វប្បធម៌-សិល្បៈ វប្បធម៌

28/06/2026 - 11:00

វិមានលោកប្រធានហូជីមិញ – កន្លែងទេសចរណ៍គំរូនៃតំបន់វាលរាបទន្លេគឺវឡុង

វិមានលោកប្រធានហូជីមិញ ស្ថិតនៅសង្កាត់ឡុងឌឹក ខេត្តឡុងវិញ មិនត្រឹមតែជាអាសយដ្ឋានក្រហមអប់រំប្រពៃណីបដិវត្តន៍ប៉ុណ្ណោះទេ ថែមទាំងជាគោលដៅទាក់ទាញភ្ញៀវទេសចរទៀតផង។ ជាមួយនឹងតម្លៃប្រវត្តិសាស្ត្រ ស្ថាបត្យកម្មដ៏វិចិត្រ និងបរិយាកាសបៃតងស្រស់បំព្រង ទីនេះត្រូវបានទទួលស្គាល់ជាតំបន់ទេសចរណ៍គំរូនៅតំបន់វាលរាបទន្លេគឺវឡុងផងដែរ។

ស្ថិតនៅកណ្តាលបរិយាកាសដ៏ស្ងប់ស្ងាត់ ដើមឈើចោលម្លប់ត្រជាក់ត្រជុំ វិមានលោកប្រធានហូជីមិញ គឺជាសំណង់មួយដែលមានអត្ថន័យប្រវត្តិសាស្ត្រ និងវប្បធម៌ដ៏ពិសេសរបស់ខេត្តវិញឡុង។ រៀងរាល់ឆ្នាំ ទីនេះបានទទួលកម្មាភិបាល សម្ព័ន្ធយុវជន សិស្សនិស្សិត និងភ្ញៀវទេសចរជាង ១០០ ក្រុម ដែលបានមកអុជធូបគោរពវិញ្ញាណក្ខន្ធលោកប្រធានហូជីមិញ ព្រមទាំងស្វែងយល់ពីប្រពៃណីតស៊ូបដិវត្តន៍របស់កងទ័ព និងប្រជាជននៅភូមិភាគ។

វិមាននរំលឹកនឹកគុណលោកប្រធានហូជីមិញ គឺជាចំណុចលេចធ្លោនៃមណ្ឌលកេរដំណែល កន្លែងដែលប្រជាជន និងភ្ញៀវទេសចរមកអុជធូប។

ទម្រង់ផ្ទះរតអ៊ំហូ នៅតំបន់មណ្ឌលកេរដំណែល បានរចនាឡើងតាមគំរូដើមនៃផ្ទះរតអ៊ំហូនៅខុទ្ទកល័យលោកប្រធានរដ្ឋនៅរដ្ឋធានីហាណូយ។ សំណង់ធ្វើពីឈើ មានដំបូលប្រក់ក្បឿង រួមមានជាន់ផ្ទាល់ដី និងជាន់លើ ដែលមានផ្ទៃដីសាងសង់ ៦៥,១ ម៉ែត្រការ៉េ។

វិមាននេះបានចាប់ផ្តើមសាងសង់នៅថ្ងៃទី ១០ ខែមីនា ឆ្នាំ ១៩៧០ ក្នុងអំឡុងពេលដែលការតស៊ូប្រឆាំងអាមេរិកផ្ទុះឡើងយ៉ាងខ្លាំងក្លា។ ទោះបីជាមានការលំបាកយ៉ាងណាក៏ដោយ កងទ័ព និងប្រជាជនឡុងឌឹក នៅតែប្តេជ្ញាចិត្តសាងសង់វិមាននេះ ដើម្បីបង្ហាញពីទឹកចិត្តគោរពចំពោះអ៊ំហូ។ សំណង់នេះបានសម្ពោធនៅយប់ថ្ងៃចូលឆ្នាំថ្មីឆ្នាំតឹងហើយ ១៩៧១ ក្លាយជានិមិត្តរូបនៃជំនឿ និងឆន្ទៈដ៏មោះមុត។ ក្នុងសម័យសង្គ្រាម វិមាននេះបានបំផ្លាញដោយគ្រាប់បែកជាច្រើនដង។ គ្រាន់តែប៉ុន្មានខែបន្ទាប់ពីថ្ងៃសម្ពោធ ខ្មាំងបានកេនយន្តហោះ និងកាំភ្លើងធំមកវាយប្រហារ និងដុតបំផ្លាញវិមាននេះ។ ទោះជាយ៉ាងណាក៏ដោយ ដោយស្មារតី កងទ័ព និងប្រជាជនឡុងឌឹក បានប្រយុទ្ធផងនិងកសាងវិមាននេះឡើងវិញជាលើកទីពីរយ៉ាងរហ័សនៅនិទាឃរដូវឆ្នាំ ១៩៧២។ ក្នុងប៉ុន្មានថ្ងៃចុងក្រោយនៃខែមេសា ឆ្នាំ ១៩៧៥ មុនពេលភាគខាងត្បូងរំដោះទាំងស្រុង ខ្មាំងក៏បានបន្តទម្លាក់គ្រាប់បែកធ្វើឱ្យខូចខាតផ្នែកមួយនៃសំណង់នេះ។ បន្ទាប់ពីប្រទេសជាតិបានឯកភាព វិមាននេះត្រូវបានវិនិយោគជួសជុល និងកែលម្អឱ្យកាន់តែស្រស់ស្អាតនៅលើបរិវេណទំហំប្រហែល ៤,៥ ហិកតា។

