គោលនយោបាយ -ការរស់នៅ ការរស់នៅ

07/04/2015 - 14:57

ធ្វើមានផ្តើមពីបាតដៃទទេ

មិនត្រឹមតែបំពេញភារកិច្ចជាប្រពន្ធ ជាម្តាយបានល្អប៉ុណ្ណោះទេ បងស្រីសេីុងធីធឿង នៅភូមិកំពត ឃុំថាមដូង ស្រុកមីស្វៀង ខេត្តសុកត្រាំង នៅទាំងប្រិតសំចៃ ឈ្លាសវៃគិតគូរធ្វើការរកស៊ី ដើម្បីលើកស្ទួយជីវភាព គ្រួសារឲ្យបានចាកផុតពីភាពក្រីក្រឈានឡើងធ្វើមានធ្វើបានទៀតផង ។

ពេលជីវភាពបានធូរធារ ប្តីប្រពន្ធបងស្រីសេីុធីធឿង រស់នៅប្រកបដោយ
ភាពរីករាយសុភមង្គល។

សម្លឹងមើលផ្ទះឥដ្ឋដ៏សមរម្យរបស់គ្រួសារបងស្រីសេីុងធីធឿង តិចមានអ្នកណាដឹងថា រយៈពេលជាង១៥ឆ្នាំមុន គ្រួសារបងស្រីធ្លាប់ជាគ្រួសារក្រីក្រមួយក្នុងចំណោមគ្រួសារក្រីក្របំផុតនៅភូមិកំពត។ យោងប្រសាសន៍រៀបរាប់របស់បងស្រីសេីុងធីធឿង កាលពីកុមារភាព បងស្រី ធ្លាប់ទៅធ្វើការឈ្នួលឲ្យគេ។ លុះធំដឹងក្ដី បងស្រីមានប្ដី ត្រកូលខាងប្ដីក្រីក្រដូចគ្នា ម្ល៉ោះហើយបងស្រីតែងធ្វើការឈ្នួលឥតល្ហែ មានដូចឆ្លូកស្រូវ បោចស្មៅ ច្រូតកាត់។ល។ ចំណែកប្ដីរបស់បងធឿងវិញ ទៅធ្វើកម្មករលីសែងនៅរោងចក្រកិនស្រូវ។ បងស្រីសេីុងធីធឿង ឲ្យដឹង៖ "ដោយសារគ្មានដីផលិតកម្ម ទោះបីប្ដីប្រពន្ធយើងខ្ញុំទៅធ្វើការឈ្នួល ក៏ប៉ុន្តែគ្មាននៅសេសសល់អ្វីទេ។

