វប្បធម៌-សិល្បៈ វប្បធម៌

14/06/2021 - 15:49

វត្តមង្គលបូរី

វត្តមង្គលបូរី (ទ្រនំសេក) នៅភូមិដាយ-ថ ឃុំឡងមី ស្រុកតាមប៊ិញ ខេត្តវិញឡុង តែងមានភ្ញៀវ ទេសចរ និងពុទ្ធបរិស័ទជាច្រើនមកទស្សនានិងគោរពបូជា ដ្បិតអារាមនេះមានបរិយាកាសស្ងប់ស្ងាត់ ដើម្បីបានស្ងប់អារម្មណ៍ និងស្ដារថាមពលឡើងវិញ។

ព្រះវិហារវត្តមង្គលបូរី (ទ្រនំសេក)។

ចម្ងាយពីផ្លូវកៅស៊ូតែពីរបីរយម៉ែត្រ ប៉ុន្តែផ្លូវបេតុងចូលខ្លោងទ្វារតូចវត្តទ្រនំសេក មានភាពទាក់ទាញដ៏ចម្លែកដោយសារមានសោភណភាពដ៏ស្រស់ស្អាតនៃតំបន់ជនបទណាមបូ។ នោះគឺដងផ្លូវបត់បែនក្រោមម្លប់ដើមឈើធំៗ ចម្ការឈើហូបផ្លែនិងវាលស្រែ ស្រូវទុំក្រអូបសាយ។ មកកាន់វត្តទ្រនំសេក ភ្ញៀវទេសចរកាន់តែមានភាពចម្លែកថែមទៀត ដ្បិតជុំវិញព្រះវិហារត្រូវបានសង់ខឿនកម្ពស់ ២,៥ម៉ែត្រ ទទឹង ៦ ម៉ែត្រ បណ្តោយ ១០០ ម៉ែត្រ សម្រាប់ការពារសំណង់ស្ថាបត្យកម្មមានក្បូរក្បាច់រចនាបុរាណ។ ជាពិសេស ក្នុងមណ្ឌលវត្តមានដើមឈើធំៗជាច្រើន។ ក្នុងនោះ ដើមគគីរមានអាយុកាលជាង ៧០០ ឆ្នាំ ត្រូវបានទទួលស្គាល់ជារុក្ខជាតិកេរដំណែលកាលពីឆ្នាំ ២០១៦ ។ ដើមគគីរមានកម្ពស់ជាង ៥៥ ម៉ែត្រ ទំហំ ៣ឱបមនុស្សពេញវ័យ។ ដើមគគីរដុះឡើងត្រង់ បែកមែកសាខាគ្រប់ទិសទាំង ៤ ចោលម្លប់ត្រជាក់រាប់រយម៉ែត្រការ៉េ។ ក្នុងសម័យសង្រ្គាមប្រឆាំងបារាំង អាមេរិក វត្តទ្រនំសេក គឺជាកន្លែងលាក់បំពួន ទំនុកបម្រុងបដិវត្តន៍ និងជាកន្លែងជ្រកកោនរបស់ប្រជាជនរាប់រយគ្រួសារដើម្បីជៀសគ្រាប់បែក គ្រាប់កាំភ្លើងរបស់ខ្មាំង។ ហេតុនោះ ដើមគគីរក៏មានស្លាកស្នាម ជាច្រើនដោយសារគ្រាប់បែក គ្រាប់កាំភ្លើង។

ដើមគគីរកេរដំណែល។

វត្តទ្រនំសេក ត្រូវបានកសាងលើផ្ទៃដីប្រមាណ ២៤.០០០ ម២។ នេះជាវត្តមួយក្នុងចំណោមវត្តខ្មែរចំនួន ២ ដែលបុរាណនិងធំបំផុតនៅស្រុកតាមប៊ិញ។ វត្តទ្រនំសេក ត្រូវបានទទួលស្គាល់ជាកេរដំណែលប្រវត្តិសាស្រ្តវប្បធម៌ថ្នាក់ខេត្តឆ្នាំ ២០០៣ ។ ក្រៅពីខ្លោងទ្វារតូចខាងក្រៅប្រកបដោយក្បូរក្បាច់រចនាល្អប្រណីត ខ្លោងទ្វារធំចូលកាន់វត្តបែរមុខឆ្ពោះទៅមាត់ព្រែកប្រកបដោយភាពស្ងប់ស្ងាត់។ មកលេងវត្តទ្រនំសេកនាឱកាសបុណ្យអកអំបុក ភ្ញៀវទេសចរថែមទាំងបានទស្សនាពិធីប្រណាំងទូក-ងយ៉ាងជក់ចិត្តនៅលើដងព្រែកខាងមុខ ខ្លោងទ្វារវត្តទៀតផង។

តាមប្រសាសន៍លោកឡេទ្រីយ៉ុង អនុប្រធានគណៈកម្មាធិការប្រជាជនឃុំឡងមី វត្តទ្រនំសេក គឺជាវត្តបុរាណមួយ ម្ល៉ោះហើយព្រះវិហារវត្តក៏មានលក្ខណៈបុរាណដែរ ក្នុងព្រះវិហារមានព្រះពុទ្ធបដិមាតូចធំជាច្រើន កសាងអំពីដីដុត មានតម្លៃផ្នែកខាងវប្បធម៌ប្រវត្តិសាស្រ្តដ៏យូរលង់៕

ហាថាញ - ថាច់ធី

ចែករំលែកអត្ថបទ

ពាក្យគន្លឹះ