សុខភាព - អប់រំ សុខភាព

05/10/2020 - 16:15

ប្រភេទតែមានអត្ថប្រយោជន៍សម្រាប់អ្នកជំងឺហឺត

- តែខ្មៅ

តាមការសិក្សាស្រាវជ្រាវបានបង្ហាញថា សារធាតុ caffeine ក្នុងតែខ្មៅ អាចនឹងជួយសម្រួលដល់ផ្លូវដង្ហើម និងកែលម្អមុខងារសួត។ ថ្វីត្បិតដូច្នោះក្តី ការទទួលទានតែខ្មៅគ្រាន់តែជួយកាត់បន្ថយបណ្តោះអាសន្ននូវអាការៈជំងឺហឺតប៉ុណ្ណោះ ម្ល៉ោះហើយអ្នកជំងឺនៅតែត្រូវលេបថ្នាំព្យាបាលដដែល។ វិធីឆុងតែខ្មៅ លោកអ្នកគ្រាន់តែដាក់តែមួយស្លាបព្រាកាហ្វេក្នុងកែវទឹកពុះរង់ចាំ៥នាទី បន្ទាប់មកស្រង់កាកតែចេញ រួចផឹក។

តែបៃតង។

- តែបៃតង

តែបៃតង សម្បូរដោយសារធាតុប្រឆាំងអុកស៊ីតកម្ម និងធាតុផ្សំពីរុក្ខជាតិដែលមានអត្ថប្រយោជន៍ផង។ ការសិក្សាស្រាវជ្រាវលើសត្វបានបង្ហាញថា ធាតុផ្សំពីរុក្ខជាតិ epigallocatechin gallate (EGCG) ក្នុងចំណោមតែទាំងនេះ អាចនឹងជួយកាត់បន្ថយស្ថានភាពរលាកផ្លូវដង្ហើមលើសត្វកណ្តុរដែលមានជំងឺហឺតទងសួត។ មិនត្រឹមតែប៉ុណ្ណោះ សារធាតុ caffeine ក្នុងតែបៃតង អាចនឹងជួយបង្កើនផ្លូវដកដង្ហើមឡើងដល់ទៅ ៤ ម៉ោងសម្រាប់អ្នកជំងឺហឺត ផ្តើមពីនោះជួយកាត់បន្ថយអាការៈពិបាកទ្រាំ។ វិធីឆុងតែបៃតង ដូចគ្នានឹងវិធីឆុងតែខ្មៅដែរ។

-តែខ្ញី

ខ្ញីគឺជាគ្រឿងទេសដ៏ល្អដែលផ្ទុកនូវសារធាតុចិញ្ចឹមជាច្រើនព្រមទាំងធាតុផ្សំដែលមានគុណប្រយោជន៍ផ្នែកជីវសាស្រ្តយ៉ាងខ្លាំង។ ការសិក្សាស្រាវជ្រាវមួយចំនួនបង្ហាញពីធាតុផ្សំសំខាន់ពីរយ៉ាងដែលមានក្នុងខ្ញី នោះគឺសារធាតុ gingerol និងសារធាតុ shogao អាចនឹងជួយបង្រ្កាបជំងឺហឺត ដោយវិធីកាត់បន្ថយជំងឺរលាកផ្លូវដកដង្ហើម។ ក្រុមអ្នកសិក្សាស្រាវជ្រាវបានធ្វើការកត់សម្គាល់ ខ្ញីជួយកាត់បន្ថយយ៉ាងមានប្រសិទ្ធភាពនៃរោគសញ្ញាជំងឺហឺត។

ដើម្បីឆុងតែខ្ញី លោកអ្នកគ្រាន់តែដាក់ខ្ញីកិនរួចមួយស្លាបព្រាកាហ្វេ ចាក់ទឹកពុះចូលក្នុងរយៈពេលពី ១០-២០ នាទី រួចស្រង់កាកចេញនិងផឹក។

-តែស្លឹកប្រេងខ្យល់

ដើមប្រេងខ្យល់ មានអត្ថប្រយោជន៍សំខាន់ៗ ជាច្រើនក្នុងការព្យាបាលជំងឺ។ ជាទូទៅស្លឹកត្រូវ បានប្រើសម្រាប់ធ្វើតែ ឬច្នៃទៅជាប្រេង។ ដូច្នេះ តែស្លឹកប្រេងខ្យល់មានផ្ទុកសារធាតុប្រឆាំងអុកស៊ីតកម្ម និងមានធាតុផ្សំពីរុក្ខជាតិមានអត្ថប្រយោជន៍ តួយ៉ាងដូចជាសារធាតុ eucalyptol ជាដើម។ នេះជាវត្ថុធាតុត្រូវបានបញ្ជាក់ថាមានគុណប្រយោជន៍ប្រឆាំងនឹងការរលាកបានយ៉ាងល្អ ម្ល៉ោះហើយក៏អាចជួយទប់ទល់ ឬកាត់បន្ថយរោគសញ្ញាជំងឺហឺតផងដែរ។

ដើម្បីឆុងតែស្លឹកប្រេងខ្យល់ លោកអ្នកគ្រាន់តែយកស្លឹកប្រេងខ្យល់ស្ងួតមួយស្លាបព្រាលាយនឹងទឹកពុះ។ ត្រាំក្នុងរយៈពេល ១០ នាទី រួចស្រង់កាកចេញនិងផឹក។

-តែឈើអែម

ប្រភេទតែដែលឆុងពីឫសឈើអែមនេះ ត្រូវបានប្រើប្រាស់ដូចថ្នាំស្រុកម្យ៉ាងសម្រាប់ព្យាបាលជំងឺច្រើនមុខ ក្នុងនោះមានជំងឺហឺត។ តាមការសិក្សាស្រាវជ្រាវទៅលើសត្វ សារធាតុ glycyrrhizin ចម្រាញ់ពីឫសឈើអែម អាចនឹងជួយកាត់បន្ថយរោគសញ្ញាជំងឺហឺត ជាពិសេសនៅពេលទទួលទានគួបផ្សំនឹងវិធីសាស្រ្តព្យាបាលជំងឺដែលកើតមានផង។

ខណៈឆុងតែ ចាប់មួយច្បិចឫសឈើអែម បង់ចូលទឹករួចដណ្តាំក្នុងរយៈពេល ៥ នាទី៕

អាងញៀង (យោង៖ Boldsky)- លីសៀ

ចែករំលែកអត្ថបទ

ពាក្យគន្លឹះ