សព្វថ្ងៃ ពេលដើរឆ្លងកាត់ច្រកចូលវិមាន ភ្ញៀវទេសចរនឹងមានអារម្មណ៍ភ្លាមៗនៃបរិយាកាសដ៏ស្ងប់ស្ងាត់ជាមួយនឹងជួរដើមឈើខៀវស្រងាត់ សួនផ្កា ស្រះត្រី និងផ្លូវដើរដ៏ស្អាតបាត។ មជ្ឈមណ្ឌលនៃរមណីយដ្ឋានគឺវិមានបានសាងសង់តាមស្ថាបត្យកម្មប្រពៃណី ដំបូលក្បឿងពណ៌ក្រហមលេចធ្លោកណ្តាលផ្ទៃមេឃពណ៌ខៀវ។ ខាងក្នុងវិមាន មានតម្កល់រូបសំណាក និងទីសក្ការបូជាលោកប្រធានហូជីមិញ បង្កជាបរិយាកាសដ៏ស្ងៀមស្ងាតដើម្បីប្រជាជន និងភ្ញៀវទេសចរចូលមកអុជធូបគោរពបូជា។ មិនត្រឹមតែមានតម្លៃខាងផ្លូវចិត្ត និងប្រវត្តិសាស្ត្រប៉ុណ្ណោះទេ រមណីយដ្ឋាននេះបានរក្សាទុកនូវវត្ថុតាង រូបភាព និងឯកសារមានតម្លៃជាច្រើនអំពីដំណាក់កាលសាងសង់ ការពារវិមាន ក៏ដូចជាស្នាដៃរបស់កងទ័ព និងប្រជាជនឡុងឌឹក ក្នុងសម័យតស៊ូសង្គ្រាមទៀតផង។ នេះគឺជាប្រភពឯកសារដ៏រស់រវើកសម្រាប់បម្រើដល់ការងារអប់រំប្រពៃណីស្នេហាជាតិដល់យុវជនជំនាន់ក្រោយ ជួយឱ្យយើងម្នាក់ៗយល់កាន់តែច្បាស់អំពីការលះបង់ដ៏ធំធេងរបស់បុព្វបុរស ដើម្បីដណ្តើមយកឯករាជ្យ សេរីភាពជូនប្រជាជាតិ។

វត្ថុតាងដែលប្រមូលបានពីខ្មាំងក្នុងសម័យតស៊ូសង្គ្រាម បានរក្សាទុក និងដាក់តាំងនៅមណ្ដលកេរដំណែលវិមានលោកប្រធានហូជីមិញ។

មកដល់វិមានអ៊ំហូ ភ្ញៀវទេសចរមិនត្រឹមតែបានស្វែងយល់អំពីប្រវត្តិសាស្ត្រប៉ុណ្ណោះទេ ថែមទាំងមានឱកាសរីករាយនឹងបរិយាកាសដ៏បរិសុទ្ធ ស្ងប់ស្ងាត់ទៀតផង។ ជួរដើមឈើធំៗ ស្មៅខៀវស្រងាត់ រួមជាមួយនឹងបរិវេណដែលបានថែទាំយ៉ាងយកចិត្តទុកដាក់ បង្កើតបានជាទេសភាពដ៏ស្រស់បំព្រង សមស្របសម្រាប់រាល់សកម្មភាពទស្សនា រៀនសូត្រ និងលម្ហែកាយ។ នេះក៏ជាគោលដៅបានជ្រើសរើសជាញឹកញាប់ក្នុងកម្មវិធីត្រឡប់មករកប្រភពដើម ដំណើរទស្សនកិច្ចក្រហម និងដំណើរទេសចរណ៍ស្វែងយល់វប្បធម៌ – ប្រវត្តិសាស្ត្ររបស់ខេត្តវិញឡុង។

ជ្រុងមួយនៃបរិវេណមណ្ឌលកេរដំណែលវិមានលោកប្រធានហូជីមិញ ជាមួយនឹងបរិយាកាសបៃតងស្រស់បំព្រង ស្អាតបាត ដែលបង្កើតចំណាប់អារម្មណ៍ដល់ភ្ញៀវទេសចរ។

វិមានលោកអ៊ំហូបានទទួលស្គាល់ជាបេតិកភណ្ឌប្រវត្តិសាស្ត្រ – វប្បធម៌ថ្នាក់ជាតិចាប់តាំងពីឆ្នាំ ១៩៨៩ និងជាតំបន់ទេសចរណ៍គំរូនៃវាលរាបទន្លេគឺវឡុង ចាប់តាំងពីឆ្នាំ ២០២២ មក។ វិមានលោកប្រធានហូជីមិញ មិនត្រឹមតែរក្សាទុកនូវតម្លៃប្រវត្តិសាស្ត្រ វប្បធម៌ដ៏ពិសេសប៉ុណ្ណោះទេ ថែមទាំងជាគោលដៅទាក់ទាញសម្រាប់ភ្ញៀវទេសចរទៀតផង។ ជាមួយបរិយាកាសដ៏ស្ងៀមស្ងាត់ ទេសភាពបៃតងស្រស់បំព្រង ទីនេះថែមទាំងបានរួមចំណែកអប់រំប្រពៃណីបដិវត្តន៍ បណ្តុះទឹកចិត្តស្នេហាជាតិ និងផ្សព្វផ្សាយរូបភាពខេត្តវិញឡុង ទៅកាន់មិត្តភក្តិជិតឆ្ងាយទៀតផង៕

ទីទុយ - លីសៀ

ចែករំលែកអត្ថបទ

ពាក្យគន្លឹះ