សុខភាព - អប់រំ អប់រំ

29/08/2026 - 21:53

សមាគមព្រះសង្ឃសាមគ្គីស្នេហាជាតិខេត្តវិញឡុង និមន្តសួរសុខទុក្ខតាមសាលាខ្មែរ-បាលីលើភូមិឋានខេត្ត

រសៀលថ្ងៃ២៩ ខែសីហា ឆ្នាំ២០២៦ នៅវត្តសំរោងឯក អនុសង្កាត់ទី៧ សង្កាត់ង្វៀកហ្វា ខេត្តវិញឡុង សមាគមព្រះសង្ឃសាមគ្គីស្នេហាជាតិខេត្តវិញឡុង ចាត់តាំងមន្ត្រីសង្ឃនិមន្តមកសួរសុខទុក្ខ លើកទឹកចិត្តដល់គ្រូបង្រៀន សិស្សានុសិស្ស និងសមណសិស្សដែលកំពុងសិក្សានៅថ្នាក់ពុទ្ធិកសិក្សាបឋម និងពុទ្ធិកមធ្យមសិក្សាខ្មែរ-បាលីលើភូមិឋានខេត្ត។

សមាគមព្រះសង្ឃសាមគ្គីស្នេហាជាតិខេត្តវិញឡុង និមន្តមកសួរសុខទុក្ខថ្នាក់ពុទ្ធិកមធ្យមសិក្សាឆ្នាំទី៣ខ្មែរ-បាលីនៅវត្តសំរោងឯក។

មន្រ្តីសង្ឃដឹកនាំដោយព្រះឧបជ្ឈាយ៍ ថាច់សុខសាន្ត ប្រធានសមាគមព្រះសង្ឃសាមគ្គីស្នេហាជាតិខេត្តវិញឡុង ជាប្រធានមន្រ្តីសង្ឃ។ ក្នុងពិធីជួបជុំនៅវត្តសំរោងឯក ព្រះឧបជ្ឈាយ៍ ថាច់សុខសាន្ត បានសាកសួរពីស្ថានភាពសិក្សា បួសរៀនរបស់សិស្សានុសិស្ស និងសមណសិស្ស; ព្រមទាំងបានលើកទឹកចិត្តដល់ប្អូនៗបន្តពង្រីកស្មារតីសាមគ្គី ប្រឹងប្រែងរៀនសូត្រ និងគោរពឱ្យបានល្អនូវលក្ខន្តិកៈរបស់សាលា និងច្បាប់សម្រាប់វត្ត។ ទន្ទឹមនឹងនោះ ព្រះឧបជ្ឈាយ៍បានបញ្ជាក់៖ ការរៀនសូត្រមិនត្រឹមតែជួយលើកកម្ពស់ចំណេះដឹងប៉ុណ្ណោះទេ ថែមទាំងរួមចំណែកលត់ដំសីលធម៌ ស្មារតីភ្ញាក់រលឹកទទួលខុសត្រូវ និងកសាងរបៀបរស់នៅមានប្រយោជន៍ទៀតផង។

ព្រះឧបជ្ឈាយ៍ ថាច់សុខសាន្ត ប្រទានឱវាទក្នុងពិធីជួបជុំនៅវត្តសំរោងឯក។

ជាងនេះទៅទៀត ព្រះឧបជ្ឈាយ៍បានរំលឹកដល់ប្អូនៗសិស្សានុសិស្ស និងសមណសិស្សថា ត្រូវចេះប្រើប្រាស់បណ្តាញសង្គមដូច៖ Facebook, TikTok និងមូលដ្ឋានគ្រឹះផ្សេងៗទៀតដោយមានការទទួលខុសត្រូវ; ត្រូវមានការប្រុងប្រយ័ត្នពេលបញ្ចេញមតិ ចែករំលែក បង្ហោះព័ត៌មាន មិនត្រូវផ្សព្វផ្សាយខ្លឹមសារខុសពីការពិត ឬខ្វះការពិនិត្យផ្ទៀងផ្ទាត់ ដែលធ្វើប៉ះពាល់ដល់កិត្តិយសផ្ទាល់ខ្លួន វត្តអារាម និងសង្គម។ ជាពិសេស ប្អូនៗសិស្សានុសិស្ស សមណសិស្សត្រូវចៀសឱ្យឆ្ងាយពីបាបគ្រោះសង្គម កុំឱ្យគ្រឿងញៀន និងទម្លាប់អាក្រក់ទាំងនោះមកប៉ះពាល់ដល់ដំណាក់កាលរៀនសូត្រ ប្រតិបត្តិធម៌អាថ៌ និងអនាគតរបស់ខ្លួនឡើយ។

រូបភាពមួយចំនួនក្នុងពិធីជួបជុំ សួរសុខទុក្ខ និងលើកទឹកចិត្តដល់សិស្សានុសិស្ស សមណសិស្ស។

ព្រះឧបជ្ឈាយ៍ ថាច់សុខសាន្ត ក៏បានផ្តែផ្តាំដល់ប្អូនៗត្រូវរក្សាស្មារតីសាមគ្គី ជួយឧបត្ថម្ភ គាំទ្រគ្នាទៅវិញទៅមកដើម្បីរីកចម្រើនទាំងអស់គ្នា។ ប្រសិនបើចង់អភិវឌ្ឍខ្លួនឯង និងរួមចំណែកដល់សង្គមជាតិ ម្នាក់ៗត្រូវតែខិតខំរៀនសូត្រឥតឈប់ឈរ លើកកម្ពស់កម្រិតវិជ្ជានិងចំណេះដឹង។ ទន្ទឹមនឹងការរៀនអក្សរខ្មែរ-បាលី ប្អូនៗនិងសមណសិស្សគប្បីផ្តោតទៅលើការសិក្សានៅតាមសាលាចំណេះទូទៅ បំពេញបន្ថែមនូវចំណេះដឹងវិទ្យាសាស្ត្រ ជំនាញចាំបាច់ដើម្បីឆ្លើយតបតាមតម្រូវការរបស់សង្គមក្នុងយុគសម័យថ្មី។

តាមរយៈដំណើរនិមន្តសួរសុខទុក្ខ សមាគមព្រះសង្ឃសាមគ្គីស្នេហាជាតិខេត្តវិញឡុង មានបំណងចង់បន្តកម្លាំងចលករបន្ថែមដល់គ្រូបង្រៀន សិស្សានុសិស្ស និងសមណសិស្សស្ងប់ចិត្តរៀនសូត្រ បួសរៀន; ពង្រីកប្រវេណីសាមគ្គី អភិរក្សអត្តសញ្ញាណវប្បធម៌ជនជាតិ ព្រមទាំងខិតខំរៀនសូត្រ លត់ដំដើម្បីក្លាយខ្លួនជាអ្នកមានប្រយោជន៍សម្រាប់គ្រួសារ និងសង្គមជាតិ៕

ទីទុយ - លីសៀ

ចែករំលែកអត្ថបទ

ពាក្យគន្លឹះ