មហាសាមគ្គីជនជាតិ ភូមិស្រុកផ្លាស់ថ្មី

09/09/2026 - 06:01

ព្រួតដៃកសាងភូមិស្រុកធ្វឹងហ្វា ឱ្យកាន់តែរីកចម្រើន

ផ្តើមពីកញ្ចប់អំណោយពោរពេញដោយមនោសញ្ចេតនា ផ្ទះថ្មីៗដែលបានសាងសង់ រហូតដល់ដងផ្លូវដែលបំពាក់ អំពូលភ្លើងអុជបំភ្លឺដោយថាមពលព្រះអាទិត្យ... ទាំងអស់នេះសុទ្ធតែផ្តើមចេញពីការសាមគ្គី និងការព្រួតរួមដៃគ្នារបស់សហគមន៍ ដើម្បីរួមគ្នាកសាងភូមិស្រុកធ្វឹងហ្វា ទីក្រុងកឹងធើ ឱ្យកាន់តែសមរម្យ ពោរពេញដោយមនោសញ្ចេតនា និងអភិវឌ្ឍ។

សប្បុរសជនជូនអំណោយដល់ប្រជាដែលមានជីវភាពលំបាកនៅឃុំធ្វឹងហ្វា។

ក្នុងអំឡុងប៉ុន្មានថ្ងៃដើមខែកញ្ញា នៅតាមភូមិនានានៅឃុំធ្វឹងហ្វា ស្មារតីសាមគ្គីភាព និងការចែករំលែករបស់សហគមន៍ នៅតែបន្តរីកសាយភាយតាមរយៈសកម្មភាពជាក់ស្តែង។ អ្នកខ្លះចូលរួមជាថវិកា អ្នកខ្លះចូលរួមកម្លាំងថ្ងៃពលកម្ម; អង្គការនិងបុគ្គលនានា រួមគ្នាគិតគូរជូនគ្រួសារក្រីក្រ និងមនុស្សចាស់គ្មានទីពឹង។ ទាំងអស់នេះបានបង្កើតឡើងនូវមនោសញ្ចេតនាយ៉ាងកក់ក្តៅ រួមចំណែកកសាងស្រុកកំណើតឱ្យកាន់តែស្រស់បំព្រង និងពោរពេញមនោសញ្ចេតនា។ នៅតាមផ្លូវដានកិញហូវ ភូមិត្រាកាញ់ A2 អំពូលភ្លើងថាមពលព្រះអាទិត្យទើបតែបានដំឡើង អុជបំភ្លឺដងផ្លូវប្រវែងជិត ៨០០ ម៉ែត្រ។ ក្នុងលើកនេះ គណៈការងារ រណសិរ្សភូមិ បានសហការជាមួយសាខាបក្ស គណៈប្រជាជនភូមិ អ្នកមានប្រិយភាព និងប្រជាជន បន្តចលនាដំឡើងអំពូលភ្លើងថាមពលព្រះអាទិត្យចំនួន ១៨ ដើម ដោយសរុបថវិកាជិត ៣០ លានដុង។ រាល់សំណង់ទាំងអស់មិនត្រឹមតែអនុវត្តពីប្រភពសង្គមូបនីយកម្មប៉ុណ្ណោះទេ ប៉ុន្តែថែមទាំងមានការរួមចំណែកផ្ទាល់ពីប្រជាជនផងដែរ។ លោក ត្រឹង វ៉ាំងដេវ លេខាសាខាបក្សភូមិ ត្រាកាញ់ A២ ចែករំលែក៖ “កាលពីមុន មិនទាន់មានអំពូលភ្លើង ដងផ្លូវនេះងងឹត ធ្វើឱ្យប្រជាជនធ្វើដំណើរមានការលំបាក ឃើញដូច្នោះទើបភូមិភាគចលនាដំឡើងភ្លើងបំភ្លឺផ្លូវ។ ដោយឃើញពីផល ប្រយោជន៍នេះ ប្រជាជនម្នាក់ៗសុទ្ធតែឯកភាពនិងគាំទ្រយ៉ាងខ្លាំង អ្នកខ្លះចូលរួមថវិកា អ្នកខ្លះចូលរួមកម្លាំងកាយ រួមគ្នាដំឡើងបង្គោល បំពាក់អំពូលភ្លើង ធ្វើឱ្យដងផ្លូវមានពន្លឺភ្លឺស្វាង។ ពេលឃើញផ្លូវភ្លឺស្រឡះ មាមីងអ្នកណាក៏សប្បាយរីករាយ ព្រោះខ្លួនឯងក៏បានរួមចំណែកធ្វើឱ្យស្រុកកំណើតកាន់តែស្រស់ស្អាត”។ មានអំពូលភ្លើងបំភ្លឺ ដងផ្លូវមិនត្រឹមតែជួយឱ្យប្រជាជនធ្វើដំណើរបានងាយស្រួល ធានាសុវត្ថិភាពប៉ុណ្ណោះទេ ប៉ុន្តែថែមទាំងរួមចំណែករក្សាសន្តិសុខសណ្តាប់ធ្នាប់ទៀតផង។ លើសពីនេះទៅទៀត នោះគឺជាលទ្ធផលនៃស្មារតីសាមគ្គីភាពនៅក្នុងសហគមន៍។ ផ្តើមពីការឯកភាពរបស់ប្រជាជន សំណង់តូចៗប៉ុន្តែមានប្រសិទ្ធភាពជាក់ស្តែងទាំងនេះ បានរួមចំណែកផ្លាស់ប្តូរទិដ្ឋភាពនៅជនបទ។

