សន្តិសុខ - ការពារប្រទេស ការពារប្រទេស

06/05/2025 - 07:52

នាំមកក្ដីរីករាយជូនអ្នកក្រ

នគរបាលខេត្តបាកលីវ បានរួមចំណែកជាមួយនឹងរដ្ឋអំណាចភូមិភាគ សាងសង់ផ្ទះជូនគ្រួសារក្រីក្រ គ្រួសារប្រកៀកបន្ទាត់ក្រ ដើម្បីជួយដល់គ្រួសារទាំងនេះលំនឹងជីវភាព។

ប្រគល់ផ្ទះដល់គ្រួសារមាមីងដែលមានជីវភាពក្រីក្រ។

ឆ្នាំ២០២៥ ក្រសួងនគរបាលមានគោលការណ៍រួមដំណើរជាមួយនឹងខេត្តបាកលីវ ឧបត្ថម្ភសាងសង់ផ្ទះ៧០០ខ្នងជូនដល់គ្រួសារក្រីក្រ គ្រួសារប្រកៀកបន្ទាត់ក្រលើភូមិសាស្រ្តខេត្ត សរុបទឹកប្រាក់ជាង ៤២ ពាន់លានដុង។ អនុវត្តកម្មវិធី “ព្រួតដៃលុបបំបាត់ផ្ទះបណ្ដោះអាសន្ន ផ្ទះទ្រុឌទ្រោម” នគរបាលខេត្តបាកលីវ បានបង្កើតគណៈចង្អុលការនិងរៀបចំការត្រួតពិនិត្យ សាងសង់ផ្ទះជូនគ្រួសារក្រីក្រ គ្រួសារប្រកៀកបន្ទាត់ក្រលើភូមិសាស្រ្តខេត្ត។ ទន្ទឹមនឹងនោះ ចាត់កម្មាភិបាល យុទ្ធជននគរបាលគ្រប់លំដាប់ថ្នាក់ រួមជាមួយនឹងរដ្ឋអំណាចភូមិភាគ ជួយប្រជាជនរុះរើផ្ទះចាស់និងដឹកជញ្ជូនសម្ភារៈសាងសង់។ បច្ចុប្បន្ន កម្មាភិបាលនិងយុទ្ធជននគរបាលគ្រប់លំដាប់ថ្នាក់ កំពុងសហការជាមួយនឹងសម្ព័ន្ធយុវជនជួយប្រជាជនសាងសង់ផ្ទះ ដើម្បីធានាការសាងសង់មានគុណភាពនិងសម្រេចតាមសម្ទុះដែលកំណត់។ មកទល់បច្ចុប្បន្ន មានផ្ទះរាប់រយខ្នងបានសាងសង់រួចរាល់ នាំកមក្ដីរីករាយ សុភមង្គលជូនគ្រួសារក្រីក្រ គ្រួសារប្រកៀកបន្ទាត់ក្រដែលជួបលំបាកខាងលំនៅឋាន។

កម្មាភិបាល យុទ្ធជននគរបាលគ្រប់លំដាប់ថ្នាក់រួមជាមួយនឹងកម្លាំងភូមិភាគ
ជួយប្រជាជនសាងសង់ផ្ទះ។

ទទួលបានផ្ទះ បងស្រីលីធីស្វឹង នៅទីប្រជុំជនភឿកឡុង ឱ្យដឹងដោយក្ដីរីករាយ៖ “ខ្ញុំប្រឹងធ្វើការខួបឆ្នាំបានត្រឹមតែគ្រប់ហូប មានបំណងសន្សំប្រាក់ខ្លះដើម្បីជួសជុលផ្ទះ ប៉ុន្តែគ្រួសារខ្ញុំមិនគ្រប់សមត្ថភាពនោះទេ។ ពេលនេះបានក្រសួងនគរបាលឧបត្ថម្ភនិងបានបងៗកម្មាភិបាល យុទ្ធជននគរបាលចុះមកជួយសង់ផ្ទះឱ្យរួចរាល់មុនពេលកំណត់។ មានផ្ទះឥដ្ឋរស់នៅសមរម្យ គឺខ្ញុំរីករាយនិងត្រេកអរខ្លាំងណាស់”។ ចំណែក លោកយាយត្រឿងធីត្វៀក ឱ្យដឹង៖ “ខ្ញុំមានអាយុជាង ៧០ ឆ្នាំ ការរស់នៅពឹងលើប្រាក់ឈ្នួលរបស់ចៅទៅធ្វើជាងសំណង់ ហេតុនោះ ខ្ញុំមិនដែលស្រមៃមានផ្ទះឥដ្ឋរស់នៅនោះទេ។ ឥឡូវបានក្មួយៗនគរបាលមកជួយសង់ផ្ទះថ្មីល្អសមរម្យ ខ្ញុំពិតជាដឹងគុណខ្លាំងណាស់។ ឥឡូវបានរស់នៅក្នុងផ្ទះឥដ្ឋ គឺជាក្តីរីករាយដ៏ធំបំផុតសម្រាប់ជីវិតរបស់ខ្ញុំ”។

លោកវរសេនីយ៍ឯក ហូវៀតទ្រីវ នាយកនគរបាលខេត្តបាកលីវ ឱ្យដឹង៖ “នគរបាលខេត្តបានសហការជាមួយនឹងអង្គភាពនានាចុះទៅពិនិត្យសង្កេត និងជ្រើសរើសគ្រួសារណាដែលជួបលំបាកខាងលំនៅឋាន ដោយធានាចំមុខសញ្ញាដែលទទួលផល។ ទន្ទឹមនឹងនោះ ជ្រើសរើសអ្នកម៉ៅការសាងសង់ផ្ទះតាមលក្ខឋាន៣រឹង ៖ ធាររឹង ជញ្ជាំងរឹង ដំបូលរឹង; ធានាគុណភាពរឹងមាំ ស្អាត ប្រិតសំចៃថវិកា។ បច្ចុប្បន្ន កម្មាភិបាល យុទ្ធជននគរបាលគ្រប់លំដាប់ថ្នាក់កំពុងរួមដៃយ៉ាងសកម្មជាមួយនឹងគ្រួសារដែលឧបត្ថម្ភសាងសង់ផ្ទះ ដើម្បីធានាការប្រគល់ផ្ទះ ៧០០ ខ្នងឱ្យបានមុនថ្ងៃ ១៩ ខែឧសភា ឆ្នាំ ២០២៥។ តាមរយៈនោះ រួមចំណែកព្រួតដៃជាមួយនឹងខេត្តបាកលីវ សាងសង់សម្រេចផ្ទះ ១.៧៦០ ខ្នងជូនគ្រួសារក្រីក្រ គ្រួសារប្រកៀកបន្ទាត់ក្រតាមកម្មវិធី “ព្រួតដៃលុបបំបាត់ផ្ទះបណ្ដោះអាសន្ន ផ្ទះទ្រុឌទ្រោម”៕

យ្វីអាញ - ត្រុងង្វៀង -ប្រែសម្រួល៖ ថាច់ធី

ចែករំលែកអត្ថបទ

ពាក្យគន្លឹះ