សុខភាព - អប់រំ អប់រំ

08/09/2026 - 14:34

ផ្លាស់ប្តូរឌីជីថលបង្កកម្លាំងចលករផ្លាស់ថ្មីការអប់រំ

ផ្លាស់ប្តូរឌីជីថលកំពុងមានការវិវឌ្ឍន៍វិជ្ជមានក្នុងវិស័យអប់រំនិងបណ្តុះបណ្តាលនៅទីក្រុងកឹងធើ។ ចាប់ពីការគ្រប់គ្រង ការចាត់ចែង រហូតដល់ការបង្រៀន ថ្នាលឌីជីថល សិក្ខាគារិកឌីជីថលនិងបញ្ញាសិប្បនិម្មិត ក៏បានយកចិត្តទុកដាក់អនុវត្តជាបណ្តើរៗ រួមចំណែកលើកកម្ពស់ប្រសិទ្ធភាពនៃការគ្រប់គ្រងនិងគុណភាពបង្រៀននិងរៀន។

អនុវត្តបច្ចេកវិទ្យាឌីជីថល រួមចំណែកផ្លាស់ថ្មីវិធីសាស្ត្របង្រៀននិងរៀន។

នៅក្នុងកិច្ចប្រជុំស្តីពីការផ្លាស់ប្តូរឌីជីថលក្នុងវិស័យអប់រំនិងបណ្តុះបណ្តាល ចាត់តាំងឡើងដោយមន្ទីរអប់រំនិងបណ្តុះបណ្តាលទីក្រុងកឹងធើ បានផ្តោតសំខាន់លើការវាយតម្លៃលទ្ធផលដែលសម្រេចបាន ចែករំលែកបទពិសោធន៍ក្នុងការអនុវត្តបច្ចេកវិទ្យាឌីជីថល ព្រមទាំងលើកឡើងនូវដំណោះស្រាយបន្តជំរុញការផ្លាស់ប្តូរឌីជីថលក្នុងទូទាំងវិស័យ។

តាមប្រសាសន៍លោក យ័ញហ្វាងង្វៀង នាយករងមន្ទីរអប់រំនិងបណ្តុះបណ្តាលទីក្រុងកឹងធើ ឱ្យដឹង៖ រយៈពេលកន្លង ការងារផ្លាស់ប្តូរឌីជីថលរបស់ផ្នែកសម្រេចបានលទ្ធផលវិជ្ជមានជាច្រើន។ ប្រព័ន្ធគ្រប់គ្រងសាលាបានផ្សព្វផ្សាយនៅតាមគ្រឹះស្ថានអប់រំទាំងអស់ គ្រឹះស្ថានអប់រំទាំង១០០% ប្រើប្រាស់ផ្នែកទន់គ្រប់គ្រងសាលារៀនតភ្ជាប់នឹងមូលដ្ឋានទិន្នន័យរបស់ផ្នែកអប់រំ។ តាមរយៈនោះ ផ្លាស់ប្តូរបែបបទគ្រប់គ្រងជាបណ្តើរៗ ពីសំណុំឯកសារតាមបែបប្រពៃណីទៅជាបរិស្ថានឌីជីថល រួមចំណែកលើកកម្ពស់ប្រសិទ្ធភាពការចាត់ចែងនិងទាញយកទិន្នន័យបម្រើការមុខជំនាញ។ទន្ទឹមនឹងនោះ បណ្តាបែបបទរដ្ឋបាលមានលក្ខខណ្ឌគ្រប់សព្វ បានផ្តល់សេវាកម្មរដ្ឋតាមប្រព័ន្ធអ៊ីនធឺណិត ការទូទាត់ថ្លៃសិក្សាមិនប្រើ សាច់ប្រាក់បានផ្សព្វផ្សាយនៅតាមគ្រឹះស្ថានអប់រំ១០០%។ ការអនុវត្តបច្ចេកវិទ្យាក្នុងការដោះស្រាយបែបបទរដ្ឋបាល រួមចំណែកបន្ថយពេលវេលានិងការចំណាយ បង្កលក្ខណៈងាយស្រួលដល់អាណាព្យាបាលសិស្សនិងកងជួរគ្រូបង្រៀន។

