មហាសាមគ្គីជនជាតិ គំរូក្នុងសហគមន៍

26/10/2026 - 19:59

អ្នកគ្រូគាងធីដេ អស់ពីចិត្តនឹងបុព្វហេតុអប់រំនៅតំបន់ជនរួមជាតិ

ជាង១៦ឆ្នាំផ្សារភ្ជាប់នឹងអាជីពគ្រូបង្រៀន អ្នកគ្រូគាងធីដេ គ្រូបង្រៀននៅសាលាអនុវិទ្យាល័យជនជាតិអន្តេវាសិកង៉ូវឡាក់ (ឃុំង៉ូវឡាក់ ខេត្តវិញឡុង) តែងទទួលបានការស្រឡាញ់របស់សិស្ស ការទំនុកចិត្តរបស់អាណាព្យាបាលសិស្សនិងការគោរពពីមិត្តរួមអាជីព។

អ្នកគ្រូគាងធីដេ ជាគ្រូបង្រៀនគំរូ។

តភ្ជាប់ក្តីប្រាថ្នាគរុកោសល្យ

តាំងពីកុមារ អ្នកគ្រូគាងធីដេ បានចិញ្ចឹមក្តីប្រាថ្នាធ្វើជាគ្រូបង្រៀន ដើម្បីផ្តល់ចំណេះដឹងដល់សិស្សគ្រប់ជំនាន់។ ឆ្នាំ២០១០ បន្ទាប់ពីបញ្ចប់ការសិក្សាសញ្ញាបត្រគរុកោសល្យជីវវិទ្យា (សាកលវិទ្យាល័យកឹងធើ) អ្នកគ្រូបានចាត់មកបំពេញការងារនៅសាលាអនុវិទ្យាល័យជនជាតិអន្តេវាសិកង៉ូវឡាក់។ នៅទីនេះ អ្នកគ្រូបានចាត់ឱ្យបង្រៀនវិញ្ញាសាវិទ្យាសាស្ត្រធម្មជាតិ (ប្រធានបទរូបវិទ្យា) ព្រមទាំងទទួលបន្ទុកការងារសម្ព័ន្ធយុវជន និងជាប្រធានក្រុមវិញ្ញាសាវិទ្យាសាស្ត្រធម្មជាតិ។

សាលាអនុវិទ្យាល័យជនជាតិអន្តេវាសិកង៉ូវឡាក់ គឺជាសាលាពិសេសដែលមានសិស្ស ១០០% ជាជនជាតិខ្មែរ។ យល់ច្បាស់ពីលក្ខណៈពិសេសរបស់សិស្សអន្តេវាសិក អ្នកគ្រូគាងធីដេ តែងសិក្សាស្រាវជ្រាវ ផ្លាស់ថ្មីវិធីសាស្ត្របង្រៀនឱ្យសមស្របនឹងលក្ខណៈជាក់ស្តែង។ នៅរាល់ម៉ោងសិក្សា អ្នកគ្រូតែងប្រើប្រាស់រូបភាពតំណាងដ៏រស់រវើកពីកាសែតនិងទស្សនាវដ្តី ព្រមទាំងណែនាំសិស្សពីរបៀបស្វែងរកឯកសារថ្មីៗ ដើម្បីប្អូនៗងាយយល់មេរៀន។

ចែករំលែកពីការងាររបស់ខ្លួន អ្នកគ្រូគាងធីដេ ឱ្យដឹង៖ "ខ្ញុំតែងតែគិតក្នុងចិត្តជានិច្ច ធ្វើម្តេចរាល់ពេលចូលបង្ហាត់ សុទ្ធតែជាម៉ោងសិក្សាល្អ ទាក់ទាញចំណាប់អារម្មណ៍សិស្ស។ យោងតាមសមត្ថភាពរបស់សិស្សម្នាក់ៗ ខ្ញុំសិក្សាអនុវត្តនូវវិធីសាស្ត្របង្រៀនដោយភាពបត់បែន ជួយឱ្យម៉ោងសិក្សារស់រវើក ប្រកបដោយភាពច្នៃប្រតិដ្ឋ ធ្វើឱ្យសិស្សចងចាំបានយូរជាង។ ការចេះស្ទាត់ទាំងភាសាវៀតណាមនិងភាសាខ្មែរ ក៏បានជួយខ្ញុំយ៉ាងច្រើនក្នុងការប្រាស្រ័យទាក់ទងនិងការផ្តល់ចំណេះដឹងដល់ប្អូនៗ"។

