សន្តិសុខ - ការពារប្រទេស ការពារប្រទេស

14/11/2023 - 09:07

វគ្គសិក្សាភាសាខ្មែររបស់កងទ័ព

បញ្ជាការដ្ឋានយោធាខេត្តអាងយ៉ាង ទើបសហការជាមួយនឹងសាកលវិទ្យាល័យត្រាវិញ រៀបចំបើកវគ្គបង្រៀនភាសាខ្មែរជូនកងទ័ព។

ថ្នាក់រៀនប្រព្រឹត្តឡើងក្នុងអំឡុងពេល២ខែ មានសិក្ខាកាម៥០រូប។

កម្មវិធីសិក្សាចែកចេញជា៣ផ្នែក៖ រៀនព្យញ្ជនៈនិងស្រៈខ្មែរ សន្ទនានិងវាក្យស័ព្ទយោធា។ វរសេនីយត្រី ង្វៀងភឿកសាង គណៈបញ្ជាការយោធាស្រុកទ្រីតូង ឱ្យដឹង៖ “ទ្រីតូងជាស្រុកមានជនរួមជាតិខ្មែររស់នៅកុះករ។ កងជីវពលស្រុកភាគច្រើនជាជនជាតិខ្មែរ។ ដូច្នេះ ការលំបាកធំបំផុតរបស់យើងខ្ញុំពេលទំនាក់ទំនងជាមួយនឹងជនរួមជាតិ គឺភាសាហ្នឹងឯង។ ពេលបានថ្នាក់លើជូនដំណឹងថា មានបើកវគ្គបង្រៀនភាសាខ្មែរ ខ្ញុំស្ម័គ្រចិត្តចូលរៀនភ្លាម”។

ក្នុងភាសាខ្មែរមានព្យញ្ជនៈ៣៣តួ និងស្រៈ២៥តួ។ ដំបូង សិក្ខាកាមជួបលំបាកច្រើនក្នុងការរៀនភាសានេះ បំផុតគឺការបញ្ចេញសូរអាន។ អាស្រ័យហេតុនោះ ពេលចូលរៀន សិក្ខាកាមម្នាក់ៗតែងយកចិត្តទុកដាក់ស្តាប់គ្រូពន្យល់ ហ៊ានសន្ទនាជាមួយសិក្ខាកាមដទៃទៀត និងត្រូវទន្ទេញវាក្យស័ព្ទឱ្យចាំច្រើនទៀតផង។

ជាង២សប្តាហ៍នេះ លោកគ្រូ ថាច់សុវណ្ណា គ្រូឧទ្ទេសនៃសាកលវិទ្យាល័យត្រាវិញបានចូលបង្ហាត់បង្រៀនផ្ទាល់។ លោកគ្រូ ឱ្យដឹង៖ “ភាសាខ្មែរពិបាករៀន និងពិបាកប្រើប្រាស់ស្ទាត់ជំនាញក្នុងរយៈពេលខ្លីណាស់។ ហេតុនោះ អ្នកសិក្សាត្រូវមានអំណត់ព្យាយាម។ សិក្ខាកាមដែលខ្ញុំបង្រៀនលើកនេះក៏ពិសេសណាស់ដែរ។ និស្សិតដែលខ្ញុំធ្លាប់បង្រៀននៅសាលា ភាគច្រើនចេះភាសាខ្មែរមូលដ្ឋានរួចហើយ។ ចំណែកនៅទីនេះ បងៗកងទ័ពគឺជាអ្នកថ្មោងថ្មីទាំងអស់”។

ជាមួយនឹងបទពិសោធន៍ច្រើនឆ្នាំ លោកគ្រូថាច់សុវណ្ណា ខិតខំយកអស់នូវបំណិនបង្ហាត់បង្រៀនដែលមានមកពន្យល់ឱ្យងាយយល់ និងជាក់ស្តែងបំផុត សង្ឃឹមថា ជួយលើកកម្ពស់បំណិនស្តាប់ និយាយ និងបង្រៀនដល់សិក្ខាកាម “ពិសេស” នេះយល់ដឹងបន្ថែមអំពីទំនៀមទម្លាប់របស់ជនរួមជាតិខ្មែរផងដែរ។

អនុសេនីយ៍ឯក ហ្វិញភឿកអែម វេជ្ជបណ្ឌិតនៃមន្ទីរពេទ្យយោធាខេត្តអាងយ៉ាង ឱ្យដឹង៖ “ដំបូង ខ្ញុំសង្កេតឃើញការហាត់សរសេរអក្សរខ្មែរលំបាកណាស់។ ក្រៅពីការណែបង្ហាញរបស់លោកគ្រូ ខ្ញុំនៅទាំងទិញសៀវភៅហាត់អាន ហាត់សរសេរអក្សរផ្ចង់ទៀតផង។ ចូលរួមថ្នាក់រៀននេះ ខ្ញុំយល់ដឹងបានច្រើនអំពីមនុស្ស វប្បធម៌ ទំនៀមទម្លាប់របស់ជនរួមជាតិខ្មែរ។ ប្រការនេះជួយឱ្យខ្ញុំម្ចាស់ការជឿជាក់លើខ្លួនឯងក្នុងការទំនាក់ទំនង; ងាយស្រួលសហការឃោសនា ចលនាមាមីងអនុវត្តនូវគោលការណ៍របស់បក្ស គោលនយោបាយ ច្បាប់របស់រដ្ឋ”។

“បន្ទាប់ពីវគ្គសិក្សានេះ សមមិត្តម្នាក់ៗនឹងកាន់តែងាយស្រួលក្នុងការទំនាក់ទំនងជិតដិតជាមួយជនរួមជាតិខ្មែរ ក៏ដូចជាក្នុងដំណើរការបំពេញភារកិច្ចនៅអង្គភាព។ ទន្ទឹមនឹងនោះ ជាកងកម្លាំងស្នូលក្នុងការបំពាក់បំប៉ន ពូនជ្រំស្មារតី មហាសាមគ្គីជនជាតិ ផ្សារភ្ជាប់មនោសញ្ចេតនាមិត្តរួមកង; មានបរិយាកាសបើកទូលាយ ថែមទៀតក្នុងការរស់នៅ រៀនសូត្រ បំពេញការងារ រួមចំណែកអភិរក្សនិងអភិវឌ្ឍនូវតម្លៃវប្បធម៌ជនរួមជាតិខ្មែរ” - វរសេនីយ៍ឯក ង្វៀងថុកលិញ ស្នងការនយោបាយបញ្ជាការដ្ឋានយោធាខេត្តអាងយ៉ាង មានក្តីសង្ឃឹមដូច្នេះ៕

យោង៖ កាសែតអាងយ៉ាង-វិមាន

ចែករំលែកអត្ថបទ

ពាក្យគន្លឹះ