មហាសាមគ្គីជនជាតិ គំរូក្នុងសហគមន៍

03/11/2020 - 08:41

កសិករតំបន់ភ្នំ ចងសម្ព័ន្ធដាំដំណាំឈើហូបផ្លែ

កសិករឃុំអូរឡឹម (ស្រុកទ្រីតូង ខេត្តអាងយ៉ាង ជាតំបន់មានជនរួមជាតិខ្មែររស់នៅជាង ៨០%) បានរួមគ្នាបង្កើតសហករណ៍កសិកម្មអូរឡឹម។ នេះត្រូវបានចាត់ទុក “ជាឈ្នាន់”ជួយឱ្យកសិផលភូមិភាគពង្រីកទីផ្សារប្រើប្រាស់ អភិវឌ្ឍផលិតកម្ម បង្កើនប្រាក់ចំណូល។ល។

បង្ហាញមុខសមាជិកសហករណ៍កសិកម្មឃុំអូរឡឹម។

លោកប៊ូយស្វឹងដៀង កសិករនៅភូមិភឿកប៊ិញ ឱ្យដឹង៖ បច្ចុប្បន្ន គាត់មានផ្ទៃដីចំនួន ១២០ កុង ភាគច្រើនគឺដាំប្រភេទស្វាយកែវរមៀត ស្វាយអូស្រ្តាលី និងស្វាយក្បាលដំរីជាដើម។ ប្រភេទដំណាំនេះសមស្របនឹងដីតំបន់ភ្នំ ម៉្លោះហើយផ្តល់ទិន្នផលនិងគុណភាពខ្ពស់បង្គួរ។ រៀងរាល់ឆ្នាំ គ្រួសារគាត់រកបានប្រាក់ចំណូលជាង ៣០០ លានដុងពីការលក់ស្វាយ។

ថ្វីបើដូច្នោះ យោងតាមសម្តីលោកដៀង ការដាំដំណាំស្វាយរយ:ពេលកន្លងជួបការលំបាកច្រើន មាមីងកសិករតែងប្រឈមនឹងការ “បានផល ខុសតម្លៃ”។ មូលហេតុមកពីដាំរប៉េះរប៉ោះ ដាំប្រភេទដំណាំផ្សេងៗគ្នា។ ទន្ទឹមនឹងនោះ ការស្វែងយល់ពីតម្រូវការទីផ្សារនៅខ្វះខាត បង្កឱ្យមានស្ថានភាពផ្គត់ផ្គង់លើសតម្រូវការ និងមិនដឹងច្រកចេញ លុះដល់ប្រមូលផលត្រូវ “ឈ្មួញកណ្ដាល” បន្ថោកថ្លៃ។ ក្រៅពីនោះ ដោយសារតែផ្ទៃដីដាំស្វាយកាន់តែកើន ម៉្លោះហើយតម្លៃមិនលំនឹង ទីផ្សារលក់ចេញជួបការលំបាកច្រើន។

ចំពោះការលំបាកដូចពោលខាងលើ ឆ្នាំ ២០១៨ ផ្តើមពីវគ្គបង្រៀនបច្ចេកទេសដាំដុះនិងថែទាំដំណាំឈើហូបផ្លែ កសិករនៅអូរឡឹម បានបង្កើតក្រុមសហការដាំស្វាយ ដោយមានសមាជិក ៣៦ នាក់។ ក្រុមសហការនឹងផ្គត់ផ្គង់ស្វាយឱ្យក្រុមហ៊ុន និងកន្លែងប្រមូលទិញ រៀងរាល់ឆ្នាំប្រមាណ ២០០ តោន ព្រមទាំងបង្កើតបានការងារធ្វើជូនពលករជាច្រើននៅភូមិភាគ។ ប៉ុន្តែដោយសង្កេតឃើញថា ការសហការចងសម្ព័ន្ធតាំងពីដំណាក់ការផលិតនិងលក់ចេញកសិផលពុំទាន់ព្រមៗគ្នា ខ្ទង់ប្រាក់ចំណាយខ្ពស់ ឯតម្លៃលក់ចេញកសិផលទាប មិនលំនឹង ទើបក្រុមសហការប្តេជ្ញាចិត្តរួមគ្នាហ៊ុនទុនបង្កើតសហករណ៍កសិកម្មអូរឡឹម។

សហករណ៍កសិកម្មអូរឡឹម បង្កើតនៅថ្ងៃទី ៤ ខែកញ្ញា ដោយមានសមាជិក ១៦ នាក់ ទុនចុះបញ្ជី ១៥០ លានដុង។ ចូលរួមក្នុងក្រុមសហករណ៍ សមាជិកនឹងបានផ្គត់ផ្គង់ពូជមានគុណភាពខ្ពស់ តម្លៃសមរម្យ ប្រាក់ទិញពូជត្រូវបានសងជាច្រើនលើក ដើម្បីបង្កលក្ខណៈល្អបំផុតឱ្យសមាជិកនិងគ្រួសារនៅជិតខាង។ ម្យ៉ាងទៀត សមាជិកនៅទាំងបានផ្គត់ផ្គង់សម្ភារៈកសិកម្មដោយតម្លៃសមរម្យ ពីព្រោះបានចុះកិច្ចសន្យាជាមួយនឹងក្រុមហ៊ុន ធានាថាតម្លៃទាបជាងលើទីផ្សារ។ ពុំនោះសោត សហករណ៍នៅទាំងស្វែងរកអាជីវកម្មទិញកសិផលឱ្យសមាជិកដោយតម្លៃមានចំណេញខ្ពស់បំផុត ក្រៅពីនោះ នៅទាំងបានពិគ្រោះពីបច្ចេកទេសដាំដុះនិងថែទាំដំណាំឈើហូបផ្លែទៀតផង។

ក្នុងលក្ខណៈប្រកួតប្រជែងទីផ្សារដ៏ក្ដៅគគុកដូចសព្វថ្ងៃ ដូច្នេះ ការបង្កើតសហករណ៍កសិកម្មអូរឡឹម មានតួនាទីដ៏សំខាន់ក្នុងការចងសម្ព័ន្ធកសិករ។ នេះគឺជាស្ពានតភ្ជាប់រវាងការផលិតនិងការលក់ចេញ រវាងកសិករនិងអ្នកវិទ្យាសាស្រ្ត រវាងកសិករនិងអាជីវកម្ម។ ម្យ៉ាងវិញទៀត សហករណ៍នៅទាំងជួយរៀបចំការផលិតដោយទ្រង់ទ្រាយធំ ប្រមូលផ្តុំ ម្ល៉ោះហើយគុណភាពស្មើគ្នា លំនឹងផលិតផលប្រកបដោយលក្ខណៈប្រកួតប្រជែងខ្ពស់៕

ឌឹកត្វង-មុនី

ចែករំលែកអត្ថបទ

ពាក្យគន្លឹះ