សុខភាព - អប់រំ អប់រំ

08/04/2020 - 14:38

គ្រូបង្រៀនអស់ពីចិត្តនឹងការងារ

លោកគ្រូថាច់ហ្វាងថា នាយកសាលាអនុវិទ្យាល័យជនជាតិអន្តេវាសិកស្រុកឡុងភូ។

“កើតនិងធំឡើងក្នុងសម័យសន្ដិភាព ពិ សេសគឺ ខ្លួនបានចូលក្នុងកងជួរបក្ស ខ្ញុំរឹតតែមានមោទនភាព បូជាអស់ពីកម្លាំងកាយចិត្ត ចំពោះបុព្វហេតុអប់រំ។ ទន្ទឹមនឹងនោះ កសាងខ្លួនឱ្យមានគោលជំហរនយោបាយរឹងមាំ ឫក ពាសមសួន សីលធម៌ ផ្នត់រស់នៅស្អាតស្អំ; កសាងសមូហភាពសាមគ្គី រួមគ្នាអនុវត្តល្អភារ កិច្ច ដើម្បីមិនធ្វើឱ្យខកការទុកចិត្តរបស់បក្ស រដ្ឋ និងប្រជាជនដែលបានប្រគល់ជូន” នោះ គឺសម្ដីរបស់លោកគ្រូថាច់ហ្វាងថា នាយកសាលាអនុវិទ្យាល័យជនជាតិអន្តេវាសិកស្រុក ឡុងភូ ខេត្តសុកត្រាំង។

ឆ្នាំ២០០០ ក្រោយពីបញ្ចប់បរិញ្ញាបត្រគរុកោសល្យផ្នែកភាសាអង់គ្លេស លោកគ្រូថាច់ហ្វាងថា បានដាក់ពាក្យសុំចូលបង្រៀននៅសាលាអនុវិទ្យាល័យដាយអឹង២ សាលាដែលលោកគ្រូធ្លាប់សិក្សាកាលពីមុន។ លោកគ្រូបានរំលឹក៖ “សាលារៀនមានសិស្សជនជាតិខ្មែរជាង៩០% សមត្ថភាពយល់ភាសាវៀត ភាសាអង់គ្លេសនៅមានកម្រិត។ ហេតុដូច្នោះ ក្នុងពេលបង្ហាត់បង្រៀន ខ្ញុំច្រើនលើកយកទាំង៣ភាសា គឺអង់គ្លេស វៀតនិងខ្មែរមកពន្យល់ ព្រមទាំងធ្វើឧបករណ៍បង្ហាត់បង្រៀនដោយផ្ទាល់ដើម្បីប្អូនៗ អាចយល់ អាន ស្ដាប់ និងសន្ទនាបាន។ ឆ្នាំ ២០០៨ លោកគ្រូបានចាត់ឱ្យមកបង្រៀននៅសាលាអនុវិទ្យាល័យជនជាតិអន្តេវាសិកស្រុកឡុងភូ។ មកទីនេះ លោកគ្រូតែងធ្វើជាគំរូ យកចិត្តទុកដាក់ជួយមិត្តរួមអាជីពនិងខ្នះខ្នែងចូលរួម រាល់ចលនារបស់សាលា ម្ល៉ោះហើយសមូហភាពទំនុកចិត្តបោះឆ្នោតជ្រើសធ្វើជាអនុលេខាសាខាបក្ស។ ក្រោយមក លោកគ្រូត្រូវបានបញ្ជូនទៅរៀនមធ្យមសិក្សាទ្រឹស្ដីនយោបាយ គ្រប់គ្រងផ្នែកអប់រំ។ ឆ្នាំ២០១០ លោកគ្រូបានតែងតាំងជានាយកសាលា និងជាលេខាសាខាបក្សរហូតដល់សព្វថ្ងៃ។

