សន្តិសុខ - ការពារប្រទេស ការពារប្រទេស

27/08/2024 - 08:51

រួមចំណែករក្សាសន្ដិសុខសណ្ដាប់ធ្នាប់តំបន់ជនបទ

សំណង់ “អំពូលភ្លើងបំភ្លឺផ្លូវជនបទ” បានពង្រីកប្រសិទ្ធភាពក្នុងការរក្សាសន្ដិសុខសណ្ដាប់ធ្នាប់នៅតំបន់ជនបទ ហើយកំពុងទទួលបានការគាំទ្រពីសំណាក់ជនរួមជាតិខ្មែរនៅឃុំភូមី ស្រុកមីទូ ខេត្តសុកត្រាំង។

សម្ព័ន្ធយុវជនខេត្តសុកត្រាំង ប្រគល់ជូនសំណង់ “អំពូលភ្លើងបំភ្លឺផ្លូវជនបទ” នៅឃុំភូមី។

សំណង់ “អំពូលភ្លើងបំភ្លឺផ្លូវជនបទ” បាននាំមកប្រសិទ្ធភាពជាក់ស្ដែងក្នុងចលនាប្រឡងប្រណាំង “ទូទាំងប្រទេសរួមកម្លាំងកសាងជនបទថ្មី” នៅឃុំភូមី។ មកទល់បច្ចុប្បន្ន សំណង់ត្រូវបានផ្សព្វផ្សាយអនុវត្តនៅគ្រប់ផ្លូវធំៗក្នុងភូមិទាំង៧របស់ឃុំភូមី បានរួមចំណែកធ្វើឱ្យផ្លាស់ប្ដូរមុខមាត់ភូមិស្រុកនិងធានាសន្ដិសុខសណ្ដាប់ធ្នាប់។ ពិសេស ក្នុងពេលរាត្រីមានភ្លើងបំភ្លឺក៏ធានាសុវត្ថិភាពចរាចរណ៍សម្រាប់អ្នកបើកបរលើដងផ្លូវផងដែរ។ លោក ហ្វិញគីមត្វៀង នៅភូមិបាក់យ៉ឹង ឱ្យដឹង៖ “មានផ្លូវបេតុង តែគ្មានភ្លើងបំភ្លឺផ្លូវ ដូច្នេះ ការបើកបរពេលរាត្រីគឺងាយកើតមានគ្រោះថ្នាក់ខ្លាំងណាស់ ម្យ៉ាងទៀត ស្ថានភាពចោរកម្ម គ្រឿងញៀនតែងកើតមានជាញឹកញាប់។ ព្រោះហេតុនោះ ពេលរដ្ឋអំណាចកៀរគររួមវិភាគទានដំឡើងអំពូលភ្លើងថាមពលព្រះអាទិត្យ ខ្ញុំនិងមាមីងក្នុងភូមិស្រុកស្ម័គ្រចិត្តគាំទ្រភ្លាម។ បច្ចុប្បន្ន ផ្លូវធំៗទាំងអស់ក្នុងភូមិសុទ្ធតែមានអំពូលភ្លើងបំភ្លឺតាមដងផ្លូវ ផ្ទះដែលគ្រាន់បើ គេបំពាក់កាមេរ៉ា ហើយពេលរាត្រីមានក្រុមសន្ដិសុខមូលដ្ឋានដើរល្បាត ម្ល៉ោះហើយតំបន់ជនបទមានភាពសុខសាន្ត មាមីងខ្មែរនឹងនរចិត្តខិតខំធ្វើការរកស៊ី ពលកម្មផលិតដើម្បីធ្វើមាន”។

នៅគ្រប់ដងផ្លូវចូលទៅតាមភូមិនៃឃុំភូមីសុទ្ធតែបានដំឡើងអំពូលភ្លើងបំភ្លឺដងផ្លូវ រួមចំណែកធានាសន្ដិសុខសណ្ដាប់ធ្នាប់នៅតំបន់ជនបទ។

