មហាសាមគ្គីជនជាតិ ភូមិស្រុកផ្លាស់ថ្មី

27/08/2026 - 19:43

ក្រុមសហការដាំដំណាំ ជួយនារីខ្មែរបង្កើនប្រាក់ចំណូល

ផ្តើមពីសមាជិកាដំបូង១០នាក់ ក្រោយពី៤ឆ្នាំដំណើការ ក្រុមសហការ "នារីដាំដំណាំឆ្លាស់គ្នាតាមទិសដៅសុវត្ថិភាព"នៅភូមិឈូងធំ ឃុំឡាយហា្វ ទីក្រុងកឹងធើ បានពង្រីកសមាជិកាឡើង១៤នាក់។ មិនត្រឹមតែជួយគ្នាអំពីដើមទុន បច្ចេកទេសនិងច្រកចេញ ទម្រង់នេះនៅទាំងជួយនារីខ្មែរជាច្រើនបង្កើនប្រាក់ចំណូល លំនឹងជីវភាព។

បងស្រីស៊ើងធីណារ៉ា កំពុងប្រមូលផលដំណាំ។

ឆ្នាំ២០២២ សមាគមសហព័ន្ធនារីឃុំឡាយហ្វា បង្កើតក្រុមសហការ "នារីដាំដំណាំឆ្លាសគ្នាតាមទិសដៅសុវត្ថិភាព" ដោយមានសមាជិកា១០នាក់ ដើម្បីបង្កលក្ខណៈឱ្យបងប្អូននារីចងសម្ព័ន្ធក្នុងការផលិត ចែករំលែកបទពិសោធន៍និងជួយដើមទុនគ្នា។ ក្រោយពីរយៈកាលសកម្មភាព ទម្រង់នាំមកប្រសិទ្ធភាពជាក់ស្តែង ជួយឱ្យសមាជិកាហ៊ានវិនិយោគ ម្ចាស់ការដាំឆ្លាស់ដំណាំច្រើនប្រភេទ។ អាស្រ័យរកបានប្រាក់ចំណូលជុំឆ្នាំ ដូច្នេះ សមាជិកានារីមានជីវភាពប្រសើរឡើងជាបណ្តើរៗ។ អ្នកស្រី វ៉ាំងធីអាញហុង អនុប្រធានគណៈកម្មាធិការរណសិរ្សមាតុភូមិវៀតណាមឃុំ ប្រធានសមាគមសហព័ន្ធនារី ឃុំឡាយហ្វា ឱ្យដឹង៖ "ពីមុន បងប្អូននារីជាច្រើនអនុវត្តទម្រង់ផលិតតាមលក្ខណៈគ្រួសារ ខ្វះដើមទុន ត្រូវទៅបុលខ្ចីខាងក្រៅការប្រាក់ខ្ពស់ ដូច្នេះ ជួបការលំបាកច្រើន បំផុតគឺពេលដំណាំចុះថោកឬច្រកចេញមិនលំនឹង។ ហេតុនេះ សមាគមក៏បានចលនាបងប្អូននារីចូលក្រុមសហការ ដើម្បីមានលក្ខណៈជួយគ្នាអំពីដើមទុន ពូជ បច្ចេកទេសនិងបទពិសោធន៍ក្នុងការផលិត។ ពេលមានទីបង្អែករឹងមាំ បងប្អូននារីមិនញញើតលើការវិនិយោគដាំដំណាំ រៀនសូត្រពីគ្នាទៅវិញទៅមកពីរបៀបធ្វើមានប្រសិទ្ធភាព។ អាស្រ័យហេតុនោះ ជីវភាពរបស់សមាជិកាជាជំហានៗបានលើកស្ទួយ"។

ចូលរួមក្រុមសហការ សមាជិកាទទួលបានការណែនាំពីបច្ចេកទេសដាំដុះតាមទិសដៅសុវត្ថិភាព ដាំឆ្លាស់ ដាំផ្លាស់ប្តូរដំណាំជាច្រើនប្រភេទលើផ្ទៃដីតែមួយ។ ការដាំផ្លាស់ប្តូរដំណាំតាមរដូវកាល ជួយកាត់បន្ថយជំងឺនិងសត្វល្អិតបំផ្លាញ បន្ថយចំណាយនិងទាញយកផលពីផ្ទៃដីផលិតយ៉ាងមានប្រសិទ្ធភាព។ ទន្ទឹមនឹងនោះ បានហ្វឹកហាត់ពីរបៀបប្រើប្រាស់ជីសរីរាង្គ បន្ថយប្រើថ្នាំការពាររុក្ខជាតិ ឆ្ពោះទៅរកផលិតផលសុវត្ថិភាព។ បងស្រីហ្វិញធីម៉ាស៊ី សមាជិកក្រុមសហការ ឱ្យដឹង៖ "ពីមុន ស្ថានភាពគ្រួសារខ្ញុំជួបការលំបាក ដូច្នេះ ដើម្បីមានដើមទុនវិនិយោគសម្រាប់ការដាំដុះ ខ្ញុំត្រូវទៅបុលខ្ចីខាងក្រៅ ម៉្លោះហើយជួបការលំបាក មិនសូវហ៊ានវិនិយោគក្នុងការផលិត។តាំងពីបានចូលក្រុមសហការ ទទួលបានការណែនាំពីរបៀបដាំដុះ ជួយដើមទុនគ្នាទៅវិញទៅមក ទើបខ្ញុំមិនញញើតក្នុងការវិនិយោគ។ ជាច្រើនឆ្នាំមកនេះ ខ្ញុំដាំឆ្លាស់ដំណាំម្រះ ស្ពៃខៀវ ខ្ទឹមស្លឹក។ល។ ដោយឡែករដូវកន្លង ខ្ញុំដាំម្រះ២កុង លក់ក្នុងតម្លៃពី១០.០០០ដុង ដល់១៣.០០០ដុងក្នុងមួយគីឡូក្រាម បន្ទាប់ពីទូទាត់ចំណាយ នៅចំណេញជិត១០០លានដុង។ ឥឡូវ ដាំដំណាំមានប្រាក់ចំណូលជុំឆ្នាំ ទើបគ្រួសារខ្ញុំមានជីវភាពធូរធារប្រសើរជាងមុន"។

