មហាសាមគ្គីជនជាតិ ភូមិស្រុកផ្លាស់ថ្មី

18/07/2023 - 08:54

ចំណូលខ្ពស់ផ្ដើមពីចិញ្ចឹមត្រីត្រចៀកដំរីស្បែកខ្លារខិន

រៀងរាល់ឆ្នាំ បងង្វៀងទ្រីធឹក (អាយុ២៨ឆ្នាំ) នៅភូមិដុងមី ទីប្រជុំជនង៉ាសៅ ស្រុកចូវថាញ់ ខេត្តហូវយ៉ាង លក់ត្រីត្រចៀកដំរីស្បែកខ្លារខិនរាប់រយពាន់ក្បាល រកបានប្រាក់ចំណូលជាង ៦០០ លានដុង។

ជាមួយនឹងផ្ទៃដី ១.០០០ម២ ចិញ្ចឹមត្រីលម្អ បងធឹក រកបានប្រាក់ចំណូល ៦០០ លានដុង/ឆ្នាំ។

បច្ចុប្បន្ន កសិដ្ឋានចិញ្ចឹមត្រីរបស់បងធឹក ពេលណាក៏មានចំនួនត្រីមេបាប្រមាណ ៨០គូ រួមជាមួយនឹងកូនត្រីពូជប្រមាណជាង ៥០.០០០ក្បាល ដែលសុទ្ធតែជាប្រភេទត្រីត្រចៀកដំរីស្បែកខ្លារខិនសម្បុរសនិងខ្មៅនោះដែរ។ ដើម្បីចិញ្ចឹមត្រីមានប្រសិទ្ធភាព ធំស្មើ ត្រូវធានាកម្រិត pH ក្នុងទឹកក្នុងកម្រិតពី ៦,៥-៧,៥។ អាងចិញ្ចឹមត្រូវការមានប្រព័ន្ធចម្រោះទឹកនិងអុកស៊ីហ្សែនសម្រាប់ត្រីរស់នៅ។ សម្រាប់ចំណីត្រី គឺត្រីមេបាត្រូវបានផ្ដល់ចំណីដោយឡែក មានដូច ជាបង្គានិងក្ដាមស្រស់ជាដើម។ រយៈពេលបន្តពូជរបស់ប្រភេទត្រីនេះគឺចាប់ពីខែមករាដល់ខែធ្នូ ហើយដំណាក់កាលត្រីពងអូសបន្លាយចាប់ពី៦-៧ខែ។ ពងត្រីត្រូវបានដួសយកទៅភ្ញាស់ ក្រោយរយៈពេលពី៣-៤ថ្ងៃគឺញាស់។ សំបុកពងនីមួយៗញាស់បានរាប់រយក្បាលដល់ជាងពាន់ក្បាល។ “ក្នុងរដូវវស្សា ពងត្រីពិបាកភ្ញាស់បន្តិច ហើយអត្រាពងខូចមានចំនួនច្រើន។ ចំណែករដូវប្រាំង គឺអត្រាពងត្រីញាស់ខ្ពស់ជាង” បងធឹក បានឱ្យដឹងដូច្នោះ។ កូនត្រីទើបញាស់គឺ ឱ្យវាស៊ីចៃទឹក រហូតដល់បានរយៈពេល៧ថ្ងៃ ទើបឱ្យស៊ីជន្លេនអំបោះនិងចំណីត្រី ដើម្បីឆាប់ធំ។

ពេលត្រីមានទំហំចាប់ពី ៣-៤ សង់ទីម៉ែត្រ បងធឹក ដួសឡើងអាងចិញ្ចឹមដោយឡែក ដើម្បីដំឡើងពណ៌និងបង្កើនតម្លៃ។ បងធឹក ឱ្យដឹង៖ “ប្រភេទត្រីលម្អនេះ ត្រូវប្រើរូបមន្តដំឡើងពណ៌ដោយឡែក លាយជាមួយចំណីសម្រាប់ត្រីស៊ីឱ្យឡើងពណ៌។ នៅពេលត្រីឡើងពណ៌ សងខាងពោះមានស្រកាក្រហមល្អឆើតឆាយ ធ្វើឱ្យតម្លៃត្រីកើនឡើង។ ឧទាហរណ៍ ត្រីពូជប្រសិនបើមិនទាន់ឡើងពណ៌ លក់ក្នុងតម្លៃប្រមាណ ២០.០០០ ដុង/ក្បាលប៉ុណ្ណោះ ប៉ុន្តែនៅពេលឡើងពណ៌ តម្លៃកើនឡើងជិត៣០.០០០ដុង/ក្បាល”។

រៀងរាល់ឆ្នាំ បងធឹក លក់កូនត្រីពូជពី ២០០.០០០-៣០០.០០០ក្បាល។ លក់ក្នុងតម្លៃពី៣.០០០-៣០.០០០ដុង/ក្បាល (តាមទំហំនិងឡើងពណ៌) រកបានប្រាក់ចំណូលជាង ៦០០លានដុង។ បច្ចុប្បន្ន ចំនួនត្រីរបស់បងធឹក ត្រូវបានឈ្មួញកណ្ដាលនៅក្រុងកឹងធើបញ្ជាទិញដោយចំនួនច្រើន។ រយៈពេលខាងមុខ បងធឹក ក៏មានបំណងពង្រីកកសិដ្ឋាន បង្កើនត្រីមេបាឡើងជិត២០០គូ ដើម្បីជំរុញការផលិតត្រីពូជចេញលក់ទីផ្សារ ពិសេស គឺនៅក្រុងហូជីមិញ។ “ផ្ដើមអាជីពពីការចិញ្ចឹមប្រភេទត្រីនេះ ប្រសិនបើជក់ចិត្តនិងក្ដាប់ច្បាស់បច្ចេកទេស នឹងអាចនាំមកប្រាក់ចំណូលខ្ពស់ពុំខាន។ បងប្អូនសម្ព័ន្ធយុវជននិងយុវជននៅជនបទ អាចប្រើប្រាស់ផ្ទៃដីចម្ការរបស់គ្រួសារដើម្បីចិញ្ចឹមរកប្រាក់ចំណូល។ ខ្ញុំនឹងជួយចែករំលែកបទពិសោធន៍ ជំនួយបច្ចេកទេស ផ្គត់ផ្គង់ត្រីពូជគុណភាព ជាមួយនឹងតម្លៃអាទិភាព” បងធឹក បានឱ្យដឹង ដូច្នោះ៕

កាសែតកឹងធើ - ថាច់ធី

ចែករំលែកអត្ថបទ

ពាក្យគន្លឹះ