះបានបញ្ជាក់៖ ទីសក្ការបូជានេះត្រូវបានកសាងឡើងវិញកាលពីឆ្នាំ ១៩៣៧ លុះដល់ឆ្នាំ ១៩៩៧ ប្រជាជននិងរដ្ឋអំណាចភូមិភាគបានជួសជុល ហើយថ្មីៗនេះជុំវិញទីសក្ការបូជាត្រូវបានកសាងសំណង់ជាច្រើនដើម្បីបម្រើភ្ញៀវទេសចរផងដែរ។ អាស្រ័យហេតុនោះ ស្ពានតូចមួយខ្សែពីវាលខ្សាច់ទៅកាន់ទីសក្ការៈគឺមិនមានទៀតទេ។ តាមមាត់ទន្លេយឿងដុង ត្រូវបានកសាងសួនច្បារមួយបន្ថែមនិងស្ពានថ្មមួយមានប្រវែងចាប់ពីសួនច្បារទៅជាប់មាត់ទន្លេនៅខាងឆ្វេងនៃផ្នែកខាងក្រោមទីសក្ការៈលយចេញទៅសមុទ្រ។ ស្ពាននេះហើយដែលជាកន្លែងថតរូបដ៏ស្រស់ស្អាតក្នុងពេលថ្ងៃនិងជាកន្លែងលំហែកាយដ៏មនោរម្យនាពេលយប់ ម្ល៉ោះហើយលើស្ពានពេលណាក៏មានភ្ញៀវទេសចរដែរ។

ក្រៅពីមានទីតាំងស្អាត ទីសក្ការបូជាយិញកូវ ថែមទាំងមានរឿងព្រេងជាច្រើនដែលដំណាលដោយអ្នកភូមិនេសាទ ម្ល៉ោះហើយបានទាក់ទាញភ្ញៀវទេសចរជាច្រើនចង់ដឹង ចង់ស្វែងយល់។ រឿងដំណាលតៗគ្នាថា នៅពេលឃើញលើផ្ទៃសមុទ្រផុសឡើងផែនថ្មមួយដុំខ្ពស់ ចាស់ព្រឹទ្ធាចារ្យកាលនោះបានឱ្យកសាងទីសក្ការបូជាលើផែនថ្មនោះ។ ក្រោយពីរួចពីគ្រោះថ្នាក់នៅសមុទ្រ អ្នកនេសាទតែងទៅសែនថ្វាយ និងជួសជុលទីសក្ការៈឡើងវិញក្លាយទៅជាទីសក្ការបូជាយិញកូវដូចសព្វថ្ងៃ។ ទីសក្ការបូជាយិញកូវ គោរពវត្ថុស័ក្តិសិទ្ធិ ឫទ្ធិបារមី ដូចជាជំនឿគោរពព្រះនាងគង់ស៊ីអ៊ីងនៅភាគខាងត្បូងអ៊ីចឹងដែរ។ ជាកន្លែងមួយមានភាពស័ក្តិសិទ្ធិ ដូចទីសក្ការបូជាយិញកូវ ម្ល៉ោះហើយមានរឿងនិទានរឿងព្រេងផ្សេងៗគ្នាជាច្រើនដំណាលពីដំណាក់កាលកកើតទីសក្ការបូជានេះផងដែរ។ ប៉ុន្តែអ្វីដែលសំខាន់នោះគឺតម្លៃវប្បធម៌ជាក់ស្តែងនៃទីសក្ការបូជានឹងអ្នកភូមិនេសាទតំបន់កោះពេជ្រ។ នោះគឺ នៅពេលដែលវង្វេងទិស ពួកគាត់នឹងមើលទៅផែនថ្មខ្ពស់ កន្លែងមានទីសក្ការបូជាយិញកូវ ដើម្បីកំណត់បានទិដៅចូលមកដីគោក។

ដូចជាទីសក្ការបូជាឯទៀតនៅតំបន់សមុទ្រនៃប្រទេសវៀតណាមដែរ ទីសក្ការបូជាយិញកូវក៏បានកំណត់ថ្ងៃសែនផងដែរ។ ភ្ញៀវទេសចរមកទីនេះនៅថ្ងៃ ១៥,១៦ ខែ ១០ (ចន្ទគតិវៀតណាម) រៀងរាល់ឆ្នាំ នឹងបានចូលរួមពិធីបុណ្យនៅទីសក្ការបូជាយិញកូវ។ នោះគឺជាពិធីដ៏ស័ក្តិសិទ្ធិមួយបួងសួងសុំឱ្យភ្លៀងខ្យល់ធ្លាក់ស្មើប្រកបដោយលក្ខណៈពិសេស៕

ហាថាញ-លីសៀ

ចែករំលែកអត្ថបទ

ពាក្យគន្លឹះ