ដោយសារមានកម្មវិធី គម្រោងជាច្រើន ទើបតំបន់ជនរួមជាតិភាគតិចនៅវាលរាបទន្លេគឺវឡុង មានភាពវិវឌ្ឍដោយឥតឈប់ឈរ។ ស្របទៅនឹងការអភិវឌ្ឍរួម គឺគុណភាពអប់រំបានលើកកម្ពស់យ៉ាងពិតប្រាកដ ធ្វើជាមូលដ្ឋានគ្រឹះដល់ការកសាងប្រភពធនធានមនុស្សគុណភាពខ្ពស់ជាជនរួមជាតិភាគតិច ដើម្បីអនុវត្តឧស្សាហូបនីយកម្ម ភាវូបនីយកម្មទំនើបប្រទេសជាតិ។
កុមារមតេ្តយ្យនៅឃុំតឹងមី ស្រុកត្រាអូង ខេត្តវិញឡុង រីករាយឈានចូលឆ្នាំសិក្សាថ្មី
ក្នុងសាលារៀនសម្រេចបទដ្ឋានជាតិ។
នៅស្រុកហ្គក្វាវ ខេត្តគៀងយ៉ាង ការអប់រំនិងបណ្តុះបណ្តាលចំពោះជនរួមជាតិភាគតិច ត្រូវបានគ្រប់ថ្នាក់គ្រប់ផ្នែករបស់ស្រុកយកចិត្តទុកដាក់។ អាស្រ័យហេតុនោះ សាលារៀនបន្ទប់រៀននៅតំបន់ជនរួមជាតិភាគតិចត្រូវបានវិនិយោគកសាងជាសារវន្ត អាចឆ្លើយតបនឹងតម្រូវការបង្រៀននិងរៀន។ តាមប្រសាសន៍លោក ឡេកីមខ្វា អនុប្រធានគណៈកម្មាធិការប្រជាជនស្រុកហ្គក្វាវ តាំងពីមូលដ្ឋាន សម្ភារៈសាលារៀន ត្រូវបានវិនិយោគកសាងយ៉ាងសមរម្យ អត្រាកៀរគរសិស្សជនជាតិភាគតិចចូលរៀនកើនឡើងជារៀងរាល់ឆ្នាំ។ ខណៈពេលគ្រប់កម្រិតសិក្សាមូលដ្ឋានបានលើកកម្ពស់ គុណភាពចំនួនសិស្សចូលរៀនមហាវិទ្យាល័យ អនុមហាវិទ្យាល័យក៏កើនឡើងច្រើនដែរ។ មកទល់ពេលនេះ ឃុំនិងទីប្រជុំជនដែលមានជនរួមជាតិភាគតិចរស់នៅកុះករ សុទ្ធតែសម្រេចបទដ្ឋានជាតិអំពីឧត្តានកម្មអប់រំបឋមសិក្សា ឧត្តានកម្មអនុវិទ្យាល័យ និងបំបាត់អនក្ខរភាព។ ភូមិភាគនានានៅតំបន់ជនជាតិភាគតិច មានសាលារៀនចំនួន១៩/២៤ បានសម្រេចបទដ្ឋានជាតិ។ បច្ចុប្បន្ន ទូទាំងស្រុកមានគ្រូបង្រៀនជាជនជាតិភាគតិចចំនួន៣៣០/១.៣៤៣នាក់ កំពុងបំពេញការងារ និងបង្ហាត់បង្រៀននៅតាមសាលានានាលើភូមិសាស្រ្តស្រុកស្រូបអត្រា ២៤,៥% បើប្រៀបនឹងចំនួនកម្មាភិបាល គ្រូបង្រៀនរបស់សាលាទាំងអស់ (គិតពីកម្រិតមត្តេយ្យដល់អនុវិទ្យាល័យ)។ ក្រៅពីបង្រៀនអក្សរខ្មែរនៅអនុវិទ្យាល័យជនជាតិអន្តេវាសិក ហ្គក្វាវ ឃុំនិងផ្នែកសមត្ថកិច្ចនៅទាំងបង្កលក្ខណៈ ឧបត្ថម្ភដល់សមាគមព្រះសង្ឃសាមគ្គីស្នេហាជាតិស្រុក