ទទួលភារកិច្ចគ្រប់គ្រងពេលអាយុ៣៥ឆ្នាំ ប៉ុន្តែលោកគ្រូត្រូវបានឱ្យតម្លៃជាថ្នាក់ដឹកនាំឈ្លាសវៃម្នាក់ ពោរពេញដោយសមត្ថភាព និងខ្នះខ្នែងអស់ពីចិត្តជាមួយមុខរបរ។ លោកគ្រូថាច់ថាញ់ញ៉ាង គ្រូបង្រៀនរបស់សាលា ឱ្យដឹង៖ “បំពេញការងារជាមួយលោកគ្រូថាច់ហ្វាងថា យើងខ្ញុំគ្មានការរងសម្ពាធខាងមុខជំនាញទេ ពីព្រោះលោកគ្រូ តែងយល់និងអនុគ្រោះដល់គ្រូបង្រៀនដែលបំពេញការងារនៅសាលាដោយលក្ខណៈពិសេសដោយឡែក។ លោកគ្រូតែងគិតដល់ផលប្រយោជន៍របស់សមូហភាព គិតគូរគ្រប់សព្វរាល់គោលនយោបាយសម្រាប់គ្រូបង្រៀននិងសិស្ស។ ជាពិសេស លោកគ្រូតែងយកចិត្តទុកដាក់យ៉ាងច្រើនដល់ការងារអប់រំនិងបណ្តុះបណ្តាលកងជួរគ្រូបង្រៀន ម្ល៉ោះហើយគ្រូបង្រៀនរបស់សាលាទាំង១០០%សុទ្ធតែមានកម្រិតវិជ្ជាជីវៈសម្រេចបទដ្ឋាន និងលើសបទដ្ឋាន”។

សិស្សានុសិស្សរបស់សាលាសុទ្ធសឹងជាសិស្សជនជាតិខ្មែរនៅតំបន់ឆ្ងាយដាច់ស្រយាល ម្ល៉ោះហើយក្រៅពីការរៀនអក្សរសាស្រ្ត លោកគ្រូនៅទាំងបង្រៀនប្អូនៗពីរបៀបរស់នៅទៀតផង ព្រោះហេតុដូច្នោះ នៅរាល់លើកប្រជុំក្រុមប្រឹក្សាគ្រូបង្រៀន លោកគ្រូតែងស្ដាប់យោបល់និងវិភាគវែកញែកចំពោះមុខក្រុមប្រឹក្សាគ្រូបង្រៀនអំពីមូលហេតុអត្តនោមតិ និងសច្ចានុមតិដែលញុាំងឱ្យមានស្ថានភាពសមត្ថភាពសិស្សរៀនមិនស្មើគ្នា។ ទន្ទឹមនឹងនោះ លើកទឹកចិត្តគ្រូបង្រៀនរកវិធីសាស្រ្តបង្រៀនល្អៗ សមស្របនឹងសិស្ស; បង្ហាត់បង្រៀនឱ្យប្អូនៗមានសណ្ដាប់ធ្នាប់ ឫកពាសមសួន សុភាពរាបសា រក្សាអនាម័យ បង្ហាត់ឱ្យប្អូនៗមានបំណិនរៀនសូត្រដោយខ្លួនឯង។ល។ ដើម្បីស័ក្តិសមនឹងទិសស្លោក “ដំបូងរៀនសីលធម៌ ក្រោយរៀនអក្សរសាស្រ្ត”។ ទន្ទឹមនឹងនោះ លោកគ្រូក៏សហការជាមួយនឹងអាណាព្យាបាលសិស្សរួមកម្លាំងជាមួយសាលារួមគ្នាអប់រំប្អូនៗដើម្បីក្លាយជាកូនឆ្លាត សិស្សពូកែ។ អាស្រ័យហេតុនោះ គុណភាពអប់រំរបស់សាលាកាន់តែបានលើកកម្ពស់ជារៀងរាល់ឆ្នាំ។ ឆ្នាំសិក្សា ២០១៨-២០១៩ អត្រាសិស្សរៀនគ្រាន់បើ ពូកែសម្រេចជាង៦០% ក្រៅពីនោះគឺសិស្សរៀនមធ្យម និងអត្រាសិស្សបានពិនិត្យជាប់ថ្នាក់ទី៩សម្រេច ១០០%។

ក្រោមការដឹកនាំរបស់លោកគ្រូថាច់ហ្វាងថា ចាប់ពីឆ្នាំ២០១០ រហូតមក សាលាអនុវិទ្យាល័យជនជាតិអន្តេវាសិកស្រុកឡុងភូ តែងសម្រេចកិត្តិ នាមជាសមូហភាពពលកម្មឆ្នើម៕

 លីធាន - ថាច់ធី

ចែករំលែកអត្ថបទ

ពាក្យគន្លឹះ