ខ្លឹមសារមួយក្នុងចំណោមខ្លឹមសារសំខាន់ៗ គឺការផ្សព្វផ្សាយសិក្ខាគារិកឌីជីថល។ ក្នុងឆ្នាំសិក្សា២០២៥-២០២៦ សិក្ខាគារិកឌីជីថលបានផ្សព្វផ្សាយនៅតាមគ្រឹះស្ថានអប់រំចំណេះទូទៅនិងអប់រំជាប្រចាំ ឆ្ពោះដល់ការជំនួសឱ្យសិក្ខាគារិកក្រដាសក្នុងការគ្រប់គ្រង វាយតម្លៃ ពិនិត្យឡើងថ្នាក់ ពិនិត្យបញ្ចប់ការសិក្សា ជម្រើសសិស្សនិងដោះស្រាយបែបបទរដ្ឋបាលដែលជាប់ពាក់ព័ន្ធ។ មន្ទីរអប់រំនិងបណ្តុះបណ្តាលទីក្រុង បានណែនាំដល់គ្រឹះស្ថានអប់រំបង្កើត គ្រប់គ្រងនិងប្រើប្រាស់សិក្ខាគារិកឌីជីថលតាមសេចក្តីកំណត់ ធានាឱ្យមានហត្ថលេខាយ៉ាងពេញលេញរបស់គ្រូបង្រៀនគ្រប់មុខវិជ្ជាឬសកម្មភាពការអប់រំ គ្រូបង្រៀនប្រចាំថ្នាក់និងចាងហ្វាងសាលាមុនពេលចេញផ្សាយ។ទិន្នន័យសិក្ខាគារិកឌីជីថលត្រូវបានអនុវត្តតាមការកំណត់ទ្រង់ទ្រាយបទដ្ឋានរបស់ក្រសួងអប់រំនិងបណ្តុះបណ្តាល ធានាការតភ្ជាប់គ្នាជាមួយមូលដ្ឋានទិន្នន័យសិក្ខាគារិកឌីជីថលរបស់ក្រសួងនិងចែករំលែកជាមួយកម្មវិធី VneID។

មកទល់ពេលនេះ គ្រឹះស្ថានអប់រំបានអនុវត្តព្រមៗគ្នានូវទិន្នន័យសិក្ខាគារិកឌីជីថលលើមូលដ្ឋានទិន្នន័យរបស់ក្រសួងអប់រំនិងបណ្តុះបណ្តាល។ សិក្ខា គារិកឌីជីថលសម្រាប់សិស្សបឋមសិក្សា អនុវិទ្យាល័យ វិទ្យាល័យនិងសិក្ខាកាមអប់រំជាប្រចាំចេញផ្សាយជោគជ័យសម្រេច ៩៥,១%។ នេះជាមូលដ្ឋានដ៏សំខាន់ ដើម្បីផ្នែកអប់រំបន្តធ្វើឱ្យសុក្រឹតប្រព័ន្ធទិន្នន័យវិស័យអប់រំ លើកកម្ពស់ប្រសិទ្ធភាពការគ្រប់គ្រងនិងបង្កលក្ខណៈងាយស្រួលដល់អ្នកសិក្សាក្នុងដំណាក់ការប្រើប្រាស់និងបញ្ជាក់ព័ត៌មានការសិក្សា។

ជំរុញការអនុវត្តបច្ចេកវិទ្យាក្នុងការគ្រប់គ្រងវិស័យអប់រំ។

ផ្តើមពីភាពជាក់ស្តែងនៅមូលដ្ឋាន លោកគ្រូ យឿងសាផល ចាងហ្វាងសាលាអនុវិទ្យាល័យនិងវិទ្យាល័យជនជាតិអន្តេវាសិកថាញ់ភូ ឱ្យដឹង៖ “ការផ្លាស់ប្តូរឌីជីថលបានសាលាកំណត់ជាដំណោះស្រាយមួយដ៏សំខាន់ ដើម្បីលើកកម្ពស់ប្រសិទ្ធភាពការអប់រំនិងគុណភាពអប់រំ។ រយៈពេលកន្លង សាលាបានអនុវត្តជាបណ្តើរៗនូវការគ្រប់គ្រងឯកសារ បញ្ជីលើផ្នែកទន់អេឡិចត្រូនិក គ្រប់គ្រងទ្រព្យសម្បត្តិនិងបរិក្ខារដោយកម្មវិធីផ្នែកទន់ ផ្សព្វផ្សាយសៀវភៅទំនាក់ទំនងអេឡិចត្រូនិក សិក្ខាគារិកឌីជីថលនិងហត្ថលេខាឌីជីថលក្នុងសកម្មភាពមុខជំនាញ។ ទន្ទឹមនឹងនោះ ការបញ្ចូលកម្មវិធីបញ្ញាសិប្បនិម្មិតទៅក្នុងវិញ្ញាសាមួយចំនួនបានអនុវត្តសមស្របនឹងខ្លឹមសារកម្មវិធីនិងលក្ខណៈជាក់ស្តែង ជួយគ្រូបង្រៀនមានឧបករណ៍បន្ថែមសម្រាប់ការបង្កើតសម្ភារៈសិក្សា ផ្លាស់ថ្មីវិធីសាស្ត្របង្រៀន ព្រមទាំងណែនាំសិស្សបានបង្ខិតជិតនិងប្រើប្រាស់បច្ចេកវិទ្យាចំគោលដៅ សុវត្ថិភាពនិងប្រសិទ្ធភាព”។

