សុខភាព - អប់រំ អប់រំ

07/11/2026 - 21:21

ទីក្រុងកឹងធើ លើកកម្ពស់គុណភាពអប់រំគ្រប់ជ្រុងជ្រោយ ជំរុញការបង្រៀនមួយថ្ងៃពីរពេល

ទន្ទឹមនឹងការផ្លាស់ថ្មីវិធីសាស្ត្របង្រៀន ទីក្រុងកឹងធើបានផ្តោតការយកចិត្តទុកដាក់លើការអប់រំសីលធម៌ ផ្នត់រស់នៅ បំណិនជីវិតនិងកសាងបរិស្ថានសាលារៀនសុវត្ថិភាព ស្និទ្ធស្នាល។ ជាជំហានៗបើកទូលាយបង្រៀនមួយថ្ងៃពីរពេល រួមចំណែកអភិវឌ្ឍសិស្សគ្រប់ជ្រុងជ្រោយ ព្រមទាំងលើកកម្ពស់ប្រភពធនធានមនុស្សក្នុងដំណាក់កាលថ្មី។

ទីក្រុងកឹងធើ ផ្លាស់ថ្មីវិធីសាស្ត្របង្រៀន យកចិត្តទុកដាក់លើការអភិវឌ្ឍសមត្ថភាពនិងគុណសម្បិត្តរបស់សិស្ស។

អនុវត្តសេចក្តីសម្រេចចិត្តលេខ ៧១-NQ/TWរបស់ការិយាល័យនយោបាយអំពីការលោតផ្លោះអភិវឌ្ឍការអប់រំនិងបណ្តុះបណ្តាល ផ្នែកអប់រំទីក្រុងកឹងធើបានផ្តុំកម្លាំងអនុវត្តព្រមៗគ្នានូវដំណោះស្រាយផ្លាស់ថ្មីលើគ្រប់ជ្រុងជ្រោយសកម្មភាពបង្រៀននិងរៀន។ នៅតាមគ្រឹះស្ថានអប់រំ ការបំពាក់ចំណេះដឹងតាមកម្មវិធីជាផ្លូវការតែងដើរទន្ទឹមនឹងការបំប៉នសីលធម៌ ភាពស្អាតបាត លត់ដំកាយសម្បទានិងលើកកម្ពស់ស្មារតីគោរពច្បាប់។ បណ្តាសកម្មភាពអប់រំបានបត់បែនភ្ជាប់នឹងការឆ្លងបទពិសោធន៍ជាក់ស្តែង ជួយឱ្យសិស្សបំពេញបំណិនការរស់នៅ ស្មារតីទទួលខុសត្រូវនិងសមត្ថភាពបត់បែនសម្របនឹងសង្គម។ ក្នុងនោះ ទម្រង់ "សាលារៀនបៃតង-ជ្រះស្អាត-មានសុខភាពល្អ" នៅកម្រិតបឋមសិក្សាបានគួបផ្សំយ៉ាងរលូនជាមួយកម្មវិធីអប់រំចំណេះទូទៅ ឆ្នាំ២០១៨ បាននាំមកប្រសិទ្ធភាពច្បាស់លាស់ កសាងទេសភាពសមរម្យ បង្កើតទម្លាប់ហាត់ប្រាណថែរក្សាសុខភាពនិងស្មារតីវិជ្ជមាន។

ទន្ទឹមនឹងនោះ ការកសាងបរិស្ថានសាលារៀនសុវត្ថិភាព វិជ្ជមាន បានកំណត់ជាទិសដៅប្រចាំ។ នៅតាមគឹ្រះស្ថានអប់រំកម្រិតអនុវិទ្យាល័យ វិទ្យាល័យទាំង១០០%លើភូមិឋានបានអនុវត្តយ៉ាងម៉ឺងម៉ាត់ក្រមប្រតិបត្តិសីលធម៌ ផ្សារភ្ជាប់ជិតស្និទ្ធជាមួយទម្រង់សាលារៀនស្និទ្ធស្នាល សមសួន បំបាត់អបាយមុខសង្គមនិងអំពើហិង្សាក្នុងសាលារៀន។ អាស្រ័យជំរុញការផ្សព្វផ្សាយច្បាប់និងការគ្រប់គ្រងយ៉ាងហ្មត់ចត់ ផ្នែកអប់រំមិនទាន់កត់សម្គាល់ករណីកម្មាភិបាល បក្ខជនឬសិស្សណាម្នាក់ប្រព្រឹត្តល្មើសច្បាប់ដែលពាក់ព័ន្ធដល់អបាយមុខសង្គមឬប្រើប្រាស់គ្រឿងញៀន រួមចំណែករក្សារឹងមាំច្បាប់វិន័យគរុកោសល្យ។