ប្រសិនបើមិនទ្រាំលំបាកធ្វើការរកស៊ីទេ ច្បាស់ជាគេមើលងាយជាពុំខានម្ល៉ោះហើយប្តីប្រពន្ធយើងខ្ញុំតែងខិតខំធ្វើការរកស៊ី មិនដែលត្អូញត្អែរម្ដងណាទេធ្វើយ៉ាងណាឲ្យតែបានគ្រប់ហូបប្រចាំថ្ងៃប៉ុណ្ណោះ"។ ពិនិត្យឃើញគ្រួសារបងស្រីសេីុងធីធឿង ក្រទ្រាំលំបាករកស៊ីបានជានៅឆ្នាំ២០០០ លោកថាច់ឌី ប្រធានគណៈកម្មការប្រជាជនភូមិកំពតឲ្យខ្ចីដីចម្ការ១,៥កុង ដើម្បីដាំដំណាំរួមផ្សំនិងពិនិត្យជ្រើសរើសឲ្យបុលទុនអាទិភាពរបស់រដ្ឋសម្រាប់គ្រួសារអ្នកក្រ៣លានដុង។ អាស្រ័យមានដី មានដើមទុនប្រកបរបររកស៊ី ទើបគ្រួសារបងស្រីសេីុងធីធឿង ចាប់ផ្ដើមរៀបចំដីដាំដំណាំរួមផ្សំ។ ថ្វីបើដូច្នោះក្តី បងស្រីធឿង នៅតែបារម្ភជានិច្ចព្រោះនេះជាលេីកដំបូងក្នុងឆាកជីវិតដែលបងស្រីមានប្រាក់៣លានដុងក្នុងដៃ។ ពេលនោះ ប្ដីប្រពន្ធបងធឿង ក៏សម្រេចចិត្តដាំខ្ទឹមស្លឹក។ ជាមួយនឹងការដាដំណាំរួមផ្សំ ប្ដីប្រពន្ធបងស្រីសេីុងធីធឿង នៅតែឆ្លៀតពេលទៅធ្វើការឈ្នួល ដើម្បីរកប្រាក់ទិញជី ទិញថ្នាំកំចាត់សត្វល្អិតចង្រៃ។ បងស្រីឲ្យដឹង៖ "រដូវដំបូងដាំខ្ទឹមស្លឹក ពេលដឹងថាខ្ទឹមស្លឹកលក់បានថ្លៃ ជិតដល់ថ្ងៃប្រមូលផល នាងខ្ញុំអរដេកពុំលក់។ ខ្ទឹមស្លឹកមួយរដូវនោះ ខ្ញុំលក់ខ្ញុំទិញបានមាស២តម្លឹង។ អាស្រ័យដោយការដាំដំណាំ គឺយកកម្លាំងធ្វើជាចំណេញ ម្ល៉ោះហើយក្រោយពីប្រមូលផលប្រាក់ចំណេញទាំងប៉ុន្មាន នៅមូលស្ទើរតែទាំងស្រុង។ អាស្រ័យហេតុដូច្នោះ ដាំដំណាំរួមផ្សំក្នុងរយៈពេលតែ១ឆ្នាំប៉ុណ្ណោះ (៣រដូវ/ឆ្នាំ) គ្រួសារនាងខ្ញុំរកប្រាក់ចំណេញជាង១០០លានដុង"។ ការដាំដំណាំរួមផ្សំឆ្នាំដំបូង បងស្រីសេីុងធីធឿង ទិញបានដីស្រែ១០កុង។ លំដាប់ប៉ុន្មានឆ្នាំក្រោយបន្តបន្ទាប់ដោយសារផលិតស្រូវផង ដាំដំណាំរួមផ្សំផង បានជាបងស្រីសេីុងធីធឿង មានទុនទិញដីស្រែបានពី៥ដល់១០កុង/ឆ្នាំ។ ក្រោយរយៈពេល១៥ឆ្នាំពលកម្មផលិត បងស្រីសេីុងធីធឿងទិញបានដីស្រែជាង១០ហិកតា និងដីចម្ការជិត១ហិកតាសម្រាប់ដាំដំណាំរួមផ្សំ។ សព្វថ្ងៃតាម ការគិតគូររបស់បងស្រីសេីុងធីធឿង ចំណូលរបស់គ្រួសារបងគិតជាមធ្យមភាគសម្រេចបានជាង៥០០លានដុង/ឆ្នាំ។ មិនត្រឹមតែចេះរបៀបធ្វើមានធ្វើបានប៉ុណ្ណោះទេ ប្ដីប្រពន្ធបងស្រីសេីុងធីធឿង នៅទាំងមានចិត្តសន្តោសប្រណីជួយអ្នកក្រនៅភូមិភាគទៀតផង។ រយៈពេលជាង៥ ឆ្នាំមកនេះ ឲ្យតែដល់បុណ្យចូលឆ្នាំថ្មី គ្រួសារបងស្រីសេីុងធីធឿង តែងធ្វើអំណោយជាអង្ករជាង៣តោននិងប្រាក់ជូនអ្នកក្រ ដើម្បីមាមីង បងប្អូនទទួលអំណរបុណ្យចូលឆ្នាំថ្មីប្រវេណីជាតិ។

ជាពិសេស ពេលដឹងថាគ្រួសារក្រីក្រណាក្នុងភូមិស្រុកមានអ្នកស្លាប់ប្ដីប្រពន្ធបងស្រីតែងចុះទៅឧបត្ថម្ភអង្ករ១បាវ៥០គីឡូក្រាម និងប្រាក់៥០០.០០០ដុង ដើម្បីរួមចំណែកជួយគ្រួសារ ម្ចាស់បុណ្យសពឆ្លងកាត់ការលំបាក។ ដោយសារមានទឹកចិត្តសប្បុរសធម៌ ប្តីប្រពន្ធបងស្រីសេីុងធីធឿង តែងបានអ្នករាល់គ្នាគោរពស្រឡាញ់ជានិច្ច។

លោកថាច់ឌី ប្រធានគណៈកម្មការប្រជាជនភូមិកំពត ឲ្យដឹង៖ "ពីមុននេះ គ្រួសារបងស្រីសេីុងធីធឿង ធ្លាប់ជាគ្រួសារក្រីក្រមួយដោយសារ ខិតខំពលកម្មផលិត បានជាសព្វថ្ងៃក្លាយជាគ្រួសារធ្វើមានធ្វើបានរបស់ភូមិ។ ពេលធ្វើមានធ្វើបាន គ្រួសារបងស្រីសេីុងធីធឿង តែងមានចិត្ត សន្តោសប្រណីដល់មាមីងបងប្អូនអ្នកក្រ និងសកម្មចូលរួមការចលនាទាំងឡាយរបស់ភូមិ។ មិនត្រឹមតែជាអ្នកទ្រាំលំបាក ខ្នះខ្នែងធ្វើការរកស៊ីនិងចេះរបៀបប្រិតសំចៃប៉ុណ្ណោះទេ បងស្រីសេីុងធីធឿង នៅទាំងចិញ្ចឹមកូន២រូបរៀនមហាវិទ្យាល័យទៀតផង។ បងស្រីសេីុងធីធឿង ជាគំរូល្អគួរឲ្យបងប្អូននារីក្នុងភូមិស្រុករៀនសូត្រ"៕

លីធាន-សេរី

ចែករំលែកអត្ថបទ

ពាក្យគន្លឹះ