សុខភាព - អប់រំ អប់រំ

21/02/2022 - 08:33

ធានាសុវត្ថិភាពដល់សិស្សានុសិស្សវិលមកកាន់សាលាឡើងវិញ

យោងតាមមន្ទីរអប់រំនិងបណ្តុះបណ្តាលក្រុងកឹងធើ ផ្នែកអប់រំបានចង្អុលការគ្រប់ការិយាល័យអប់រំ និងសាលារៀនក្រោមឱវាទ ត្រៀមលក្ខណៈសម្រាប់សិស្សានុសិស្សវិលមកកាន់សាលាឡើងវិញ ចាប់ពីមុនបុណ្យចូលឆ្នាំថ្មីវៀតណាម ២០២២។ អាស្រ័យហេតុនោះ សប្តាហ៍ដំបូងក្រោយពីបុណ្យចូលឆ្នាំថ្មីភ្លាម សិស្សានុសិស្សបានមកកាន់សាលាច្រើនកុះករ ម៉ោងរៀនត្រូវបានរៀបចំល្អ។

សិស្សអនុវិទ្យាល័យដុងហ៊ីប ចេញលេងទីធ្លាសាលា។

លោកង្វៀងវ៉ាន់ជី ប្រធានការិយាល័យអប់រំនិងបណ្តុះបណ្តាលស្រុកធើយឡាយ ឱ្យដឹង៖ “ការិយាល័យអប់រំបានបង្កើតក្រុមការងារ ចុះត្រួតពិនិត្យការត្រៀមលក្ខណៈទទួលសិស្សានុសិស្សវិលកាន់សាលាឡើងវិញក្រោយពីបុណ្យចូលឆ្នាំថ្មី។ ផ្នែកអប់រំបានសំណូមពរគ្រប់សាលារៀនត្រូវធ្វើការបោសសម្អាតបន្ទប់រៀនឱ្យស្រឡះស្រឡំ មានបន្ទប់ធ្វើចត្តាឡីស័កសុខាភិបាល និងមានកន្លែងលាងដៃរម្ងាប់មេរោគ វាស់កម្តៅនៅនឹងខ្លោងទ្វារ។ល។ ផ្នែកអប់រំក៏បានសំណូមពរគ្រូបង្រៀនគ្រប់វិញ្ញាសា គ្រូបង្រៀនប្រចាំថ្នាក់តាមដានថ្នាក់រៀន សិស្សានុសិស្ស ដើម្បីរួមជាមួយសាលារៀនទប់ទល់បានទាន់ពេល។ មកទល់ពេលនេះ ការិយាល័យអប់រំបានវាយតម្លៃការងារត្រៀមលក្ខណៈ និងទទួលសិស្សានុសិស្សរបស់សាលានីមួយៗ បានល្អប្រសើរ”។ ព្រមជាមួយនោះ សាលារៀននៅតំបន់ជនជាតិ លើភូមិសាស្រ្តស្រុកកើ-ដ ក៏អនុវត្តល្អការងារទទួលសិស្សានុសិស្សចូលរៀនផ្ទាល់ផងដែរ ម្ល៉ោះហើយមិនមានការរារែកពេលប្អូនៗចូលរៀន។ លោកហ្វិញវ៉ាន់ហ្វាច់ ប្រធានការិយាល័យអប់រំនិងបណ្តុះបណ្តាលស្រុកកើ-ដ ឱ្យដឹង៖ “យើងខ្ញុំផ្សព្វផ្សាយបញ្ជ្រាបដល់សាលានីមួយៗ ត្រូវតែរៀបចំឱ្យបានហ្មត់ចត់ សុវត្ថិភាព បន្ទប់រៀន នោះទើបអាណាព្យាបាលសិស្សស្ងប់ចិត្តឱ្យកូនវិលមកកាន់សាលាឡើងវិញ។ ប៉ុន្មានថ្ងៃដំបូង សិស្សានុសិស្សមានចំនួនតិច ប៉ុន្តែកើនឡើងបន្តិចម្តងៗនិងសម្រេចផែនការរបស់សាលាក្នុងប៉ុន្មានថ្ងៃជិតៗនេះ”។ ម៉ោងចេញលេង សិស្សមួយចំនួននៅអនុវិទ្យាល័យដុងហ៊ីប ស្រុកកើ-ដ ចេញលេងទីធ្លា ទោះបីថ្ងៃក្តៅខ្លាំងក៏ពិតមែន។ ប្អូនដាវតឹងដាក សិស្សថ្នាក់ទី ៦A ឱ្យដឹង៖ “កូនចង់ទៅរៀនណាស់ ម្ល៉ោះហើយពេលបានចូលរៀនឡើងវិញកូនត្រេកអរខ្លាំងណាស់។ ពេលជូនកូនទៅរៀន ម៉ែតែងផ្តាំកុំឱ្យដោះម៉ាស់ឱ្យសោះ ទោះជាទីធ្លាសាលាក្តៅ កូននៅតែពាក់ម៉ាស់ជាប់ជានិច្ច។ ឃើញមិត្តណាភ្លេចពាក់ម៉ាស់ គឺលោកគ្រូអ្នកគ្រូរំលឹកភ្លាម”។

លោកឡេវ៉ាន់យុង នាយកវិទ្យាល័យទ្រុងអាង ស្រុកកើ-ដ ឱ្យដឹង៖ “សាលាអនុវត្តតាមកិច្ចចង្អុលការរបស់ផ្នែកអប់រំ នោះគឺមិនចាប់បង្ខំឱ្យសិស្សចូលរៀនទេ ប្រសិនបើប្អូនៗនិងអាណាព្យាបាលសិស្សមិនទាន់ស្ងប់ចិត្ត។ ថ្វីត្បិតដូច្នោះក្តី ខណៈឃើញសាលាត្រៀមហ្មត់ចត់ គ្រប់លក្ខឋានតាមដែលផ្នែកអប់រំបានកំណត់មុនពេលសិស្សវិលមកកាន់សាលាឡើងវិញដូច៖ មានក្រុមសុវត្ថិភាព COVID-១៩ បន្ទប់ធ្វើចត្តាឡីស័ក បំពាក់បរិក្ខារ ការអនាម័យ ធ្វើតេស្ត កម្មាភិបាលពេទ្យក្នុងសាលាប្រចាំការម៉ឺងម៉ាត់។ល។ ម្ល៉ោះហើយអាណាព្យាបាលសិស្សស្ងប់ចិត្តឱ្យកូនទៅកាន់សាលារៀនផ្ទាល់”៕

ហាថាញ-លីសៀ

ចែករំលែកអត្ថបទ

ពាក្យគន្លឹះ