ភូមិភូទឹកត្រូវបានសម្គាល់ថា ជាភូមិសាស្រ្តស្មុគស្មាញអំពីសន្ដិសុខសណ្ដាប់ធ្នាប់ ម្ល៉ោះហើយ ខណៈពេលបានរដ្ឋអំណាចភូមិភាគចលនាកៀរគរប្រជាជនក៏ស្ម័គ្រចិត្តរួមវិភាគទានដំឡើងអំពូលភ្លើងថាមពលព្រះអាទិត្យ និងបំពាក់កាមេរ៉ាសន្ដិសុខនៅលើដងផ្លូវ។ បងស្រីសើុងធីវ៉ាន់ នៅភូមិភូទឹក ឱ្យដឹង៖ “ខ្ញុំធ្វើកម្មករនៅមណ្ឌលឧស្សាហកម្មអាងង៉ីប ម្ល៉ោះហើយច្រើនទៅពីព្រលឹម លុះដល់មកវិញយប់ជ្រៅ ដូច្នេះប្រឈមនឹងគ្រោះថ្នាក់ណាស់។ កាលមិនទាន់ដំឡើងអំពូលភ្លើងបំភ្លឺផ្លូវ ពេលធ្វើការបន្ថែមម៉ោង ខ្ញុំច្រើនតែហៅអ្នកផ្ទះទៅឌុប ពីព្រោះផ្លូវងងឹត ហើយមានយុវជនផ្ដុំគ្នាស៊ីផឹក ឆក់ប្លន់ សេពគ្រឿងញៀន។ល។ ចាប់តាំងពីមានអំពូលភ្លើងបំភ្លឺផ្លូវនៅពេលរាត្រី មានកាមេរ៉ាត្រួតពិនិត្យ ផ្លូវភ្លឺ ធានាបានសុវត្ថិភាព ម្ល៉ោះហើយខ្ញុំមិនសូវភ័យខ្លាច នឹងនរអារម្មណ៍ទៅធ្វើការ”។

ទូទាំងដងផ្លូវភូទឹកមានប្រវែង១,៥គីឡូម៉ែត្រ ដោយមានអំពូលភ្លើងថាមពលព្រះអាទិត្យចំនួន ៤៦ សរុបថវិកាជាង១០០លានដុង អាស្រ័យមាមីងខ្មែររួមវិភាគទាន។ ក្រៅពីនោះ រដ្ឋអំណាចនៅទាំងកៀរគរប្រជាជនដំឡើងកាមេរ៉ាសន្ដិសុខនៅចំណុចស្មុគស្មាញ ដើម្បីធានាសន្ដិសុខសណ្ដាប់ធ្នាប់។ បងស្រីត្រឿងធីធូថៅ ប្រធានភូមិភូទឹក ឱ្យដឹង៖ “ភូមិភូទឹកស្មុគស្មាញអំពីបាបគ្រោះសង្គម ជាពិសេសគឺគ្រឿងញៀន លួចប្លន់។ល។ ហេតុតែជាប់ព្រំប្រទល់នឹងក្រុងសុកត្រាំង។ ចាប់តាំងពីមានសំណង់ “អំពូលភ្លើងបំភ្លឺផ្លូវជនបទ” គួបផ្សំនឹងការដំឡើងកាមេរ៉ាត្រួតពិនិត្យ និងមានក្រុមសន្ដិសុខមូលដ្ឋានដើរល្បាតជាប្រចាំ ទើបស្ថានភាពនេះត្រូវបានកាត់បន្ថយ។ សំណង់បានពង្រីកប្រសិទ្ធភាពយ៉ាងប្រាកដ និងមានអត្ថន័យដ៏សំខាន់ក្នុងការធានាសុវត្ថិភាពចរាចរណ៍ សន្ដិសុខសណ្ដាប់ធ្នាប់និងនាំមកភាពសប្បាយរីករាយជូនមាមីងខ្មែរនៅតំបន់ជនបទ”៕

យ្វីអាញ - ថាច់ធី

ចែករំលែកអត្ថបទ

ពាក្យគន្លឹះ