ប្រជាជនព្រួតដៃរួមគ្នាដំឡើងអំពូលភ្លើងបំភ្លឺផ្លូវនៅភូមិត្រាកាញ់ B។

ទន្ទឹមនឹងការរួមកម្លាំងកសាងហេដ្ឋារចនាសម្ព័ន្ធ ស្មារតី “ស្លឹកជាពាសស្លឹកដាច់” ក៏បានប្រជាជននិងសប្បុរសជននៅឃុំធ្វឹងហ្វា រក្សានិងពង្រីក។ ថ្មីៗនេះ គណៈកម្មាធិការរណសិរ្សមាតុភូមិវៀតណាមឃុំ បានសហការជាមួយក្រុមសប្បុរសធម៌អៀងត្រឹង TV រួមជាមួយសាខាបក្ស គណៈប្រជាជន និងគណៈការងាររណសិរ្សភូមិ ត្រាកាញ់ B ជូនអំណោយ ចំនួន ៥០ ចំណែកដល់គ្រួសារដែលមានអ្នកវ័យចាស់គ្មានទីពឹង និងគ្រួសារដែលមានជីវភាពលំបាក។ អំណោយមួយចំណែកៗគិតតម្លៃ ៥០០.០០០ ដុង រួមមាន៖ អង្ករ គ្រឿងឧបភោគបរិភោគ និងថវិកា ១០០.០០០ ដុង ដោយសរុបថវិកាចំនួន ៥០ លានដុង។ អំណោយទាំងនេះថ្វីដ្បិតតែមិនធំដុំ ប៉ុន្តែបាននាំនូវការយកចិត្តទុកដាក់ និងការចែករំលែកពីសហគមន៍ ជួយដល់គ្រួសារក្រីក្រ និងអ្នកវ័យចាស់គ្មានទីពឹង សម្រាលបានការលំបាកឈានឡើងក្នុងជីវភាព។ ពេលទទួលអំណោយនៅក្នុងដៃ លោក ស៊ើងហឹង រំភើបឱ្យដឹង៖ “គ្រួសារខ្ញុំលំបាកខ្លាំងណាស់! បានភូមិភាគនិងសប្បុរសជនយកចិត្តទុកដាក់ជួយឧបត្ថម្ភបែបនេះ ខ្ញុំមានអារម្មណ៍ថាកក់ក្តៅក្នុងចិត្តខ្លាំងណាស់។ ជាពិសេស គឺបានសប្បុរសជនជួយសាងសង់ផ្ទះ និងជូនអំណោយទៀត ខ្ញុំសប្បាយចិត្តខ្លាំងណាស់ គុណបំណាច់នេះខ្ញុំនឹងចងចាំជានិច្ច”។

