សន្តិសុខ - ការពារប្រទេស ការពារប្រទេស

31/07/2026 - 06:58

អាហារពោរពេញដោយទឹកចិត្តមេត្តាធម៌សម្រាប់អ្នកក្រ និងសិស្សានុសិស្ស

រយៈពេលកន្លង នគរបាលឃុំអាងថាញ់ ទីក្រុងកឹងធើ បានផ្សព្វផ្សាយអនុវត្តយ៉ាងមានប្រសិទ្ធភាពនូវទម្រង់ “នំបុ័ង ០ ដុង - ផ្តល់ក្តីទំនុកចិត្ត” រួមចំណែកជួយឧបត្ថម្ភដល់ប្រជាជនមានជីវភាពលំបាក ព្រមទាំងផ្គួបផ្សំការផ្សព្វផ្សាយច្បាប់ លើកកម្ពស់ស្មារតីបង្ការ បង្ក្រាបបទល្មើស និងអបាយមុខសង្គមក្នុងប្រជាជន។ តាមរយៈនោះ ឈានទៅរកការកសាងជំហរយុទ្ធសាស្រ្តសន្តិសុខប្រជាជនយ៉ាងរឹងមាំតាំងពីមូលដ្ឋាន។

កងកម្លាំងនគរបាលឃុំអាងថាញ់ ទីក្រុងកឹងធើ ជួយឧបត្ថម្ភអាហារដោយឥតគិតថ្លៃ ដល់ប្រជាជនដែលមានជីវភាពលំបាក និងសិស្សានុសិស្សនៅក្នុងភូមិសាស្រ្ត។

នៅម៉ោងប្រហែលជាង ៥ ព្រឹក រៀងរាល់ថ្ងៃ ច័ន្ទ នៅទីធ្លានៃទីស្នាក់ការនគរបាលឃុំ អាងថាញ់ ចាប់ផ្តើមមានភាពអ៊ូអរ។ អ្នកខ្លះរៀបចំនំបុ័ង អ្នកខ្លះរៀបចំទឹកផឹក អ្នកខ្លះទៀតពិនិត្យមើលកញ្ចប់អំណោយនីមួយៗឡើងវិញ មុនពេលចែកជូនដល់ប្រជាជននិងសិស្សានុសិស្ស។ ក្លិននំបុ័ងក្តៅៗ ក្រអូបសាយភាយពេញបរិយាកាសពេលព្រឹកព្រលឹម បង្កអារម្មណ៍ជិតស្និទ្ធ និងកក់ក្តៅ។

ទម្រង់ “នំបុ័ង ០ ដុង - ផ្ដល់ជូនក្តីទំនុកចិត្ត” បាននគរបាលឃុំអាងថាញ់ធ្វើជាប្រចាំ ដើម្បីជួយឧបត្ថម្ភដល់ប្រជាជនមានជីវភាពលំបាក និងសិស្សានុសិស្សនៅក្នុងភូមិភាគ។ គិតមកទល់ពេលនេះ ទម្រង់នេះបានរៀបចំឡើងបានចំនួន ៨ លើករួចមកហើយ។ ទោះបីជាតម្លៃនៃអាហារនីមួយៗមិនធំដុំប៉ុន្មាន ប៉ុន្តែ វាមានអត្ថន័យជាក់ស្តែង ក្លាយជាស្ពានចម្លងជួយឱ្យកងកម្លាំងនគរបាលកាន់តែនៅជិតស្និទ្ធ និងយល់ដឹងពីប្រជាជនកាន់តែច្បាស់។

សិស្សានុសិស្សជាច្រើនដែលទៅរៀនពីព្រលឹម តែងឆៀងចូលមកទទួលនំបុ័ង រួចទើបទៅសាលា រៀន។ ផ្តើមពីភាពសាមញ្ញទាំងនោះ កម្មាភិបាលនគរបាលបានឆ្លៀតឱកាសរំលឹកប្អូនៗឱ្យគោរពច្បាប់ចរាចរណ៍ ជៀសឆ្ងាយពីបារីអេឡិចត្រូនិក គ្រឿងញៀននានា និងមានការប្រុងប្រយ័ត្នខ្ពស់ចំពោះល្បិចបោកប្រាស់តាមបណ្តាញសង្គម។

