ខេត្តកាម៉ាវ មានទីតាំងយុទ្ធសាស្ត្រដ៏សំខាន់ក្នុងការការពារប្រទេសនិងសន្តិសុខជាមួយឆ្នេរសមុទ្រដ៏វែង មានដងទន្លេច្រើន ជាកន្លែងនេសាទដ៏ធំទូលាយ អ្នកនេសាទរស់នៅច្រើននិងធ្វើការនៅតាមឆ្នេរសមុទ្រ។ នេះជាឧត្តមភាពរបស់ខេត្តកាម៉ាវ ក្នុងការអភិវឌ្ឍសេដ្ឋកិច្ចសមុទ្រ។ ពិសេសអធិបតេយ្យសន្តិសុខ ការពារព្រំដែនសមុទ្រនិងកោះរបស់ខេត្តត្រូវបានរក្សារឹងមាំ; សន្តិសុខនយោបាយ សណ្តាប់ធ្នាប់ សុវត្ថិភាពសង្គមមានស្ថិរភាព; ប្រព័ន្ធនយោបាយមូលដ្ឋានបានពង្រឹង។
សកម្មភាពគិតគូរដល់ជីវភាពរបស់ប្រជាជននៅតំបន់ព្រំដែនសមុទ្រ បានប៉ុស្តិ៍ការពារព្រំដែននៅខេត្តកាម៉ាវ យកចិត្តទុកដាក់រួមចំណែកលើកកម្ពស់មនោសញ្ចេតនារវាងកងទ័ព- ប្រជាជនតំបន់ព្រំដែនសមុទ្រ។
ឧបត្ថម្ភជីវភាពប្រជាជននៅតំបន់ព្រំដែនសមុទ្រ
ឆ្នាំនេះ ប៉ុស្តិ៍ការពារព្រំដែនហ្គាញ់ហាវ ជាអង្គភាពនាំមុខក្នុងការរៀបចំសកម្មភាពដ៏មានអត្ថន័យ បានសហការយ៉ាងជិតស្និទ្ធជាមួយគណៈកម្មាធិការប្រជាជនឃុំហ្គាញ់ហាវ និងគណៈកម្មាធិការប្រជាជនឃុំឡុងឌៀង ជួយដល់គ្រួសារដែលមានជីវភាពខ្វះខាតបានទទួលបុណ្យចូលឆ្នាំថ្មីប្រកបដោយភាពកក់ក្ដៅ។
លោក វរសេនីយ៍ទោ ផាមថាញញ៉ឹង ស្នងការនយោបាយប៉ុស្តិ៍ការពារព្រំដែនហ្គាញ់ហាវ ចែករំលែក៖ “ក្នុងចំណោមសកម្មភាពទាំងឡាយនេះ ក្នុងនោះ លេចធ្លោបំផុតគឺល្វែងលក់ទំនិញសូន្យដុង។ អង្គភាពបានសហការជាមួយប៉ុស្តិ៍ការពារព្រំដែន៖ តឹងតៀង កៃគុង ញ៉ាម៉ាក និងកងទ័ពជើងទឹកការពារព្រំដែនលេខ២ ចាត់តាំងល្វែងទំនិញមនុស្សធម៌ នាំយកផលិតផលក្នុងភូមិស្រុកដើម្បីជួយប្រជាជនដែលមានជីវភាពខ្វះខាត... ‘’។
មិនចំពោះតែប៉ុស្តិ៍ការពារព្រំដែនហ្គាញ់ហាវនោះទេ ឆ្នាំនេះ ប៉ុស្តិ៍ការពារព្រំដែនញ៉ាម៉ាក ក៏បានចាត់តាំងសកម្មភាពជាក់ស្តែងជាច្រើនផងដែរ។ លោកវរសេនីយ៍ទោ ហ្វាងវ៉ាំងយុង មេបញ្ជាការប៉ុស្តិ៍ការពារព្រំដែនញ៉ាម៉ាក មានប្រសាសន៍៖ ‘’អង្គភាពបានប្រគល់ផ្ទះមេត្តាធម៌ ២ ខ្នង និងអំណោយ ២០០ ចំណែកដល់គ្រួសារគោលនយោបាយ គ្រួសារក្រីក្រ និងសិស្សសង្វាតរៀនសូត្រដែលមានជីវភាពខ្វះខាត។ ទន្ទឹមនឹងនោះ អង្គភាពថែមទាំងសហការរៀបចំការពិនិត្យសុខភាព ផ្តល់ថ្នាំពេទ្យឥតគិតថ្លៃ សរុបថវិកាជិត ២០០ លានដុង”។
