សន្តិសុខ - ការពារប្រទេស ការពារប្រទេស

14/08/2026 - 06:07

កងទ័ពការពារព្រំដែនទីក្រុងកឹងធើ បានជួយសង្គ្រោះអ្នកនេសាទ ៥នាក់ និងកប៉ាល់ជួបគ្រោះថ្នាក់នៅលើសមុទ្រ

នៅថ្ងៃទី១៣ ខែសីហា កងនាវាការពារព្រំដែននៃកងទ័ពការពារព្រំដែនទីក្រុងកឹងធើ បានឱ្យដឹង៖ អង្គភាពបានសហការជាមួយប្រជានេសាទ ធ្វើការជួយសង្គ្រោះបានជោគជ័យនូវកប៉ាល់នេសាទលេខ AG ៩៦២២០ TS ព្រមទាំង ៥នាក់ ដែលជួបគ្រោះថ្នាក់នៅលើសមុទ្រ ដោយបាននាំយកទូក និងអ្នករងគ្រោះចូលមកច្រាំងដោយសុវត្ថិភាព។

គ្រូពេទ្យយោធារបស់អង្គភាព បានពិនិត្យសុខភាពជូនអ្នកជួបគ្រោះ។

មុននោះ នៅវេលាម៉ោង ៥ល្ងាច ថ្ងៃទី១២ ខែសីហា កងនាវាការពារព្រំដែន ទទួលបានព័ត៌មានរាយការណ៍របស់ លោកង្វៀងវ៉ាំងដាក់ កើតឆ្នាំ ១៩៨៥ ស្រុកកំណើតនៅភូមិអៀងឃ្វី ឃុំតីអៀង ខេត្តអាងយ៉ាង ជាម្ចាស់កប៉ាល់លេខ AG ៩៦២២០ TS (កប៉ាល់ភ័ស្តុភារ) បានជូនដំណឹងពីកប៉ាល់ជួបគ្រោះថ្នាក់ពេលចេញដំណើរទៅកាន់កំពង់ផែសមុទ្រត្រឹងដេ។ តាមព័ត៌មានដំបូង កប៉ាល់លេខ AG ៩៦២២០ TS បានជួបគ្រោះថ្នាក់នៅនិយាមការ ០៩°១៧’០០”N - ១០៦°២១’០០”E ចម្ងាយពីកំពង់ផែត្រឹងដេ ប្រមាណ ១៨ គាវុធ។ ដោយសារឥទ្ធិពលនៃរលកធំ ខ្យល់ខ្លាំង និងទឹកសមុទ្រនាថទាប បណ្តាលឱ្យទូកជាប់នឹងទួលខ្សាច់ រហូតដល់ទឹកចូល។ នៅពេលកើតហេតុលើ កប៉ាលមានមនុស្សចំនួន ៥នាក់។

បន្ទាប់ពីទទួលបានព័ត៌មាន កងនាវាការពារព្រំដែន បានចាត់ឱ្យកប៉ាល់លេខ BP ១៨-១២-០១ ដែលកំពុងសកម្មភាពនៅជិតតំបន់នោះឱ្យទៅជួយភ្លាម។ តែដោយសារអាកាសធាតុប្រែប្រួលអាក្រក់ ទឹកសមុទ្រស្រកទាប និងតំបន់ជុំវិញមានទួលខ្សាច់ច្រើន កប៉ាល់មិនអាចចូលទៅជិតនឹងកប៉ាលដែលរងគ្រោះដោយផ្ទាល់បានឡើយ។ ចំពោះស្ថានការណ៍នេះ កងនាវាការពារព្រំដែន បានសហការជាមួយប៉ុស្តិ៍ការពារព្រំដែនទ្រុងប៊ិញ ជូនដំណឹង និងកៀរគរកប៉ាល់នេសាទរបស់ប្រជាជនដែលកំពុងនេសាទនៅជិតតំបន់នោះ ឱ្យមកជួយសង្គ្រោះ។

នៅម៉ោង ៦ព្រឹក ថ្ងៃទី១៣ ខែសីហា កប៉ាល់ឈ្មោះ ធៀងផាក់ លេខ BT ៩៦៩៧៩ TS អាយ័្រយ លោក ត្រឹងថាញ់ហ៊ុង ស្រុកកំណើតនៅឃុំម៉កាយ ខេត្តវិញឡុង ជាម្ចាស់កប៉ាល់ បានចូលទៅជិតកប៉ាល់ AG ៩៦២២០ TS។ កប៉ាល់ធៀងផាត់ រួមជាមួយកប៉ាល់ BP ១៨-១២-០១ បានអូសសណ្តោងកប៉ាល់រងគ្រោះចូលមកច្រាំង។ នៅវេលាម៉ោង ១១និង៥៥នាទី ថ្ងៃដដែល កប៉ាល់ AG ៩៦២២០ TS ត្រូវបានអូសសណ្តោងមកដល់កំពង់ផែកងនាវាការពារព្រំដែនដោយសុវត្ថិភាព។ គ្រូពេទ្យយោធារបស់អង្គភាពបានពិនិត្យសុខភាពជូនអ្នកជួបគ្រោះទាំង ៥នាក់។ បច្ចុប្បន្ន សុខភាពរបស់អ្នកទាំង៥ បានស្រួលឡើងវិញ ហើយកប៉ាល់បានសុវត្ថិភាព។ កងនាវាការពារព្រំដែន កំពុងបន្តអនុវត្តបែបបទចាំបាច់នានា ដើម្បីប្រគល់មនុស្ស និងកប៉ាល់ទៅតាមបទប្បញ្ញត្តិ៕

យ្វីអាញ -ត្រឹងរ៉ូន

ចែករំលែកអត្ថបទ

ពាក្យគន្លឹះ