ម៉ោងសិក្សាវិញ្ញាសាវិទ្យាសាស្ត្រធម្មជាតិ បង្ហាត់ដោយអ្នកគ្រូគាងធីដេ។

គំរូគ្រូបង្រៀនឆ្នើម

អាស្រ័យមានវិធីសាស្ត្របង្រៀនងាយយល់ គួបផ្សំយ៉ាងស្អិតល្មួតរវាង "រៀនបណ្តើរ អនុវត្តបណ្ដើរ" ម៉ោងសិក្សារបស់អ្នកគ្រូគាងធីដេ តែងពោពេញដោយភាពសប្បាយរីករាយនិងទាក់ទាញ។

ប្អូនស៊ើងឌិញង្វៀង សិស្សថ្នាក់ទី៩/១ ចែករំលែកដោយក្តីរំភើបចិត្ត៖ "អាស្រ័យវិធីសាស្ត្របង្រៀនដ៏ងាយយល់របស់អ្នកគ្រូដេ ម៉្លោះហើយ ប្អូនរឹតតែស្រឡាញ់ចូលចិត្តវិញ្ញាសាវិទ្យាសាស្ត្រធម្មជាតិ។ មិនត្រឹមតែផ្តល់ចំណេះដឹងនិងបំណិនប៉ុណ្ណោះទេ អ្នកគ្រូនៅទាំងបង្រៀនយើងខ្ញុំពីរបៀបរស់នៅមានរបៀបរៀបរយ ចេះស្រឡាញ់គ្នា មានការទទួលខុសត្រូវចំពោះគ្រួសារនិងសង្គម"។

អ្នកគ្រូគាងធីដែ កំពុងណែនាំសិស្ស។

មិនត្រឹមតែអនុវត្តសម្រេចឆ្នើមភារកិច្ចជំនាញវិជ្ជាជីវៈ អ្នកគ្រូដេនៅទាំងជាទីបង្អែកខាងស្មារតី តែងជិតដិត យកចិត្តទុកដាក់និងថែទាំសិស្សអន្តេវាសិករស់នៅឆ្ងាយផ្ទះ។

វាយតម្លៃពីការលះបង់របស់មិត្តរួមអាជីព លោកគ្រូ លីង៉ុកទ្រឿង ចាងហ្វាងសាលាអនុវិទ្យាល័យជនជាតិអន្តេវាសិកង៉ូវឡាក់ បញ្ជាក់៖ "អ្នកគ្រូគាងធីដេ ជាគ្រូបង្រៀនមួយរូបដែលមានការទទួលខុសត្រូវខ្ពស់ អស់ពីចិត្តនឹងអាជីព តែងខិតខំប្រឹងប្រែងអស់ពីសមត្ថភាពក្នុងការបង្ហាត់បង្រៀននិងការអប់រំដល់សិស្ស។ អ្នកគ្រូតែងយកចិត្តទុកដាក់ពិសេស ជិតដិត ជួយឧបត្ថម្ភទាន់ពេលដល់សិស្សជនជាតិភាគតិចដែលរស់នៅនិងរៀនសូត្រនៅក្នុងសាលា។ ជាច្រើនឆ្នាំបន្តបន្ទាប់ អ្នកគ្រូដែបានវាយតម្លៃជាបុគ្គលិកអនុវត្តសម្រេចឆ្នើមភារកិច្ចនិងសម្រេចបានកិតិ្តនាមយុទ្ធជនប្រឡងប្រណាំងថ្នាក់មូលដ្ឋាន។ នេះគឺជាការទទួលស្គាល់ដ៏ស័ក្តិ សមបំផុតសម្រាប់ការខិតខំប្រឹងប្រែងដោយអស់ពីចិត្តរបស់អ្នកគ្រូ។ អ្នកគ្រូ ជាគ្រូបង្រៀនគំរូឆ្នើម រួមចំណែកធ្វើឱ្យសាយភាពស្មារតីស្រឡាញ់អាជីព ស្មារតីទទួលខុសត្រូវនិងតម្លៃល្អប្រពៃក្នុងចលនាផ្លាស់ថ្មីការអប់រំនៅក្នុងសាលារៀន"៕

ស៊ើងម៉ាល័យ-មុនី

ចែករំលែកអត្ថបទ

ពាក្យគន្លឹះ