បងស្រី លីធីអ៊ុក ជាជនជាតិខ្មែររស់នៅភូមិញ៉ាម៉ា (សង្កាត់ហៀបថាញ់ ខេត្តកាម៉ាវ) ទើបទទួលបានផ្ទះមេត្តាធម៌មួយខ្នង តម្លៃ ៦០ លានដុងពីកម្មវិធីនេះ។
បងស្រីលីធីអ៊ុក ចែករំលែក៖ “ផ្ទះចាស់របស់ខ្ញុំធ្វើពីឫស្សីប្រក់ស្លឹក សព្វថ្ងៃទ្រុឌទ្រោមអស់ហើយ ខ្ញុំគ្មានប្រាក់ជួសជុលឡើងវិញ។ អាស្រ័យបានបងៗកងទ័ពការពារព្រំដែនជំនួយផ្ទះថ្មី ឥឡូវនេះ គ្រួសារខ្ញុំមានលំនៅឋានរឹងមាំសម្រាប់ជ្រកក្តៅជ្រកភ្លៀងហើយ។ ដោយមានផ្ទះថ្មី ជីវភាពមិនសូវមានកង្វល់ដូចមុនទៀតនិងឆ្ពោះទៅរកអនាគតភ្លឺស្វាង”។
ជាច្រើនឆ្នាំមកនេះ គណៈកម្មាធិការបក្សនិងកងទ័ពការពារព្រំដែនខេត្តកាម៉ាវ បានដឹកនាំនិងចង្អុលការ ផ្សព្វផ្សាយអនុវត្តទម្រង់កម្មវិធី ចលនាជាក់ស្តែង មានប្រសិទ្ធភាពជាច្រើន ដោយយកប្រជាជនធ្វើជាស្នូល រួមចំណែកដល់ការអភិវឌ្ឍសេដ្ឋកិច្ច វប្បធម៌សង្គម ពង្រឹងការការពារប្រទេស និងសន្តិសុខ កសាងទីតាំងយុទ្ធសាស្រ្តការពារព្រំដែនទូទាំងប្រជាជនរឹងមាំ និងមានកម្លាំងសាយភាយយ៉ាងទូលំទូលាយនៅក្នុងតំបន់ព្រំដែនសមុទ្រ។
គួរកត់សម្គាល់ ការអភិវឌ្ឍសេដ្ឋកិច្ចផ្សារភ្ជាប់ នឹងការបន្ថយភាពក្រីក្រដោយចីរភាព កងទ័ពការពារព្រំដែនខេត្តកាម៉ាវ ធ្វើសេនាធិការ សហការអនុវត្តមានប្រសិទ្ធភាពនូវកម្មវិធីនិងចលនាឆ្ពោះទៅរកទិសដៅតំបន់ព្រំដែន និងកោះសមុទ្រ ចលនាសុខុមាលភាពសង្គម និងកសាងជនបទថ្មី ទីក្រុងស៊ីវិល័យ។
ឆ្លងតាមរយៈទម្រង់នានា “លំនៅឋានសម្រាប់អ្នកក្រនៅតំបន់ព្រំដែន កោះសមុទ្រ”, “លំនៅឋានជាយដែន”, “ព្រួតដៃដើម្បីអ្នកក្រីក្រ- មិនទុកចោលនរណាម្នាក់នៅខាងក្រោយ” និង “និទាឃរដូវប៉ុស្តិ៍ការពារព្រំដែន កក់ក្តៅទឹកចិត្តប្រជាជនភូមិស្រុក”...។ កងកម្លាំងកងទ័ពការពារព្រំដែនខេត្តកាម៉ាវ បានកៀរគរប្រភពថវិការាប់សិបពាន់លានដុងពីសង្គមូបនីយកម្ម ដើម្បីគាំទ្រដល់ការសាងសង់និងជួសជុលផ្ទះរាប់រយខ្នង រួមចំណែកបន្ថយអត្រាគ្រួសារក្រីក្រ និងគ្រួសារក្បែរក្រនៅតំបន់ព្រំដែនសមុទ្រជារៀងរាល់ឆ្នាំ។ រួមចំណែកលំនឹងជីវភាពនិងផ្សារភ្ជាប់ចីរភាពជាមួយតំបន់ព្រំដែនសមុទ្រ។
មនោសញ្ចេតនាកងទ័ពនិងប្រជាជនលើកោះសមុទ្រ
កោះហងជូយ ស្ថិតនៅចម្ងាយពីដីគោកប្រមាណ ១៨ គាវុធ ចំណុះឃុំស៊ុងដុក ខេត្តកាម៉ាវ។ នៅទីនេះ កម្មាភិបាល យុទ្ធជននិងប្រជាជននៅលើកោះ តែងសាមគ្គី ផ្សារភ្ជាប់និងខិតខំប្តេជ្ញាចិត្តទំនាក់ទំនងយ៉ាងជិតស្និទ្ធក្នុងការអនុវត្តភារកិច្ចគ្រប់គ្រង និងការពារអធិបតេយ្យកោះសមុទ្រ។
លោក ត្រឹងវ៉ាំងឡាម ប្រជាជនរស់នៅលើកោះហងជូយ ឱ្យដឹង ជាច្រើនឆ្នាំមកនេះ ប្រជាជននៅលើកោះបានទំនាក់ទំនងយ៉ាងជិតស្និទ្ធ ជាមួយកម្មាភិបាល យុទ្ធជនលើកោះសមុទ្រនេះ។ គ្រប់គ្នាតែងចែករំលែកនិងជួយគ្នាទៅវិញទៅមកក្នុងជីវភាព ការសិក្សា និងពលកម្មផលិត។ ប្រជាជនរស់នៅលើកោះ តែងឱ្យតម្លៃខ្ពស់ចំពោះកម្មាភិបាល យុទ្ធជន និងចាត់ទុកដូចជាសាច់ញាតិក្នុងក្រុមគ្រួសារអញ្ចឹង។
ទោះជាស្ថិតនៅកណ្តាលលំហសមុទ្រ រងការលំបាកក៏ដោយ ប៉ុន្តែចំណងមិត្តភាពរវាងកងទ័ព-ប្រជាជនតែងស្អិតល្មួត ជិតដិត ទាំងនេះបានបញ្ជាក់នូវចំណងមិត្តភាពដ៏រឹងមាំរវាងប្រជាជននិងកម្មាភិបាល យុទ្ធជននៅលើកោះ។ ប្រកៀកស្មាជាមួយប្រជាជន កងកម្លាំងប៉ុស្តិ៍ការពារព្រំដែន ស្ថានីយរ៉ាដា ៦១៥ (តំបន់កងទ័ពជើងទឹកលេខ ៥) និងស្ថានីយ៍សើនបញ្ចាំងភ្លើង។ បងៗ កងកម្លាំងប៉ុស្តិ៍ការពារព្រំដែនទាំងយប់ទាំងថ្ងៃច្បាមទីតាំងរឹងមាំ កាន់កាំភ្លើងការពារអធិបតេយ្យមាតុភូមិផង និងជួយមាមីងក្នុងការពលកម្ម ប្រជុំជីវភាពប្រចាំថ្ងៃផង។ ជីវភាពនៅលើកោះពិតជាលំបាកណាស់ ប៉ុន្តែចំណងមិត្តភាពជិតស្និទ្ធរវាងកងទ័ពនិងប្រជាជនកាន់តែមានតម្លៃជាងអ្វីៗទាំងអស់។
