គោលនយោបាយ -ការរស់នៅ ការរស់នៅ

30/07/2026 - 21:54

ចិញ្ចឹមទាកាប៉ាយកស៊ុត ទិសដៅបង្កើនប្រាក់ចំណូលលំនឹង

ឆ្លៀតប្រើប្រាស់អស់ពីលទ្ធភាពប្រៀបខ្លាំងចិញ្ចឹមសត្វនិងតម្រូវការទីផ្សារ គ្រួសារប្រជាជនជាច្រើននៅសង្កាត់ឡុងឌឹក បានបង្វែរមកចិញ្ចឹមទាកាប៉ាយកស៊ុត នាំមកប្រភពចំណូលលំនឹង។ ផ្តើមពីទម្រង់នេះ មានគ្រួសារខ្លះជាជំហានកែលម្អជីវភាព និងបើកទិសដៅអភិវឌ្ឍសេដ្ឋកិច្ចសមស្របតាមលក្ខណៈភូមិភាគ។

ប៉ុន្មានឆ្នាំជិតៗនេះ ទម្រង់ចិញ្ចឹមទាកាប៉ាយកស៊ុតកំពុងពង្រីកបានប្រសិទ្ធភាពនៅសង្កាត់ឡុងឌឹក។ បច្ចុប្បន្ន ទូទាំងសង្កាត់មាន ១២ គ្រួសារចូលរួមចិញ្ចឹម រួមចំណែកធ្វើឱ្យសម្បូរបែបទម្រង់ផលិត និងលើកកម្ពស់ប្រាក់ចំណូលដល់ប្រជាជន។ ក្នុងនោះ គ្រួសារបង ង្វៀង ក្វឹកថិន នៅអនុសង្កាត់ភូហ្វា សង្កាត់ឡុងឌឹក ខេត្តវិញឡុង គឺជាគ្រួសារមួយក្នុងចំណោមគ្រួសារដែលផ្សារភ្ជាប់ជោគជ័យជាមួយទម្រង់នេះ។ កាលពីមុន សំខាន់បងចិញ្ចឹមមាន់សាច់និងមាន់យកស៊ុត។ ថ្វីដ្បិតតែដូច្នោះ ដោយសារប្រសិទ្ធភាពសេដ្ឋកិច្ចមិនបានលំនឹង ចំណាយទិញចូលកើនឡើង ខណៈពេលដែលតម្លៃលក់មានការប្រែប្រួលញឹកញាប់ បងបានសម្រេចចិត្តបង្វែរមកចិញ្ចឹមទាកាប៉ាយកស៊ុតវិញ។ បច្ចុប្បន្ន គ្រួសារបងចិញ្ចឹមទាកាប៉ាញីប្រមាណ ១.០០០ ក្បាល។

បង ង្វៀងក្វឹកថិន (ឆ្វេង) រួមជាមួយកម្មាភិបាលសមាគមកសិករសង្កាត់ឡុងឌឹក ទស្សនាកន្លែងចិញ្ចឹមទាកាប៉ាយកស៊ុត។

បើតាមបងថិន ទោះបីជាដើមទុនវិនិយោគដំបូងចំនួនច្រើនក៏ពិតមែន ប៉ុន្តែទទួលបានប្រភពចំណូលលំនឹង។ ក្រោយពីចិញ្ចឹមបានប្រហែល ៦ ខែ ទាចាប់ផ្តើមពង។ ចាប់ពីខែទី ៧ ទៅ ទិន្នផលកើនឡើងនិងលំនឹង។ ជារៀងរាល់ថ្ងៃ ហ្វូងទាផ្តល់ស៊ុតបានប្រហែល ៥០០ - ៦០០ ទៅតាមដំណាក់កាលបន្តពូជ សំខាន់ផ្គត់ផ្គង់ឱ្យឡភ្ញាស់កូន ក្នុងតម្លៃលក់ចាប់ពី ៥០.០០០ - ៧០.០០០ ដុង/ស៊ុតដប់) ប៉ុន្តែតិចណាស់ធ្លាក់ចុះក្រោម ៥០០០០ ដុង/ស៊ុតដប់។ ដោយសារច្រកចេញបានលំនឹង គ្រួសាររកបានប្រាក់ចំណូលជាប្រចាំសម្រាប់ទ្រទ្រង់ជីវភាព និងវិនិយោគឡើងវិញលើផលិត។

