សន្តិសុខ - ការពារប្រទេស ការពារប្រទេស

19/02/2024 - 16:46

កសាងយុទ្ធសាស្រ្តទឹកចិត្តប្រជាជនរឹងមាំនៅតំបន់ព្រំដែនសមុទ្រ

ក្រោយរយៈពេល៤ឆ្នាំផ្សព្វផ្សាយ ទម្រង់បក្ខជនប៉ុស្ដិ៍ការពារព្រំដែនជួយឧបត្ថម្ភគ្រួសារនៅតំបន់ព្រំដែនសមុទ្រកាម៉ាវ បានរួមចំណែកធានាការពារប្រទេស- សន្តិសុខ អធិបតេយ្យព្រំដែន ពូនជ្រំមនោសញ្ចេតនារវាងកងទ័ពនិងប្រជាជន។

ប៉ុស្ដិ៍ការពារព្រំដែនរ៉ាច់ហ្គួក សហការជាមួយនឹងរដ្ឋអំណាចភូមិភាគរៀបចំកម្មវិធី “និទាឃរដូវព្រំដែនផ្ដល់ភាពកក់ក្ដៅដល់អ្នកស្រុក”។

ទម្រង់បក្ខជនប៉ុស្ដិ៍ការពារព្រំដែន ទទួលបន្ទុកផ្ទាល់និងជួយគ្រួសារនៅតំបន់ព្រំដែនសមុទ្ររបស់ខេត្តកាម៉ាវ តាមគោលលំនាំ “៣ ច្បាម ៤ រួម” (៣ ច្បាម៖ ច្បាមអង្គភាព ច្បាមភូមិសាស្រ្ដ ច្បាមគោលការណ៍ គោលនយោបាយ; ៤ រួម៖ ហូបរួម នៅរួម ធ្វើការរួមនិងនិយាយភាសាជនជាតិរួម) កំពុងពង្រីកប្រសិទ្ធភាពលើកកម្ពស់គុណភាពកសាងបក្សនៅមូលដ្ឋាន។ យោងតាមមុខសញ្ញានីមួយៗ បក្ខជនការពារព្រំដែនមានរបៀបទំនាក់ទំនងនិងស្វែងយល់ខុសៗគ្នា។ ដោយទង្វើជាក់ស្ដែង ជួនកាលអនុវត្តបង្ហាញដោយផ្ទាល់ ជួនកាលកៀរគរជនរួមជាតិអនុវត្តទម្រង់ផលិតកម្មសមស្របដើម្បីឈានឡើងចាកផុតពីភាពក្រីក្រដោយចីរភាព។ មិនថាយប់ថ្ងៃ ឬលក្ខណៈភូមិសាស្រ្តលំបាក ពេលប្រជាជនត្រូវការគឺបក្ខជន តែងមានមុខជួយឧបត្ថម្ភទាន់ពេល។

កងទ័ពការពារព្រំដែនខេត្តកាម៉ាវ ចូលរួមវេចនំអន្សមជ្រូកជាមួយនឹងប្រជាជន
លើភូមិសាស្រ្តតំបន់ព្រំដែនសមុទ្រ។

អង្គភាពបានបញ្ជូនកម្មាភិបាល បក្ខជនរាប់ពាន់នាក់ចុះទៅភូមិសាស្រ្តជួបគ្រួសារក្រលំបាក ដើម្បីក្ដាប់ស្ថានភាពពួកគាត់; ទន្ទឹមនឹងនោះ ជំរុញការផ្សព្វផ្សាយ កៀរគរប្រជាជនខ្នះខ្នែងចូលរួមទប់ស្កាត់ បង្រ្កាបបទល្មើសគ្រប់ប្រភេទ មិនចូលដៃចូលជើងនឹងការរត់ពន្ធ ក្លែងបន្លំពាណិជ្ជកម្ម ជាពិសេសគឺអនុវត្តប្រសិទ្ធភាពនូវចលនា “ទូទាំងប្រជាជនចូលរួមបង្ការប្រឆាំងជំងឺ COVID - ១៩ និងការឆ្លងដែនខុសច្បាប់” នៅតំបន់ព្រំដែនសមុទ្រ ប្រឆាំងការទាញយកផលសមុទ្រខុសច្បាប់ IUU។ល។

បក្ខជនប៉ុស្ដិ៍ការពារព្រំដែន បានម្ចាស់ការធ្វើសេនាធិការជូនគណៈបញ្ជាការប៉ុស្ដិ៍ការពារព្រំដែនសហការជាមួយនឹងរដ្ឋអំណាចភូមិភាគ រៀបចំផ្សព្វផ្សាយ កៀរគរគ្រួសារប្រជាជនចូលរួមដាស់តឿន ជួយឧបត្ថម្ភកូនចៅលះបាបគ្រោះសង្គម ផ្ដាច់គ្រឿងញៀន ខ្នះខ្នែងឈានឡើងអភិវឌ្ឍសេដ្ឋកិច្ចគ្រួសារ។ គ្រួសារមីងវ៉ធីហ្វា នៅភូមិតឹងថាញ់ ឃុំតឹងតៀង ស្រុកដឹមយើុយ ជាគ្រួសារមួយលំបាកខ្លាំង។ កូនប្រុសមីងគឺជាកម្លាំងពលកម្មសំខាន់ក្នុងគ្រួសារ ប៉ុន្តែ បានចាកចេញពីផ្ទះដោយសារជំពាក់បំណុល ព្រោះតែញៀននឹងល្បែងស៊ីសង។ ផ្ដើមពីនោះ គ្រួសារមីងហ្វារឹតតែលំបាកថែមទៀត។ អាស្រ័យបានការលើកទឹកចិត្ត ជួយឧបត្ថម្ភរបស់បក្ខជនត្រឹងត្រុងតឹន (ប៉ុស្ដិ៍ការពារព្រំដែនតឹងតៀង) ទើបកូនប្រុសមីងបានវិលត្រឡប់មកផ្ទះ ប្រឹងប្រែងធ្វើការរកស៊ី ហើយជាសន្សឹមៗសង រួចបំណុល។

វរសេនីយ៍ឯក ង្វៀងក្វាងហា ស្នងការនយោបាយរងនៃកងទ័ពការពារព្រំដែនខេត្តកាម៉ាវ បានឱ្យដឹង រយៈពេលខាងមុខ គណៈកម្មាធិការបក្សនៃកងទ័ពការពារព្រំដែនខេត្តបន្តរក្សា និងអនុវត្តប្រកបដោយប្រសិទ្ធភាពនូវបទបញ្ជារបស់គណៈអចិន្ត្រៃយ៍នៃគណៈកម្មាធិការបក្ស កងទ័ពការពារព្រំដែនខេត្តកាម៉ាវ ស្ដីពីការ “ចាត់បក្ខជនប៉ុស្ដិ៍ការពារព្រំដែន ទទួលបន្ទុកគ្រួសារ នៅតំបន់ព្រំដែន” ផ្សារភ្ជាប់ជាមួយនឹងការចាត់បក្ខជនប៉ុស្ដិ៍ការពារព្រំដែន ចូលរួមប្រជុំសកម្មភាពបក្សនៅតាមសាខាបក្សភូមិ សាខាបក្ស អនុសង្កាត់តំបន់មាត់សមុទ្រ៕

យោង៖ទីភ្នាក់ងារសារព័ត៌មានវៀតណាម-បកប្រែ៖ ថាច់ធី

ចែករំលែកអត្ថបទ

ពាក្យគន្លឹះ