ប្អូនង្វៀងមិញខូយ សិស្សថ្នាក់ទី ៩ នៃសាលាអនុវិទ្យាល័យអាងថាញ់ បានចែករំលែកថា៖ “ពូៗនគរបាលតែងតែរំលឹកយើងខ្ញុំឱ្យពាក់មួកសុវត្ថិភាព ពេលបើកបរមិនត្រូវប្រើប្រាស់បារីអេឡិចត្រូនិក ឬសារធាតុគ្រឿងញៀននោះទេ។ ក្រៅពីនេះ ពួកគាត់នៅទាំងផ្តាំផ្ញើយើងខ្ញុំឱ្យមានការប្រុងប្រយ័ត្នចំពោះអ្នកចំឡែកនៅលើបណ្តាញសង្គមផងដែរ។ ខ្ញុំយល់ថាការរំលឹកទាំងនោះគឺជិតស្និទ្ធខ្លាំងណាស់ និងងាយចងចាំ”។

មិនត្រឹមតែចែកនំបុ័ងប៉ុណ្ណោះទេ កម្មាភិបាលគរបាលឃុំថែមទាំងម្ចាស់ការជជែកលេងជាមួយប្រជាជនអំពីបញ្ហាសន្តិសុខនិងសណ្តាប់ធ្នាប់នៅក្នុងភូមិភាគទៀតផង។ ខ្លឹមសារនៃការផ្សព្វផ្សាយបានផ្គួបផ្សំប្រកបដោយភាពសាមញ្ញ ដូចជាការប្រុងប្រយ័ត្នចំពោះការហៅទូរស័ព្ទចំឡែក មិនឱ្យខ្ចីគណនីធនាគារ លើកកម្ពស់ស្មារតីបង្ការទប់ស្កាត់អំពើចោរកម្ម និងរាយការណ៍ពីបទល្មើស។

បងស្រី ត្រឹងធីហុង នៅឃុំអាងថាញ់បានឱ្យដឹង៖ “តាមរយៈការជជែកលេងទាំងនោះ ខ្ញុំបានយល់ដឹងបន្ថែមទៀតទង្វើល្បិចបោកប្រាស់ និងចោរកម្មជាច្រើន ទើបមានការប្រុងប្រយ័ត្នជាងមុន។ ពេលមានហេតុការណ៍ពាក់ព័ន្ធនឹងសន្តិសុខសណ្តាប់ធ្នាប់ ប្រជាជនក៏ហ៊ានរាយការណ៍ជូននគរបាលដើម្បីដោះស្រាយបានទាន់ពេល”។

តាមលោកវរសេនីយ៍ទោ ឡេហ្វាងកេ - ប្រធាននគរបាលឃុំអាងថាញ់ បានឱ្យដឹង ការរួមបញ្ចូលគ្នារវាងសកម្មភាពសប្បុរសធម៌ជាមួយនឹងការផ្សព្វផ្សាយច្បាប់ បានជួយឱ្យប្រជាជនងាយស្រួលទទួលបានព័ត៌មានជាងការផ្សព្វផ្សាយតាមបែបធម្មតា តាមរយៈនោះ រួមចំណែកលើកកម្ពស់ការយល់ដឹងនិងស្មារតីគោរពច្បាប់ក្នុងប្រជាជន ពិសេសគឺយុវជន យុវនារី និងសិស្សានុសិស្ស។

“នំបុ័ងតម្លៃ ០ ដុង - ផ្តល់ជូនក្តីទំទុកចិត្ត” មិនត្រឹមតែជាសកម្មភាពឧបត្ថម្ភអាហារពេលព្រឹកប៉ុណ្ណោះទេ ប៉ុន្តែថែមទាំងជាវិធីសាស្ត្រនាំយកច្បាប់ឱ្យខិតជិតប្រជាជន តាមរយៈការចែករំលែក និងការទទួលខុសត្រូវផងដែរ។ ផ្តើមពីចំណុចដ៏សាមញ្ញទាំងនោះ ក្តីទំទុកចិត្តរបស់ប្រជាជនចំពោះកងកម្លាំងនគរបាលកាន់តែបានពង្រឹង រួមចំណែកកសាងជំហរយុទ្ធសាស្រ្តសន្តិ សុខប្រជាជនយ៉ាងរឹងមាំចាប់តាំងពីមូលដ្ឋាន៕

ដាលីន

ចែករំលែកអត្ថបទ

ពាក្យគន្លឹះ