គោលនយោបាយ -ការរស់នៅ ច្បាប់

30/01/2026 - 06:15

៣ ដំណាក់កាលបង់ពន្ធសំខាន់ៗ គប្បីយកចិត្តទុកដាក់ដើម្បីជៀសវាងការពិន័យ

ដើមឆ្នាំ២០២៦ អ្នកបង់ពន្ធអាជីវកម្មនិងគ្រួសារធ្វើអាជីវកម្ម គប្បីយកចិត្តទុកដាក់លើដំណាក់កាលនៃការប្រកាសពន្ធ ការបង់ពន្ធនិងការទូទាត់បញ្ជីពន្ធប្រចាំឆ្នាំ ២០២៥ ដើម្បីជៀសវាងការយឺតយ៉ាវ បង្កឱ្យមានការពិន័យជាប្រាក់និងហានិភ័យផ្លូវច្បាប់ផ្សេងៗ។

ស្ថាប័នពន្ធដារស្នើឱ្យអ្នកបង់ពន្ធអាជីវកម្ម និងគ្រួសារធ្វើអាជីវកម្ម ម្ចាស់ការត្រួតពិនិត្យ ដាក់ពាក្យប្រកាសពន្ធនិងទូទាត់បញ្ជីឱ្យបានត្រឹមត្រូវតាមពេលកំណត់។

ដើមឆ្នាំ ២០២៦ ជាពេលដែលត្រូវដាក់ពាក្យប្រកាសពន្ធជាច្រើនពាក់ព័ន្ធនឹងគ្រាគណនាពន្ធចុងឆ្នាំ ២០២៥ និងការទូទាត់បញ្ជីពន្ធប្រចាំឆ្នាំ ប្រសិនបើខ្វះការយកចិត្តទុកដាក់ អ្នកបង់ពន្ធ អាជីវកម្មនិងគ្រួសារធ្វើអាជីវកម្មងាយនឹងបង្កឱ្យមានការយឺត បំពានផ្នែករដ្ឋបាល និងត្រូវចំណាយបន្ថែមប្រាក់ពិន័យដែលមិនគួរមាន។

ដើម្បីជួយដល់អ្នកបង់ពន្ធ អាជីវកម្មនិងគ្រួសារធ្វើអាជីវកម្ម ម្ចាស់ការអនុវត្តកាតព្វកិច្ចពន្ធតាមច្បាប់កំណត់ ស្ថាប័នពន្ធដារទើបចេញនូវសេចក្ដីរំលឹកនានា ដើម្បីជួយឱ្យមុខសញ្ញាទាំងនេះក្តាប់បានទាន់ពេលនូវរាល់ដំណាក់កាលនៃការប្រកាសពន្ធនិងការបង់ពន្ធសំខាន់ៗ។

ការត្រួតពិនិត្យ និងចងចាំដំណាក់កាលដាក់ពាក្យប្រកាសពន្ធតាមខែ តាមត្រីមាស និងពេលកំណត់ទូទាត់បញ្ជីពន្ធប្រចាំឆ្នាំ ២០២៥ នឹងជួយឱ្យអ្នកបង់ពន្ធម្ចាស់ការលើផែនការហិរញ្ញវត្ថុ អនុវត្តបានត្រឹមត្រូវតាមសេចក្ដីកំណត់ និងបន្ថយហានិភ័យផ្លូវច្បាប់ឱ្យនៅកម្រិតទាបបំផុត។

ជាក់ស្តែង យោងតាមសេចក្ដីកំណត់ជាធរមាន កាតព្វកិច្ចប្រកាសពន្ធនិងបង់ពន្ធសម្រាប់គ្រាគណនាពន្ធឆ្នាំ ២០២៥ ត្រូវបានផ្ដោតសំខាន់ក្នុងត្រីមាសទី១។ មាន៣ដំណាក់កាល គប្បីយកចិត្តទុកដាក់សម្រាប់ឯកសារប្រកាសពន្ធនីមួយៗ។

ចំពោះឯកសារប្រកាសពន្ធតាមខែ រយៈពេលបង់ចុងក្រោយគឺថ្ងៃទី ២០ ខែមករា អនុវត្តសម្រាប់គ្រាគណនាពន្ធខែធ្នូ ឆ្នាំ ២០២៥ រួមមានប្រភេទពន្ធ ដូចជា៖ ពន្ធលើតម្លៃបន្ថែម ពន្ធលើប្រាក់ចំណូលបុគ្គល ពន្ធធនធានធម្មជាតិ។ល។

ចំពោះឯកសារប្រកាសពន្ធតាមត្រីមាស រយៈពេលកំណត់ចុងក្រោយគឺថ្ងៃទី២ ខែកុម្ភៈ អនុវត្តសម្រាប់គ្រាគណនាពន្ធត្រីមាសទី ៤ ឆ្នាំ២០២៥ ជាសំខាន់គឺពន្ធលើតម្លៃបន្ថែម និងពន្ធលើប្រាក់ចំណូលបុគ្គល។

ដោយឡែកចំពោះឯកសារទូទាត់បញ្ជីពន្ធប្រចាំឆ្នាំ២០២៥ រួមមានពន្ធលើប្រាក់ចំណូលអាជីវកម្ម ពន្ធលើប្រាក់ចំណូលបុគ្គល និងរបាយការណ៍ហិរញ្ញវត្ថុប្រចាំឆ្នាំ រយៈពេលបង់ពន្ធត្រូវបានកំណត់ច្បាស់គឺថ្ងៃទី ៣១ ខែមីនា។

ស្ថាប័នពន្ធដារក៏បានបញ្ជាក់ផងដែរថា ក្នុងករណីបង់ពន្ធយឺត អ្នកបង់ពន្ធនឹងត្រូវទទួលរងការប្រាក់យឺតយ៉ាវក្នុងអត្រា០,០៣% ក្នុងមួយថ្ងៃ ដោយគណនាលើចំនួនប្រាក់ពន្ធដែលបង់យឺត។

ក្រៅពីនោះ ការដាក់ឯកសារប្រកាសពន្ធយឺត ក៏អាចនឹងត្រូវទទួលរងការពិន័យរដ្ឋបាល អាស្រ័យទៅតាមកម្រិតនៃការល្មើស។ ជាក់ស្តែង ការយឺតយ៉ាវចាប់ពី ១-៣០ ថ្ងៃ អាចនឹងត្រូវការព្រមាន ឬពិន័យពី ២-៥ លានដុង; យឺតយ៉ាវ ចាប់ពី ៣១-៩០ ថ្ងៃ ត្រូវពិន័យពី ៥-១៥ លានដុង; ក្នុងករណីយឺតយ៉ាវលើសពី ៩០ ថ្ងៃ កម្រិតពិន័យអាចឡើងដល់១៥-២៥ លានដុង។

ស្ថាប័នពន្ធដារស្នើដល់អ្នកបង់ពន្ធ អាជីវកម្ម និងគ្រួសារធ្វើអាជីវកម្ម គប្បីម្ចាស់ការត្រួតពិនិត្យឡើងវិញនូវសំណុំឯកសារ សៀវភៅបញ្ជីគណនេយ្យ; ដាក់ពាក្យប្រកាសពន្ធ និងទូទាត់បញ្ជីឱ្យបានត្រឹមត្រូវតាមកាលកំណត់ ដើម្បីជៀសវាងការបង្កឱ្យមានការពិន័យ និងប្រាក់បង់យឺត៕

ប្រភព៖ dantri.com.vn - ថាច់ធី

ចែករំលែកអត្ថបទ

ពាក្យគន្លឹះ