រៀបចំបើកថ្នាក់បង្រៀនអក្សរខ្មែរក្នុងរដូវវិស្សមកាលនៅតាមវត្តអារាម និងភូមិដែលមានជនរួមជាតិខ្មែររស់នៅកុះករទៀតផង។ នៅរដូវវិស្សមកាលឆ្នាំសិក្សា ២០២៣-២០២៤ ទូទាំងស្រុកមានទីតាំងបើកបង្រៀនអក្សរខ្មែរចំនួន១២កន្លែង ចាប់ពីថ្នាក់ទី៣ រហូតដល់ថ្នាក់ទី ៨ រួមមាន១៩៧បន្ទប់ មានសិស្សចូលរៀនចំនួន ៦.៣៥២នាក់។
លោកថាច់យឿង នាយកមន្ទីរសាសនា- ជនជាតិខេត្តវិញឡុង ឱ្យដឹង ប្រព័ន្ធគ្រឹះស្ថានអប់រំនៅតំបន់ជនជាតិលើភូមិសាស្រ្តខេត្តអភិវឌ្ឍគ្រប់ទីកន្លែង មូលដ្ឋានសម្ភារៈបានវិនិយោគបង្កើនកម្រិត គុណភាពអប់រំសន្សឹមៗបានលើកកម្ពស់។ បច្ចុប្បន្ន ទូទាំងខេត្តមានសាលាមត្តេយ្យចំនួន ១២៨ សាលាបឋមសិក្សាចំនួន១៣៥ អនុវិទ្យាល័យចំនួន៨៣ វិទ្យាល័យចំនួន៣៤ និងវិទ្យាល័យជនជាតិអន្តេវាសិកខេត្តមួយ។ ក្នុងនោះ មានសាលាចំនួន១៤/២០ ចំណុះឃុំតំបន់ជនរួមជាតិភាគតិចបានសម្រេចបទដ្ឋានជាតិ ស្រូបអត្រា៧០%។ ការងារបំបាត់អនក្ខរភាព ឧត្តានកម្មអប់រំ និងបង្រៀនភាសាជនជាតិភាគតិច ត្រូវបានយកចិត្តទុកដាក់ផ្សព្វផ្សាយ ទទួលបានលទ្ធផលជាវិជ្ជមាន និងបានសង្គមឯកភាពវាយតម្លៃខ្ពស់។
នៅក្រុងកឹងធើ គម្រោងអភិវឌ្ឍអប់រំនៅតំបន់មានជនរួមជាតិភាគតិចរស់នៅកុះករកំពុងផ្សព្វផ្សាយអនុវត្តបានល្អប្រសើរ។ ជាក់ស្ដែងដូច ជាការបង្កើនកម្រិតមូលដ្ឋានសម្ភារៈនៅសាលាជនជាតិអន្តេវាសិកក្រុងកឹងធើ។ អ្នកគ្រូដាវធីសារ៉ន នាយករងសាលាជនជាតិអន្តេវាសិកក្រុងកឹងធើ ឱ្យដឹង៖ “ដើម្បីមានទីធ្លាលេងកម្សាន្ត និងកន្លែងរៀនសូត្រដល់សិស្សសាលាបានក្រុង ផ្តល់ថវិកាកែលម្អទីធ្លាសាលា និងសាងសង់បន្ទប់រៀនថ្មី គិតជាទឹកប្រាក់រាប់សិបពាន់លានដុង។ បន្ទាប់ពីជួរបន្ទប់រៀនបានដាក់ឱ្យប្រើប្រាស់ សាលានឹងឆ្លើយតបគ្រប់សព្វអំពីមូលដ្ឋានសម្ភារៈ ដើម្បីលោកគ្រូអ្នកគ្រូបង្រៀនល្អ និងសិស្សរៀនសូត្រមានភាពងាយស្រួល”។ ការវិនិយោគមូលដ្ឋានសម្ភារៈ និងបំពាក់ឧបករណ៍បង្ហាត់បង្រៀន តាំងពីបន្ទប់រៀនភាសាបរទេសរហូតដល់បន្ទប់កុំព្យូទ័រ បានផ្នែកអប់រំយកចិត្តទុកដាក់វិនិយោគ លើកកម្ពស់គុណភាពជាប្រចាំ។ លោក ង្វៀងភុកតាំង នាយករងមន្ទីរអប់រំនិងបណ្តុះបណ្តាលក្រុងកឹងធើ ឱ្យដឹង៖ “ផ្នែកអប់រំតែងយកចិត្តទុកដាក់វិនិយោគមូលដ្ឋានសម្ភារៈ បំពាក់ឧបករណ៍និងកសាងកងជួរគ្រូបង្រៀនមានគុណភាពជូនសាលាជនជាតិអន្តេវាសិកក្រុងកឹងធើ ដើម្បីឆ្លើយតបនឹងតម្រូវការបណ្តុះបណ្តាលប្រភពធនធានមនុស្សជនជាតិភាគតិចជូនក្រុង។ ក្រុងក៏អនុវត្តបានល្អនូវអនុក្រឹត្យលេខ ៨១/២០២១/NĐ-CP កំណត់អំពីយន្តការគ្រប់គ្រង ថ្លៃសិក្សាចំពោះគ្រឹះស្ថានអប់រំចំណុះប្រព័ន្ធអប់រំជាតិ និងគោលនយោបាយកាត់បន្ថយនិងលើកលែងបង់ថ្លៃសិក្សា ឧបត្ថម្ភបង់ថ្លៃសិក្សា។ល។ ជូនសិស្ស និស្សិតជាជនជាតិភាគតិច។
តាមប្រសាសន៍លោក តាវវៀតថាំង អនុប្រធាននាយកដ្ឋានផ្សព្វផ្សាយកិច្ចការជនជាតិ សាសនា ក្រសួងជនជាតិនិងសាសនាភូមិភាគនានាតែងយកចិត្តទុកដាក់ ម្ល៉ោះហើយបុព្វហេតុអប់រំនៅតំបន់ជនរួមជាតិភាគតិចមានការជឿនលឿនច្រើន ឆ្នាំក្រោយតែងខ្ពស់ជាងឆ្នាំមុន។ ទន្ទឹមនឹងនោះ ភូមិភាគនានានៅទាំងអនុវត្តបានល្អនូវគោលនយោបាយចំពោះកម្មាភិបាលគ្រប់គ្រង គ្រូបង្រៀន និងសិស្ស និស្សិតជាជនជាតិភាគតិច។ លេចធ្លោបំផុតនោះគឺ គោលនយោបាយជម្រើសសិស្ស បង្កើនការបង្រៀនភាសាវៀតដល់កុមារ និងសិស្សជនជាតិភាគតិច។ ទន្ទឹមនឹងនោះ យកចិត្តទុកដាក់ដល់ការងារជំរុញការសិក្សា ជំរុញបញ្ញា ស្ងើចសរសើរ និងជូនរង្វាន់ដល់លោកគ្រូអ្នកគ្រូ និងសិស្សជាជនជាតិភាគតិច ដែលសម្រេចបានស្នាដៃឆ្នើមជាដើម៕
ហាថាញ-វិមាន
អគ្គនិពន្ធនាយក: ត្រឿងវ៉ាំងច្វៀន អគ្គនិពន្ធនាយករងទទួលបន្ទុកភាសាខ្មែរ: ង្វៀងថាញត្វឹង
លិខិតអនុញាតលេខ៧៨៩/GP-BTTTT អាស្រ័យក្រសួងពត៌មាននិងសារគមនាគមន៍ផ្តល់ថ្ងៃទី០២-១២-២០២១។លេខ២៤ ត្រឹងវ៉ាំងហ្វាយ ទីក្រុងកឹងធើ - ទូរស័ព្ទ: (០២៩២) ៣៨៣០០៩៨
ទូរសារ: (០២៩២) ៣៨៣០៥៦១។ អ៊ីម៉ែល: toasoan@baocantho.com.vn
ទំនាក់ទំនងផ្សាយពាណិជ្ជកម្ម : quangcao@baocantho.com.vn
សរសេរច្បាស់ប្រភព"សារព័ត៌មានអេឡិចត្រូនិកកឹងធើ" នៅពេលផ្សាយបន្តពីwebsite នេះ។
អភិវឌ្ឍន៍ដោយ:
ពាក្យគន្លឹះ