សប្បុរសជនរួមជាមួយរណសិរ្សឃុំ បើកការដ្ឋានសាងសង់ផ្ទះជូនគ្រួសារក្រីក្រ។

តាមអ្នកស្រី ចូវ ហុងហ្វា ប្រធានគណៈកម្មាធិការរណសិរ្សមាតុភូមិវៀតណាមឃុំធ្វឹងហ្វា បានឱ្យដឹង រយៈពេលកន្លង រណសិរ្សបានពង្រីកយ៉ាងល្អនូវតួនាទីប្រមូលផ្តុំ ចលនាប្រជាជន និងកៀរគរប្រភពធនធានសង្គម ដើម្បីរួមគ្នាគិតគូរសុខមាលភាពសង្គម និងកសាងសំណង់នានាបម្រើដល់ជីវភាពប្រជាជន។ ចាប់តាំងពីដើមឆ្នាំរហូតមកទល់ពេលនេះ រណសិរ្សបានចលនាសប្បុរសជន ចូលរួមសាងសង់ផ្ទះមហាសាមគ្គីបានចំនួន ១៣ ខ្នង ជូនដល់គ្រួសារដែលមានការលំបាកខាងលំនៅឋាន; សាងសង់ស្ពានជនបទបានចំនួន ២ ជូនអំណោយជាង ១.៨០០ ចំណែក ជូនគ្រួសារក្រីក្រ និងគ្រួសារដែលមានជីវភាពលំបាកនៅលើភូមិឋាន; អនុវត្តដងផ្លូវគំរូចំនួន ១១ របស់ឃុំ ដែលមានប្រវែងសរុប ១៤.៧០០ ម៉ែត្រ...។ ទាំងអស់នេះបានបង្ហាញឱ្យឃើញ នៅពេលដែលប្រជាជនស្រុះស្រួលចិត្ត ចេះចែករំលែក និងមានការទទួលខុសត្រូវជាមួយសហគមន៍ នោះកម្លាំងសាមគ្គីភាពនឹងក្លាយជាប្រភពធនធានដ៏សំខាន់ ដើម្បីកសាងស្រុកកំណើតធ្វឹងហ្វាឱ្យកាន់តែរីកចម្រើន។

ផ្តើមពីអំពូលភ្លើងអុជបំភ្លឺផ្លូវជនបទ រហូតដល់កញ្ចប់អំណោយដែលបានប្រគល់ដល់ដៃអ្នកក្រីក្រ រាល់ទង្វើ នីមួយៗសុទ្ធតែរួមចំណែកកសាងសាមគ្គីភាពនៅក្នុងសហគមន៍។ នៅពេលប្រជាជនស្រុះស្រួលចិត្តគ្នា រួមគ្នាចូលរួមទាំងទ្រព្យសម្បត្តិទាំងកម្លាំងកាយចិត្ត ពន្លឺភ្លឺនៅតាមដងផ្លូវជនបទមិនត្រឹមតែបំភ្លឺផ្លូវដើរប៉ុណ្ណោះទេ ប៉ុន្តែថែមទាំងអុជបំភ្លឺនូវក្តីជំនឿនៅភូមិស្រុកធ្វឹងហ្វា ដែលពោរពេញដោយមនោសញ្ចេតនា ជាកន្លែងដែលប្រជាជនរួមដៃគ្នាកសាងស្រុកកំណើតឱ្យកាន់តែភ្លឺ - បៃតង - ជ្រះ - ស្អាត និងអភិវឌ្ឍន៍ប្រកបដោយចីរភាព៕

យ្វីអាញ់-វ៉ាន់តឹន

ចែករំលែកអត្ថបទ

ពាក្យគន្លឹះ