មិនចំពោះតែបងស្រីម៉ាស៊ី បងស្រីស៊ើងធីណារ៉ា ក៏បានឈានឡើងចាកផុតពីភាពក្រីក្រ អាស្រ័យចូលក្រុមសហការដាំដំណាំ។ តាមសម្តីបងស្រីណារ៉ា ពីមុន គ្រួសារគាត់ជួបការលំបាក ខ្វះដើមទុនក្នុងការផលិត។ តាំងពីបានចូលក្រុមសហការ ប្រភពទុនហ៊ុនគ្នាបង្វិលជុំរវាងសមាជិកា បានជួយគាត់មានលក្ខណៈវិនិយោគលើការដាំដុះ។ បងស្រីណារ៉ា ឱ្យដឹង៖ "ចូលក្រុមសហការ ក្រៅពីជួយដើមទុនគ្នាសម្រាប់ការអភិវឌ្ឍសេដ្ឋកិច្ច បងប្អូននារីនៅទាំងចែករំលែកបទពិសោធន៍ និងទទួលបានការណែនាំពីរបៀបដាំដំណាំច្រើនប្រភេទលើផ្ទៃដីតែមួយ ដូច្នេះ គ្រួសារខ្ញុំមានប្រាក់ចំណូលទៀងទាត់។ សព្វថ្ងៃ ខ្ញុំដាំដំណាំរួមផ្សំលើផ្ទៃដី២កុង មានដូច៖ ផ្ទី សណ្តែកកួរ ខ្ទឹមស្លឹក។ល។ រដូវកន្លង គ្រួសារខ្ញុំដាំម្រះបានផលច្រើន លក់បានថ្លៃ បន្ទាប់ពីទូទាត់ចំណាយ នៅចំណេញជាង៨០លានដុង"។

ជារៀងរាល់ខែសមាជិកាក្រុមសហការប្រជុំគ្នានិងហ៊ុនទុនបង្វិលជុំ ដើម្បីជួយគ្នាអភិវឌ្ឍសេដ្ឋកិច្ច។

តាមសម្តីបងស្រីត្រឹងធីសានី ប្រធានក្រុមសហការ ដើម្បីលើកកម្ពស់ប្រសិទ្ធភាពការផលិត សមាជិកាក្រុមសហការតែងដោះដូរបទពិសោធន៍ជារឿយៗ ព្រមទាំងបានកម្មាភិបាលជំនាញជួយណែនាំពីបច្ចេកទេសជ្រើសរើសពូជ របៀបថែទាំនិងបង្ការកម្ចាត់ជំងឺនិងសត្វល្អិត។ ម្យ៉ាងទៀត ក្រុមសហការនៅទាំងចងសម្ព័ន្ធជាមួយឈ្មួញប្រមូលទិញកសិផលរបស់សមាជិកា ដូច្នេះ ធានាច្រកចេញលំនឹង សមាជិកាស្ងប់ចិត្តក្នុងការផលិត។បងស្រីសានី ចែករំលែក៖ "ផ្តើមពីមានសមាជិកា១០នាក់ កាលទើបបង្កើត ឥឡូវក្រុមសហការមានសមាជិកាដល់ទៅ១៤នាក់។ ដំបូង ក្នុងក្រុមសហការមានគ្រួសារក្រីក្រចំនួន៤គ្រួសារ មកដល់បច្ចុប្បន្ន គ្រួសារទាំងនោះបានចាកផុតពីភាពក្រីក្រ មានជីវភាពធូរធារនិងវិនិយោគលើការផលិតជាបន្ត។ពិសេស សមាជិកាក្រុមសហការនៅទាំងអនុវត្តទម្រង់ "ចិញ្ចឹមជ្រូកដី ទិញប័ណ្ណធានារ៉ាប់រងសង្គម" ដូច្នេះ សមាជិកាទាំងអស់ សុទ្ធតែបានចូលរួមធានារ៉ាប់រងសង្គម ស្ងប់ចិត្តពេលវ័យចាស់"។

ផ្តើមពីវាលស្រែដាំដំណាំឆ្លាស់គ្នាតាមរដូវកាល ក្រុមសហការក៏បានបង្កើតរបៀបធ្វើថ្មីក្នុងការផលិតរបស់នារីខ្មែរនៅឡាយហ្វា។ មិនត្រឹមតែជួយបងប្អូននារីមានប្រភពប្រាក់ចំណូល ចំណេះដឹងនិងបទពិសោធន៍បន្ថែម ទម្រង់នេះ នៅទាំងពង្រីកស្មារតីសាមគ្គី ជួយគ្នាទៅវិញទៅមក រួមគ្នាអភិវឌ្ឍសេដ្ឋកិច្ច។ ផ្តើមពីនោះ ក្រុមសហការបន្តក្លាយជាទីបង្អែក ដើម្បីនារីខ្មែរម្ចាស់ការក្នុងការផលិត បង្កើនប្រាក់ចំណូល ជាជំហានៗកសាងគ្រួសារកាន់តែមានជីវភាពលំនឹង សម្បូរសប្បាយពីមួយថ្ងៃទៅមួយថ្ងៃ៕

យ្វីអាញ-មុនី

ចែករំលែកអត្ថបទ

ពាក្យគន្លឹះ