មហាសាមគ្គីជនជាតិ គំរូក្នុងសហគមន៍

28/10/2026 - 08:04

កសិករខ្មែរផលិតនិងធ្វើអាជីវកម្មពូកែ

ដោយចរិតឧស្សាហ៍ព្យាយាម ស៊ូទ្រាំការលំបាក និងក្លាហានផ្លាស់ប្តូរផ្នត់គំនិតក្នុងការផលិត កសិករខ្មែរ ឡឹមថាញ់ហុង នៅភូមិព្រែកពិន្ទង ឃុំមីហឿង ទីក្រុងកឹងធើ ឈានឡើងធ្វើមាននិងក្លាយជាកសិករខ្មែរគំរូឆ្នើមក្នុងការផលិត ធ្វើអាជីវកម្មពូកែនៅភូមិភាគ។

លោកឡឹមថាញ់ហុង កសិករខ្មែរគំរូធ្វើសេដ្ឋកិច្ចពូកែនៅឃុំមីហឿង កំពុងជ្រើសរើសឪឡឹកលក់ឱ្យអាជីវករ។

មានឱកាសបានជួបសំណេះសំណាលជាមួយលោក ឡឹមថាញ់ហុង យើងខ្ញុំកាន់តែយល់ច្បាស់អំពីស្ថានភាព ក៏ដូចជាឆន្ទៈឈានឡើងរបស់កសិករដែលមានដើមកំណើតជាអ្នកស្រែចម្ការ សុទ្ធសាធ គាត់តែងស្វែងរកគ្រប់វិធីដើម្បីជម្នះភាពក្រលំបាក។ “រៀបការនៅឆ្នាំ ១៩៩០ ចេញរស់នៅដោយឡែកជាមួយនឹងដីស្រែ ៣ កុង ដែលឪពុកម្តាយចែកឱ្យ។ ទោះជាខិតខំប្រឹងប្រែងយ៉ាងណាក៏ដោយ ប៉ុន្តែដោយសារទម្លាប់ដាំដុះឱនថយ លក្ខណៈដាំដុះជួបការលំបាក ទិន្នផលស្រូវមិនបានខ្ពស់ ជីវភាពគ្រួសារតែងខ្វះមុខខ្វះក្រោយ” លោកហុង បានចែករំលែកដូច្នេះ។ អាស្រ័យបានកម្មាភិបាលសមាគមកសិករឃុំ បំផុសចលនាឱ្យចូលរួមសមាគម លោកហុង បានទៅទស្សនាទម្រង់ធ្វើសេដ្ឋកិច្ចមានប្រសិទ្ធភាព។ ចាប់ពីពេលនោះ លោកបានរៀនសូត្របទ ពិសោធន៍ផលិតនិងធ្វើអាជីវកម្មដែលសមស្របនឹង លក្ខណៈភូមិភាគ ដើម្បីយកមកអនុវត្តលើទម្រង់ផលិតរបស់គ្រួសារ។ បន្ទាប់ពីខិតខំធ្វើអាជីវកម្មជាច្រើនឆ្នាំ ដោយការគិតគូរចេះប្រិតសំចៃ គ្រួសារលោកសន្សំប្រាក់ទិញបានដី ៥ កុង ដើម្បីពង្រីកការផលិត។ ឆ្នាំ ២០០១ ដោយបានភូមិភាគលើកទឹកចិត្តឱ្យផ្លាស់ប្តូរទម្រង់ផលិត លោកហុង បានប្តេជ្ញាផ្លាស់ប្តូរពីការធ្វើស្រែ ៣ រដូវដែលផ្តល់ទិន្នផលទាប មកធ្វើស្រែ ២ រដូវនិងដាំដំណាំរួមផ្សំ ១ រដូវវិញ។ ក្រោយមក ដោយឃើញការដាំដំណាំរួមផ្សំនាំមកនូវប្រសិទ្ធភាពសេដ្ឋកិច្ចខ្ពស់ លោក ហុង បានសម្រេចចិត្តកែប្រែដីស្រែ ៧ កុងមកដាំដំណាំរួមមាន៖ ត្រប់វែង ម្ទេស និងឪឡឹក ៣ រដូវក្នុងមួយឆ្នាំ។ ប្រាក់ចំណូលពីការធ្វើស្រូវ និងដាំដំណាំរួមផ្សំ បានជួយឱ្យគ្រួសារលោកហុង មានជីវភាពធូរធារជាងមុន និងទិញដីស្រែបន្ថែម ផ្តើមពីនោះមកសេដ្ឋកិច្ចគ្រួសារបានអភិវឌ្ឍជាបន្តបន្ទាប់។ រហូតមកទល់ពេលនេះ គ្រួសារលោកហុង មានដីស្រែ ២៧ កុង និងដីចម្ការ ៧ កុង ដោយរកបានប្រាក់ចំណូលមធ្យមប្រមាណ ៣៥០ លានដុងក្នុងមួយឆ្នាំ។ ក្រៅពីធ្វើសេដ្ឋកិច្ចពូកែ លោក ឡឹមថាញ់ហុង ថែមទាំងសកម្មចូលរួមចលនារបស់សមាគមជាគំរូក្នុងការបរិច្ចាគនូវមូលនិធិផ្សេងៗដែលភូមិភាគបានបំផុសចលនា ព្រមទាំងមានទឹកចិត្តចែករំលែកបទពិសោធន៍ផលិត ដើម្បីឱ្យមាមីងរួមគ្នាឈានឡើង លំនឹងជីវភាព។

តាមប្រសាសន៍លោក ថាច់ខេមរា ប្រធានសមាគមកសិករឃុំមីហឿង ឱ្យដឹង៖ “លោកហុង ជាសមាជិកសមាគមកសិករដែលឧស្សាហ៍ព្យាយាម និងមានគំនិតច្នៃប្រតិដ្ឋក្នុងការផលិត ដូច្នេះតែងជោគជ័យក្នុងទម្រង់សេដ្ឋកិច្ចកសិកម្ម។ ផ្តើមពីការជោគជ័យនោះ លោកបានសកម្មចែករំលែកបទពិសោធន៍ដល់សមាជិកដទៃទៀត ដើម្បីរួមគ្នាផលិត បង្កើនប្រាក់ចំណូល លំនឹងជីវភាព និងរួមចំណែកជំរុញសេដ្ឋកិច្ច- សង្គមនៅភូមិភាគឱ្យអភិវឌ្ឍដោយចីរភាព”៕

ថាញ់វ៉ាង-ត្រឹងរ៉ូន

ចែករំលែកអត្ថបទ

ពាក្យគន្លឹះ