សុខភាព - អប់រំ សុខភាព

02/03/2020 - 15:04

សកម្មភាពសុខាភិបាលតំបន់ជនជាតិកាន់តែល្អប្រសើរ

តាមការវាយតម្លៃរបស់គណៈកម្មាធិការប្រជាជនខេត្តវិញឡុង សកម្មភាពសុខាភិបាលតំបន់ជនជាតិលើភូមិសាស្រ្តខេត្ត ត្រូវបានពង្រឹងនិងពង្រីកយ៉ាងសកម្ម ឆ្លើយតបទៅនឹងតម្រូវការពិនិត្យ ព្យាបាលជំងឺរបស់ប្រជាជន។

ជនរួមជាតិខ្មែរនៅស្រុកវ៉ុងឡីម ខេត្តវិញឡុង តែងមានស្មារតីរក្សាអនាម័យ

ដើម្បីធានាសុខភាពគ្រួសារ។

លោកគឹមកាន់ ប្រធានការិយាល័យជនជាតិស្រុកតាមប៊ិញ ឱ្យដឹង៖ នៅតាមឃុំដែលមានជនរួមជាតិខ្មែររស់នៅកុះករលើភូមិសាស្រ្តស្រុក សុទ្ធសឹងមានដំណាក់សុខាភិបាលសម្រេចបទដ្ឋានជាតិ ហើយមានវេជ្ជបណ្ឌិតពិនិត្យ ព្យាបាលជំងឺជូនប្រជាជន។ តួយ៉ាងដូចឃុំឡងមី ក្នុងដំណាក់ការវិនិយោគកសាងហេដ្ឋារចនាសម្ព័ន្ធ ដំណាក់សុខាភិបាលគឺជាសំណង់មួយក្នុងចំណោមសំណង់នានា ដែលបានកសាងដំបូងបង្អស់។ នៅពេលមូលដ្ឋានសម្ភារៈសុខាភិបាលបានធានា គ្រឿងបរិក្ខារពេទ្យបានបំពាក់គ្រប់សព្វ រួមចំណែកបង្កទំនុកចិត្តចំពោះប្រជាជនពេលមកពិនិត្យ ព្យាបាលជំងឺ។ បងថាច់ថាញ់ដុង នៅភូមិកន្ធាយ ឃុំឡងមី ឱ្យដឹង៖ "ដំណាក់សុខាភិបាលកសាងសមរម្យ ស្អាតបាត ម៉្លោះហើយខ្ញុំស្ងប់ចិត្តពេលនាំកូនមកពិនិត្យជំងឺនៅទីនេះ ពីមុន ពេលកូនឈឺម្តងៗខ្ញុំតែងនាំទៅពិនិត្យជំងឺនៅបន្ទប់ពិនិត្យឯកជន"។

លោកថាច់យឿង ប្រធានគណៈជនជាតិខេត្តវិញឡុង ឱ្យដឹង៖ ស្មារតីយល់ដឹងអំពីការថែទាំសុខភាពផ្ទាល់ខ្លួននិងគ្រួសាររបស់ជនរួមជាតិភាគតិចលើភូមិសាស្រ្តខេត្តកាន់តែលើកកម្ពស់។ លទ្ធផលទាំងនេះ អាស្រ័យមន្ទីរ គណៈ ផ្នែកនិងភូមិភាគអនុវត្តប្រកបដោយប្រសិទ្ធភាពនូវសេចក្តីសម្រេចលេខ១៧៣៤/QĐ-UBND ស្តីពីការប្រើប្រាស់ប័ណ្ណធានារ៉ាប់រងសុខាភិបាលទូទាំងប្រជាជនខេត្តវិញឡុងដំណាក់កាល២០១៦-២០២០។ ផ្តើមពីការអនុវត្តសេចក្តីសម្រេចដូចពោលខាងលើ មកទល់បច្ចុប្បន្ន ខេត្តវិញឡុងមាន១៣/១៣ឃុំនៅតំបន់ជនរួមជាតិខ្មែរ មានដំណាក់សុខាភិបាលសម្រេចបទដ្ឋានជាតិ មានវេជ្ជបណ្ឌិត។ ពិសេស កងជួរកម្មាភិបាល បុគ្គលិកពេទ្យជាជនជាតិខ្មែរ សុទ្ធតែបានបណ្តុះបណ្តាលនិងរៀបចំឱ្យមានការងារធ្វើកាន់តែកើនឡើង។ រួមជាមួយនឹងកងជួរសហការីសុខាភិបាលជនជាតិភាគតិច កងជួរទាំងនោះបានរួមចំណែកក្នុងការផ្សព្វផ្សាយ ណែនាំអំពីការបង្ការទប់ស្កាត់រោគរាលដាលលើមនុស្សនិងសត្វចិញ្ចឹម ម្ល៉ោះហើយ ស្មារតីយល់ដឹងក្នុងការថែទាំសុខភាពផ្ទាល់ខ្លួននិងគ្រួសារមានការផ្លាស់ប្តូរច្រើន។ អាស្រ័យហេតុនោះ ពេលអនុវត្តកម្មវិធីទិសដៅសុខាភិបាលជាតិ ខែសកម្មភាពដើម្បីកុមារ។ល។ សុទ្ធសឹងសម្រេចតាមតម្រូវការដាក់ចេញ។ លោកថាច់យឿង បញ្ជាក់៖ "អនុវត្តសេចក្តីសម្រេចលេខ១៧៣៤/QĐ-UBND មកទល់បច្ចុប្បន្ន គ្រួសារជនរួមជាតិខ្មែរក្រីក្របានជូនប័ណ្ណធានារ៉ាប់រងសុខាភិបាល១០០%"។

ផ្តើមពីលទ្ធផលដែលសម្រេចបាន ខេត្តវិញឡុងកំពុងផ្តុំកម្លាំងលើកកម្ពស់គុណភាព ឆ្លើយតបនឹងតម្រូវការពិនិត្យ ព្យាបាលជំងឺដែលប្រើប័ណ្ណធានារ៉ាប់រងសុខាភិបាល។ ព្រមទាំងបង្កើនការបំពាក់បរិក្ខារពេទ្យ ហេដ្ឋារចនាសម្ព័ន្ធជូនដំណាក់សុខាភិបាលឃុំ ផ្សារភ្ជាប់នឹងកម្មវិធីកសាងជនបទថ្មី។ រួមនឹងការបណ្តុះបណ្តាល និងបន្តបណ្ដុះបណ្ដាលឡើងវិញប្រភពធនធានមនុស្សផ្នែកសុខាភិបាល ដើម្បីលើកកម្ពស់គុណភាពពិនិត្យ ព្យាបាលជំងឺជូនប្រជាជន៕

ហាថាញ់-មុនី

ចែករំលែកអត្ថបទ

ពាក្យគន្លឹះ