កម្មាភិបាល យុទ្ធជនប៉ុស្តិ៍ការពារព្រំដែនហ្គាញ់ហាវ (ខេត្តកាម៉ាវ) ពិនិត្យជំងឺផ្តល់ថ្នាំពេទ្យឥតគិតថ្លៃជូនប្រជាជននៅតំបន់ព្រំដែនសមុទ្រ។
តាមប្រសាសន៍ លោកវរសេនីយ៍ឯក ផាមមិញយ៉ាង ស្នងការនយោបាយនៃគណៈមេបញ្ជាការកងទ័ពការពារព្រំដែនខេត្តកាម៉ាវ បញ្ជ្រាបយ៉ាងស៊ីជម្រៅអំពីសេចក្តីសម្រេចចិត្តនិងបទបញ្ជារបស់មជ្ឈិម ក្រសួងការពារជាតិ និងអគ្គមេបញ្ជាការកងទ័ពការពារព្រំដែន ព្រមទាំងការដឹកនាំ ចង្អុលការផ្ទាល់របស់គណៈកម្មាធិការបក្សនិងគណៈកម្មាធិការប្រជាជនខេត្តកាម៉ាវ ស្តីពីភារកិច្ចគ្រប់គ្រង ការពារអធិបតេយ្យ និងសន្តិសុខព្រំដែនជាតិក្នុងស្ថានភាពថ្មី គណៈកម្មាធិការបក្សនិងកងទ័ពការពារព្រំដែនខេត្តកាម៉ាវ បានផ្តោតលើការដឹកនាំ ចង្អុលការផ្សព្វផ្សាយអនុវត្តព្រមៗគ្នា ច្នៃប្រតិដ្ឋនូវទម្រង់ជាច្រើន មានកម្មវិធី ការចលនាប្រកបដោយលក្ខណៈទូទៅ អន្តរផ្នែក ផ្សារភ្ជាប់យ៉ាងជិតស្និទ្ធនូវភារកិច្ចការពារប្រទេសនិងសន្តិសុខជាមួយនឹងការអភិវឌ្ឍសេដ្ឋកិច្ច វប្បធម៌សង្គម និងកសាងប្រព័ន្ធនយោបាយនៅមូលដ្ឋានរឹងមាំ។
ផ្តើមពីក្តីទំនុកចិត្តនិងការគាំទ្រពីសំណាក់មហាជន យុទ្ធសាស្រ្តទឹកចិត្តប្រជាជនកាន់តែរឹងមាំពីមួយថ្ងៃទៅមួយថ្ងៃ បង្កបានមូលដ្ឋានគ្រឹះដ៏សំខាន់ដើម្បីការពារអធិបតេយ្យនិងសន្តិសុខព្រំដែនមាតុភូមិ កសាងតំបន់ព្រំដែនសន្តិភាព ស្ថិរភាព និងអភិវឌ្ឍន៍៕
ចិន្តា - ត្រឹងរ៉ូន
នាយក៖ ហ្វិញហ្វាងម៉េន
លិខិតអនុញាតលេខ ៧៨៩/GP- BTTTTអាស្រ័យក្រសួងព័ត៌មាននិងសារគមនាគមន៍ផ្តល់នូវថ្ងៃទី០២-១២-២០២១។លេខ២៤ ត្រឹងវ៉ាំងហ្វាយ សង្កាត់និញកេវ ក្រុងកឹងធើ - ទូរស័ព្ទ: (០២៩២) ៣៨៣០០៩៨
ទូរសារ: (០២៩២) ៣៨៣០៥៦១។ អ៊ីម៉ែល: toasoan@baocantho.com.vn
ទំនាក់ទំនងផ្សាយពាណិជ្ជកម្ម: quangcao@baocantho.com.vn
សរសេរច្បាស់ប្រភព "សារព័ត៌មានអេឡិចត្រូនិកកឹងធើ" នៅពេលផ្សាយបន្តពី websiteនេះ។
អភិវឌ្ឍន៍ដោយ:
ពាក្យគន្លឹះ