ដើម្បីទទួលបានទិន្នផលខ្ពស់ បងថិនយកចិត្តទុកដាក់ពិសេសលើការថែទាំ និងបង្ការជំងឺ។ លើផ្ទៃដីប្រមាណ ៤០០ ម៉ែត្រការ៉េ បងរៀបចំទ្រុងចិញ្ចឹមទំហំប្រហែល ២០០ ម៉ែត្រការ៉េ ដោយធានាទីស្ងួត ស្អាតបាត និងមានខ្យល់ចេញចូលជានិច្ច។ ទន្ទឹមនឹងនោះ មានអាងទឹកស៊ីម៉ង់ត៍ទំហំប្រហែល ៤ x ៥ ម៉ែត្រ សម្រាប់ទាលេងទឹក និងទីធ្លាសម្រាប់ទាធ្វើចលនា។ ចំណីត្រូវបានលាយបញ្ចូលគ្នាជាមួយកន្ទក់ឧស្សាហកម្មនឹងដើមចេក និងប្រភេទចំណីបៃតង សំដៅបន្ថយចំណាយ ប៉ុន្តែនៅតែធានាអាហាររូបត្ថម្ភ។ ហ្វូងទាបានចាក់ថ្នាំបង្ការគ្រប់សព្វរាល់ប្រភេទវ៉ាក់សាំងការពារជំងឺផ្តាសាយបក្សី និងរោគកកឈាម; ទ្រុងចិញ្ចឹមបានបាញ់ថ្នាំសម្លាប់មេរោគតាមកាលកំណត់ ហើយបាតទ្រុងត្រូវបានទ្រាប់ដោយអង្កាម និងកម្ទេចដូងដើម្បីរក្សាភាពស្ងួត និងកាត់បន្ថយមេរោគ។ ដោយសារអនុវត្តត្រូវតាមបច្ចេកទេស ហ្វូងទាមានសុខភាពល្អ អត្រាពងបានលំនឹង នាំមកប្រភពចំណូលរាប់សិបលានដុងក្នុងមួយឆ្នាំៗ។

មិនត្រឹមតែធ្វើសេដ្ឋកិច្ចមានប្រសិទ្ធភាពប៉ុណ្ណោះទេ បងថិនថែមទាំងស្ម័គ្រចិត្តចែករំលែកបទពិសោធន៍ជាមួយសមាជិកក្រុមចិញ្ចឹមសត្វក្នុងអនុសង្កាត់ទៀតផង។ ចាប់ពីការសង់ទ្រុង ការលាយចំណី រហូតដល់ដំណើរការការពារជំងឺ សុទ្ធតែបានបងណែនាំអស់ពីចិត្ត ជួយឱ្យគ្រួសារជាច្រើនហ៊ានបង្វែរមកចិញ្ចឹមសត្វ។

លោក ហឿវ៉ាំងកឹង ប្រធានសមាគមកសិករសង្កាត់ឡុងឌឹក ឱ្យដឹង៖ បងង្វៀងក្វឹកថិន គឺជាសមាជិក សកម្ម តែងក្លាហានអនុវត្តទម្រង់ចិញ្ចឹមសត្វថ្មីៗ។ ទម្រង់ចិញ្ចឹមទាកាប៉ាយកស៊ុត មិនត្រឹមតែនាំមកប្រាក់ចំណូលលំនឹងសម្រាប់គ្រួសារប៉ុណ្ណោះទេ ថែមទាំងបង្កកម្លាំងរីកសាយភាយក្នុងសហគមន៍ទៀតផង។ សមាជិកជាច្រើនបានមកទស្សនា រៀនសូត្របទពិសោធន៍ដើម្បីយកទៅអនុវត្តក្នុងការផលិត។ រយៈពេលខាងមុខ សមាគមកសិករសង្កាត់ឡុងឌឹក នឹងបន្តគាំទ្រសមាជិកអភិវឌ្ឍទម្រង់ផលិតសមស្រប ក្នុងនោះមានទម្រង់ដាំក្រូចឆ្មារគ្មានគ្រាប់ បង្កលក្ខណៈដើម្បីប្រជាជន ជាពិសេសជនរួមជាតិខ្មែរលើភូមិឋាន លើកកម្ពស់ប្រាក់ចំណូល និងលំនឹងជីវភាព៕

ទីទុយ - លីសៀ

ចែករំលែកអត្ថបទ

ពាក្យគន្លឹះ