មហាសាមគ្គីជនជាតិ ភូមិស្រុកផ្លាស់ថ្មី

13/08/2025 - 09:35

រកបានប្រាក់ចំណូលលំនឹងពីការដាំជីររណា

កសិករខ្មែរជាច្រើននៅសង្កាត់សុកត្រាំង ក្រុងកឹងធើ រកបានប្រាក់ចំណូលលំនឹងពីការដាំជីររណាតាមបែបសរីរាង្គ។ នេះត្រូវបានចាត់ជាទម្រង់ផ្តល់ប្រសិទ្ធភាពសេដ្ឋកិច្ចខ្ពស់ ចំណាយដើមទុនតិច ហើយទីផ្សារក៏មានភាពលំនឹង។

ដាំជីររណាជួយកសិករខ្មែរ រកបានប្រាក់ចំណូលលំនឹង។

ក្រុមសហការជីររណាសរីរាង្គស្ថិតនៅអនុសង្កាត់ទី ៦ សង្កាត់សុកត្រាំង បានបង្កើតឡើងដោយមានសមាជិក ១៥ នាក់ ដាំលើផ្ទៃដីជាង ៣ ហិកតា។ សមាជិកចូលរួមក្រុមសហការបានហ្វឹកហាត់ផ្ទេរជូនវិទ្យាសាស្ត្របច្ចេកទេស ផ្ដល់ព័ត៌មានអំពីរដូវកាលដាំដុះ តម្លៃទីផ្សារនិងច្រកចេញនៃផលិតផល។ ទន្ទឹមនឹងនោះ សមាគមកសិករសង្កាត់ក៏បានជំនួយពូជ បច្ចេកទេសថែទាំ សម្ភារៈកសិកម្មជីសរីរាង្គ។ បងដៀងដេន ប្រធានក្រុមសហការជីររណាសរីរាង្គ ឱ្យដឹង៖ “ខ្ញុំដាំជីររណា២កុង មិនសូវចំណាយកម្លាំងមើលថែ ចំណេញក៏បង្គួរ ថែមទាំងអាចប្រើប្រាស់ស្លឹកជីរដែលចោលធ្វើជាចំណីឱ្យគោទៀតផង។ ដាំជីររណាតាមបែបសរីរាង្គធ្វើឱ្យដីផុស មិនសូវបង់ជីគីមី តិចមានសត្វល្អិតនិងជំងឺ ប៉ុន្តែជីររណានៅតែលូតលាស់ល្អ ផ្តល់ទិន្នផលខ្ពស់។ ក្នុងមួយឆ្នាំខ្ញុំប្រមូលផលជីររណា៣លើក ក្នុងនោះប្រមូលផលស្លឹក២លើក និងប្រមូលផលគ្រាប់១លើក”។ បើតាមបងដេន ស្លឹកជីររណាផ្តល់ទិន្នផលប្រមាណ ៣,៥ តោន/កុង/រដូវ លក់ក្នុងតម្លៃពី ១៥.០០០ - ២០.០០០ ដុងក្នុងមួយគីឡូក្រាម រីឯគ្រាប់ប្រមូលផលប្រមាណ៧០គីឡូក្រាមក្នុងមួយកុង លក់តម្លៃជាង ៣០០.០០០ ដុងក្នុងមួយគីឡូក្រាម។ ក្រៅពីនេះ បងដេន នៅទាំងប្រើប្រាស់ស្លឹកជីររណាដែលចោល លាងជ្រះធ្វើជាចំណីឱ្យគោដើម្បីយកលាមកគោផ្អាប់ធ្វើជីសរីរាង្គសម្រាប់ដាំដុះទៀតផង។

ទម្រង់ដាំជីររណារបស់គ្រួសារបងដៀងដេន រកបានប្រាក់ចំណូលលំនឹង។

កសិករខ្លះទៀតបានលើកឡើងថា ការដាំជីររណាតាមបែបសរីរាង្គកាត់បន្ថយការចំណាយ ធ្វើឱ្យដីមានជីជាតិ បង្កើនទិន្នផលនិងគុណភាព។ ក្នុងដំណាក់កាលដាំ ភាគច្រើនគឺប្រើប្រាស់ជីសរីរាង្គ កាត់បន្ថយការចំណាយលើជីគីមី; ពេលមានសត្វល្អិតនិងជំងឺ គឺប្រើប្រាស់ថ្នាំជីវសាស្ត្រត្រូវតាមបែបបទ ម្ល៉ោះហើយបន្លែធានាសុវត្ថិភាពអនាម័យ ចំណីអាហារ អតិថិជននិយមចូលចិត្ត និងបានឈ្មួញមកស្វែងរកទិញ។ បងហ្វិញវុាំងល្វឹង សមាជិកក្រុមសហការជីររណា បានបង្វែរដី២កុង ដែលផ្តល់ទិន្នផលទាបមកដាំជីររណារកបានប្រាក់ចំណូលលំនឹង បងល្វឹង ឱ្យដឹង៖ “ចូលក្រុមសហការបានរៀនសូត្របច្ចេកទេស របៀបដាក់ជី ថែទាំនិងវិធីផ្អាប់ជីសរីរាង្គ៘ ដាំជីររណាតាមបែបសរីរាង្គគឺចំណាយដើមទុនតិច មិនសូវចំណាយកម្លាំងថែទាំ ប៉ុន្តែចំណេញច្រើន។ ជីររណាដាំក្នុងរយៈពេលប្រមាណ ៣ ខែគឺអាចនឹងប្រមូលផលបាន។ ក្នុងមួយឆ្នាំ ខ្ញុំប្រមូលផលបាន៣លើក ក្នុងនោះ ប្រមូលផលស្លឹក២លើកនិងគ្រាប់១លើក។ ដាំជីររណារកបានប្រាក់ចំណូលលំនឹងច្រើនជាងបើប្រៀបធៀបនឹងផលិតស្រូវ”។

តាមបទពិសោធន៍របស់កសិករដែលដាំជីររណា ក្រោយពីប្រមូលផលស្លឹករួចស្រេច កូនជីរណាតូចៗចាប់ផ្ដើមដុះឡើង ម្ល៉ោះហើយយើងត្រូវថែទាំកូនជីរតូចៗដើម្បីយកគ្រាប់ធ្វើពូជសម្រាប់ដាំរដូវបន្ត ឬក៏លក់ក្នុងតម្លៃជាង ៣០០.០០០ ដុងក្នុងមួយគីឡូក្រាម។ អាចនិយាយបានថា ទម្រង់សហការជីររណាសរីរាង្គនៅសង្កាត់សុកត្រាំង ជាទម្រង់មួយដែលមានប្រសិទ្ធភាព រួមចំណែកលើកកម្ពស់តម្លៃ បង្កបង្កើនផលលើផ្ទៃដីតែមួយនិងលើកស្ទួយប្រាក់ចំណូលជួយកសិករលំនឹងជីវភាព៕

យ្វីអាញ- លីសៀ

ចែករំលែកអត្ថបទ

ពាក្យគន្លឹះ