ព្រឹត្តិការណ៍ - នយោបាយ ព្រឹត្តិការណ៍

05/06/2026 - 20:15

កាម៉ាវ បើកពិធីតាំងពិព័រណ៍ "ការរស់ឡើងវិញនៃតំបន់ដីស្លាប់"

នៅព្រឹកថ្ងៃទី ៥ ខែមិថុនា បញ្ជាការដ្ឋានកងទ័ពគីមីសាស្ត្រសហការជាមួយអគ្គបញ្ជាការដ្ឋានយោធភូមិភាគ ៩ មន្ទីរវប្បធម៌ កីឡានិងទេសចរណ៍ខេត្តកាម៉ាវ និងសមាគមអ្នករងគ្រោះជាតិពុលពណ៌លឿងឌីអុកស៊ីនវៀតណាម ខេត្តកាម៉ាវបានចាត់តាំងពិធីបើកតាំងពិព័រណ៍ជាមួយប្រធានបទ “ការរស់ឡើងវិញនៃតំបន់ដីស្លាប់” នៅតំបន់អនុស្សាវរីយ៍តន្រ្តីករកាវវ៉ាំងឡូវនៅសង្កាត់បាកលីវ។ ឧត្តមសេនីយ៍ត្រី ត្រឿងថាញ់ផុង - អនុប្រធានសេនាធិការយោធភូមិភាគ៩ និងលោកវរសេនីយ៍ឯកម៉ាយវ៉ាំងហ្វា- អនុប្រធាននាយកដ្ឋាននយោបាយយោធភូមិភាគ៩ បានអញ្ជើញចូលរួម និងកាត់ខ្សែបូបើកពិធីតាំងពិព័រណ៍នេះ។

តំណាងថ្នាក់ដឹកនាំកាត់ខ្សែបូបើកពិធីតាំងពិព័រណ៍។

តាំងពិព័រណ៍នេះត្រូវបានចាត់តាំងឡើងចំឱកាសទិវាបរិស្ថានពិភពលោក និងអបអរសាទរខួបអនុស្សាវរីយ៍លើកទី ៦៥ មហន្តរាយនៃពណ៌លឿងវៀតណាម ដូច្នេះវាមានអត្ថន័យនយោបាយសង្គមនិងមនុស្សធម៌យ៉ាងជ្រាលជ្រៅ រួមចំណែកក្នុងការឃោសនាផ្សព្វផ្សាយអំពីផលវិបាកនៃសង្គ្រាមគីមី ព្រមទាំងលើកតម្កើងនូវរាល់ការខិតខំប្រឹងប្រែងក្នុងការជម្នះផលវិបាកជាតិពុលពណ៌លឿង/ឌីអុកស៊ីន ការការពារបរិស្ថាននិងការថែទាំអ្នករងគ្រោះដោយសារជាតិពុលពណ៌លឿង។

ថ្លែងការណ៍ក្នុងពិធីនេះ តំណាងថ្នាក់ដឹកនាំបញ្ជាការដ្ឋានកងទ័ពគីមីបានសង្កត់ធ្ងន់ថា ក្នុងដំណាក់កាលឆ្នាំ ១៩៦១ - ១៩៧១ កងទ័ពអាមេរិកបានបាញ់បាចសារធាតុគីមីពុលជាង ៨០ លានលីត្រនៅលើទឹកដីវៀតណាម ក្នុងនោះមានជាង ៦១% ជាជាតិពុលពណ៌លឿងផ្ទុកសារធាតុឌីអុកស៊ីនពុលខ្លាំងបំផុត។ ផលវិបាកដែលបន្សល់ទុកគឺធ្ងន់ធ្ងរខ្លាំងណាស់ចំពោះមនុស្សជាតិ បរិស្ថាននិងប្រព័ន្ធជីវសាស្រ្ត ជះឥទ្ធិពលអូសបន្លាយមកជាច្រើនជំនាន់។ ចំពោះខេត្តកាម៉ាវដែលជាភូមិភាគមួយក្នុងចំណោមភូមិភាគដែលរងឥទ្ធិពលយ៉ាងធ្ងន់ធ្ងរពីសង្គ្រាមគីមី សារធាតុពុលនេះបានបង្កការខូចខាតយ៉ាងធ្ងន់ធ្ងរដល់ប្រព័ន្ធជីវសាស្រ្តព្រៃលិចទឹក ប្រភពទឹក និងជីវភាពរបស់ប្រជាជន។ រហូតមកដល់បច្ចុប្បន្ន គ្រួសារជាច្រើននៅតែបន្តរងការឈឺចាប់ដោយសារជាតិពុលពណ៌លឿង ជាមួយសាច់ញាតិដែលមានជំងឺ និងពិការភាពពីកំណើត ដោយសារផលវិបាកនៃសារធាតុគីមីពុលនេះ។