ដើម្បីធ្វើឱ្យជាក់ស្តែងពេលវេលាពង្រឹងចំណេះដឹងនិងហាត់ពត់ទេពកោសល្យ ចាប់ពីឆ្នាំសិក្សា ២០២៥-២០២៦ ទីក្រុងកឹងធើបានផ្តុំកម្លាំងអនុវត្តការចាត់តាំងបង្រៀនមួយថ្ងៃពីរពេលតាមស្មារតី "៦ច្បាស់"។ មកដល់បច្ចុប្បន្ន អត្រាសិស្សបឋមសិក្សារៀនមួយថ្ងៃពីរពេល សម្រេចអត្រា១០០% កម្រិតអនុវិទ្យាល័យសម្រេចអត្រា ៤១,១៣% និងកម្រិតវិទ្យាល័យសម្រេចអត្រា ៥៥,០៦%។ ទោះបីភូមិឋានមួយចំនួននៅខ្វះបន្ទប់រៀននិងក្របខ័ណ្ឌគ្រូបង្រៀននៅកម្រិតមធ្យមសិក្សា រដ្ឋអំណាចគ្រប់លំដាប់ថ្នាក់រួមជាមួយផ្នែកឯកទេសបានម្ចាស់ការពិនិត្យឡើងវិញ ជាជំហានៗដោះស្រាយបញ្ហាលំបាកអំពីមូលដ្ឋានសម្ភារៈនិងរៀបចំកងជួរគ្រូបង្រៀនឱ្យសមស្រប។

សិស្សសាលាបឋមសិក្សាលីវទូបានសិក្សា ហាត់ពត់បំណិនតាមរយៈកម្មវិធីអប់រំមួយថ្ងៃពីរពេល។

នៅឃុំលីវទូ ជាភូមិឋានមួយមានជនរួមជាតិខ្មែររស់នៅកុះករ ការអនុវត្តកម្មវិធីសិក្សាមួយថ្ងៃពីរពេលចាប់ពីឆ្នាំសិក្សា ២០២៥-២០២៦ មានការវិវឌ្ឍន៍យ៉ាងច្បាស់លាស់។ តាមប្រសាសន៍បង ង្វៀងហ្វាងអាញ អនុប្រធានការិយាល័យវប្បធម៌-សង្គមឃុំលីវទូ ភូមិភាគតែងចង្អុលការយ៉ាងជិតដិតដល់គ្រឹះស្ថានអប់រំទាំងអស់ ដើម្បីអនុវត្តភារកិច្ចឆ្នាំសិក្សាថ្មីឱ្យបានល្អ យកចិត្តទុកដាក់បង្កលក្ខណៈងាយស្រួល ដើម្បីសិស្សនៅតំបន់ជនជាតិភាគតិចទទួលបានផលប្រយោជន៍នៃការអប់រំគ្រប់ជ្រុងជ្រោយ។ ផែនការសិក្សាមួយថ្ងៃពីរពេលបានប្រព្រឹត្តទៅរលូន ដោយផ្អែកលើលក្ខណៈជាក់ស្តែងរបស់សាលារៀននីមួយៗ ធានាត្រឹមត្រូវតាមបទដ្ឋានមុខជំនាញវិជ្ជាជីវៈរបស់ផ្នែកអប់រំ។

លោកគ្រូ ត្រាងថាញតើយ ចាងហ្វាងសាលាបឋមសិក្សាលីវទូ ឱ្យដឹង៖ "បច្ចុប្បន្ន សាលាមានថ្នាក់រៀន៨៩ថ្នាក់ ដោយមានសិស្ស ២.២៩២នាក់ ក្នុងនោះ មានសិស្សជាកូនចៅរួមជាតិខ្មែរជាង ៨០%។ មកដល់បច្ចុប្បន្ន សិស្ស១០០%ចាប់ពីថ្នាក់ទី១ ដល់ទី៥ បានសិក្សាមួយថ្ងៃពីរពេល។ បរិមាណពេលទី២បានប្រើប្រាស់អស់ពីលទ្ធភាពដើម្បីពង្រឹងភាសាវៀតដល់សិស្សខ្មែរ ផ្គួបបញ្ចូលទាំងការបង្រៀនអក្សរខ្មែរ អប់រំកម្មវិធី STEM ហាត់ពត់បំណិនការស់នៅនិងបំណិនឌីជីថល។ ការបំពេញបន្ថែមបានទាន់ពេលនេះ ជួយឱ្យប្អូនៗកាន់តែមានទំនុកចិត្តក្នុងការទំនាក់ទំនង ទទួលយកចំណេះដឹងក្នុងមេរៀនបានល្អនិងអភិវឌ្ឍគ្រប់ជ្រុងជ្រោយទាំងគុណសម្បត្តិនិងសមត្ថភាព"។

ចាប់ពីការផ្លាស់ថ្មីវិធីសាស្ត្របង្រៀន រហូតដល់ការបើកទូលាយបង្រៀនមួយថ្ងៃពីរពេល ទីក្រុងកឹងធើ ជាជំហានៗកសាងខឿនអប់រំតាមទិសដៅគ្រប់ជ្រុងជ្រោយ។ នេះជាមូលដ្ឋានគ្រឹះដ៏សំខាន់ដើម្បីបំប៉នជំនាន់យុវវ័យមានចំណេះដឹង បំណិននិងគុណសម្បត្តិល្អ ឆ្លើយតបទៅនឹងតម្រូវការអភិវឌ្ឍប្រភពធនធានមនុស្សក្នុងដំណាក់កាលថ្មី៕

ហុងទើ-មុនី

ចែករំលែកអត្ថបទ

ពាក្យគន្លឹះ