ទន្ទឹមនឹងការអភិវឌ្ឍថ្នាលឌីជីថល ផ្នែកអប់រំនិងបណ្តុះបណ្តាលទីក្រុង បានយកចិត្តទុកដាក់លើកកម្ពស់សមត្ថភាពឌីជីថលដល់កងជួរកម្មាភិបាលគ្រប់គ្រងនិងគ្រូបង្រៀន។ មកទល់ពេលនេះ មានគ្រូបង្រៀន ៣០.៣០៨នាក់ ចាប់ពីកម្រិតមត្តេយ្យដល់ចំណេះទូទៅ និងអប់រំជាប្រចាំ បានចូលរួមនិងបញ្ចប់វគ្គសិក្សាលើកកម្ពស់សមត្ថភាពឌីជីថល។ ផ្នែកអប់រំក៏បានចាត់តាំងវគ្គបំប៉នអំពីសមត្ថភាពឌីជីថល បញ្ញាសិប្បនិម្មិត សម្ភារៈសិក្សាឌីជីថលនិងទាញយកបណ្តាញបច្ចេកវិទ្យា ជួយកងជួរគ្រូបង្រៀនលើកកម្ពស់បំណិនអនុវត្តបច្ចេកវិទ្យាក្នុងការគ្រប់គ្រងនិងការបង្រៀនជាបណ្តើរៗ។

សិស្សបង្ខិតជិតបច្ចេកវិទ្យានិងបង្កើតសមត្ថភាពឌីជីថលជាបណ្តើរៗ។

គួរឱ្យកត់សម្គាល់ មន្ទីរអប់រំនិងបណ្តុះបណ្តាលបានដាក់ឱ្យដំណើរការពិសោធន៍នូវខ្លឹមសារអប់រំបញ្ញាសិប្បនិម្មិតក្នុងឆ្នាំសិក្សា ២០២៥-២០២៦។ កម្រិតបឋមសិក្សា មាន១៤០សាលា មានសិស្សចូលរួម ៧៦.៥០០នាក់ កម្រិតអនុវិទ្យាល័យមាន ១២០សាលា មានសិស្សចូលរួម ១០០.៧០០នាក់ កម្រិតវិទ្យាល័យមាន ៩០សាលា មានសិស្សចូលរួម ៨៧.៧៤៦នាក់។ ការនាំយកបញ្ញាសិប្បនិម្មិតដាក់ក្នុងការអប់រំ ជំហានដំបូងជួយសិស្សបានបង្ខិតជិតបច្ចេកវិទ្យាថ្មី ព្រមទាំងបង្កលក្ខណៈដើម្បីគ្រូបង្រៀនផ្លាស់ថ្មីវិធីសាស្ត្របង្រៀន ទាញយកសម្ភារៈសិក្សាឌីជីថលនិងឧបករណ៍បច្ចេកវិទ្យាបម្រើការមុខជំនាញ។

ជាមួយនឹងលទ្ធផលដែលសម្រេចបាន ការផ្លាស់ប្តូរឌីជីថលកំពុងក្លាយជាផ្នែកមួយដ៏សំខាន់ក្នុងសកម្មភាពអប់រំនៅទីក្រុងកឹងធើ រួមចំណែកផ្លាស់ថ្មីវិធីសាស្ត្រគ្រប់គ្រង លើកកម្ពស់គុណភាពបង្រៀននិងរៀន បង្កបរិស្ថានអប់រំទំនើប ងាយស្រួយ ឆ្លើយតបទៅនឹងតម្រូវការផ្លាស់ថ្មីជាមូលដ្ឋាន និងគ្រប់ជ្រុងជ្រោយលើវិស័យអប់រំនិងបណ្តុះបណ្តាលក្នុងស្ថានភាពថ្មី៕

ហុងទើ-មុនី

ចែករំលែកអត្ថបទ

ពាក្យគន្លឹះ