តំណាងចូលទស្សនាការតាំងពិព័រណ៍រូបភាព ឯកសារនិងវត្ថុតាង។

តាំងពិព័រណ៍លើកនេះ បានឧទ្ទេសនាមខ្លឹមសារប្រធានបទចំនួន ៤៥ ជាមួយនឹងរូបភាព ឯកសារ និងវត្ថុតាងដ៏មានតម្លៃជាច្រើន ឆ្លុះបញ្ចាំងពីមហន្តរាយជាតិពុលគីមីពណ៌លឿង ដំណើរការដោះស្រាយផលវិបាកនៃសង្គ្រាមគីមី សកម្មភាពជំនួយអ្នករងគ្រោះដោយជាតិពុលគីមីពណ៌លឿង និងកិច្ចខិតខំប្រឹងប្រែងស្វែងរកយុត្តិធម៌សម្រាប់អ្នករងគ្រោះ។ ពិសេស ពិធីតាំងពិព័រណ៍នេះបានផ្តល់ខ្លឹមសារជាច្រើនដើម្បីឧទ្ទេសនាមពីលទ្ធផលរបស់យោធភូមិភាគទី ៩ និងខេត្តកាម៉ាវ ក្នុងការងារដោះស្រាយផលវិបាកនៃគ្រាប់មីនជាតិពុលគីមីដែលនៅសេសសល់ក្រោយពីសង្គ្រាម ការការពារបរិស្ថាន និងការអភិវឌ្ឍប្រកបដោយចីរភាព។

ក្នុងប៉ុន្មានឆ្នាំនេះ បញ្ជាការដ្ឋានកងទ័ពគីមីសាស្ត្រ បានម្ចាស់ការក្នុងការស៊ើបអង្កេត និងដោះស្រាយតំបន់រងការបំពុលសារធាតុឌីអុកស៊ីនជាច្រើនកន្លែងក្នុងទូទាំងប្រទេស រួមចំណែកក្នុងការស្តារបរិស្ថានឡើងវិញនៅតាមចំណុចក្តៅក្រោយពីសម័យសង្គ្រាម។ ទន្ទឹមនឹងនោះ ក៏មានសកម្មភាពជាច្រើនដើម្បីជំនួយ ថែទាំនិងលើកកម្ពស់គុណភាពជីវភាពសម្រាប់អ្នករងគ្រោះដោយសារជាតិពុលគីមីពណ៌លឿងផងដែរ។ តាមរយៈការតាំងពិព័រណ៍នេះ គណៈចាត់តាំងមានបំណងលើកកម្ពស់ការយល់ដឹងរបស់សហគមន៍អំពីផលវិបាកនៃសង្គ្រាមគីមី សាយភាយប្រពៃណី "ផឹកទឹកនឹកដល់ប្រភព" និងបំផុសស្មារតីទទួលខុសត្រូវរបស់សង្គមទាំងមូលក្នុងការរួមដៃគ្នាជំនួយអ្នករងគ្រោះដោយសារជាតិពុលគីមីពណ៌លឿងនិងកសាងបរិស្ថានរស់នៅបៃតង ប្រកបដោយចីរភាពសម្រាប់ជំនាន់ក្រោយៗ។

ក្នុងឱកាសនេះ គណៈចាត់តាំងការតាំងពិព័រណ៍ បានសហការជូនអំណោយចំនួន ៥០ ចំណែកដល់អ្នករងគ្រោះ និងគ្រួសារអ្នករងគ្រោះដោយសារជាតិពុលគីមីពណ៌លឿង នៅលើភូមិសាស្រ្តខេត្តកាម៉ាវ។ ការតាំងពិព័រណ៍នេះ នឹងប្រព្រឹត្តទៅចាប់ពីពេលនេះ រហូតដល់ថ្ងៃទី ០៥ ខែកក្កដា ឆ្នាំ២០២៦៕

យ្វីអាញ់-ដាលីន

ចែករំលែកអត្ថបទ

ពាក្យគន្លឹះ