គោលនយោបាយ -ការរស់នៅ គោលនយោបាយ

18/04/2024 - 15:55

គិតគូរអភិវឌ្ឍគ្រប់ជ្រុងជ្រោយជីវភាពជនរួមជាតិខ្មែរ

នៅណាមបូ ជនរួមជាតិភាគតិចស្រូបអត្រាប្រមាណ៧,៦៥% នៃចំនួនប្រជាជនទូទាំងតំបន់។ ក្នុងនោះ ជនរួមជាតិខ្មែរមានចំនួនច្រើនបំផុតប្រមាណ៤,៤៥%។ រយៈពេលកន្លង មានកម្មវិធី គម្រោងជាច្រើនត្រូវបានផ្សព្វផ្សាយអនុវត្តសំដៅគិតគូរអភិវឌ្ឍគ្រប់ជ្រុងជ្រោយជីវភាពជនរួមជាតិ៘

មួយជ្រុងនៃជនបទតំបន់ជនរួមជាតិខ្មែរនៅទីរួមខេត្តទិញបៀង ខេត្តអាងយ៉ាង។

យោងតាមគណៈកម្មាធិការជនជាតិ រយៈពេលកន្លង ក្នុងលក្ខណៈនៃសេដ្ឋកិច្ច-សង្គមរបស់ប្រទេសជាតិនៅជួបការលំបាកច្រើន ប៉ុន្តែដោយបានការយកចិត្តទុកដាក់របស់បក្សនិងរដ្ឋ កិច្ចចង្អុលការយ៉ាងប្តូរផ្តាច់របស់រដ្ឋាភិបាលគ្រប់ក្រសួង ផ្នែកនិងភូមិភាគ បានផ្តុំកម្លាំងចង្អុលការ កៀរគររាល់ប្រភពកម្លាំងវិនិយោគអភិវឌ្ឍគ្រប់ជ្រុងជ្រោយសេដ្ឋកិច្ច-សង្គមតំបន់ជនរួមជាតិខ្មែរ។ ឆ្លងតាមរយៈនោះ សំខាន់គឺកម្មវិធី១៣៥ ចំណុះកម្មវិធីទិសដៅជាតិកាត់បន្ថយភាពក្រីក្រដោយចីរភាពកម្មវិធីទិសដៅជាតិកសាងជនបទថ្មី កម្មវិធីទិសដៅជាតិអភិវឌ្ឍសេដ្ឋកិច្ច - សង្គមតំបន់ជនរួមជាតិភាគតិចនិងតំបន់ភ្នំ; កម្មវិធីស្តារនិងអភិវឌ្ឍន៍សេដ្ឋកិច្ច-សង្គម៘ ផ្តើមពីកម្មវិធី គម្រោងទាំងនេះ ភូមិភាគនានានៅណាមបូ បានផ្តុំកម្លាំងដោះស្រាយនូវបញ្ហាលំបាក បន្ទាន់អំពីផលិតកម្ម ជីវភាពរបស់ជនរួមជាតិ ដូច៖ ឧបត្ថម្ភដីសង់ផ្ទះដីបង្កបង្កើនផល ទឹកស្អាតប្រើប្រាស់; ចាត់ចែងរៀបចំលំនឹងទីលំនៅជូនប្រជាជន; ឧបត្ថម្ភបុលទុនអនុគ្រោះ ផ្លាស់ប្តូរមុខរបរ; លំនឹងការផលិត លំនឹងទីលំនៅផ្សារភ្ជាប់នឹងធានាសុខុមាលភាពសង្គម។

តាមប្រសាសន៍លោក ណុងក្វឹកត្វឹង អនុរដ្ឋមន្ត្រីអនុប្រធានគណៈកម្មាធិការជនជាតិ បណ្តាគោលនយោបាយ កម្មវិធី គម្រោងទាំងឡាយដែលបានផ្សព្វផ្សាយធានាភាពជាក់ស្តែងនិងមានប្រសិទ្ធភាព។ ហេដ្ឋារចនាសម្ព័ន្ធសេដ្ឋកិច្ច-សង្គមតំបន់មានជនរួមជាតិខ្មែររស់នៅកុះករ ឃុំព្រំដែននិងតំបន់ដែលលំបាកខ្លាំង ត្រូវបានវិនិយោគអភិវឌ្ឍ ឆ្លើយតបកាន់តែល្អប្រសើរតម្រូវការផលិតកម្មនិងជីវភាពរបស់ប្រជាជន។ ដូច្នេះ សេដ្ឋកិច្ច-សង្គមតំបន់ជនរួមជាតិខ្មែរ ក៏មានការវិវឌ្ឍជាវិជ្ជមាន មុខមាត់តំបន់ជនបទកាន់តែផ្លាស់ថ្មី ជីវភាពសម្ភារៈនិងស្មារតីរបស់ជនរួមជាតិជាសន្សឹមៗត្រូវបានលើកស្ទួយ។ ពិសេស ប្រាក់ចំណូលមធ្យមភាគលើមនុស្សម្នាក់ៗក្នុងជនរួមជាតិខ្មែរកើនឡើងជាលំដាប់; ឆ្នាំ២០១៨ គឺ២១លានដុង/ម្នាក់/ឆ្នាំ លុះដល់ឆ្នាំ២០២៣ គឺ២៥លានដុង/ ម្នាក់/ឆ្នាំ។

មិនត្រឹមតែដូច្នោះ ការអភិរក្សនិងពង្រីកតម្លៃវប្បធម៌ប្រវេណីដ៏ប្រពៃរបស់ជនជាតិខ្មែរ ត្រូវបានយកចិត្តទុកដាក់អនុវត្តជានិច្ច។ កម្មវិធីវិទ្យុ-ទូរទស្សន៍ កាសែត ទស្សនាវដ្ដីជាភាសាខ្មែរ ត្រូវបានយកចិត្តទុកដាក់វិនិយោគផងដែរ។ ការងារអភិវឌ្ឍអប់រំនិងបណ្តុះបណ្តាល បង្រៀនវិជ្ជាជីវៈ ឧត្តានកម្មអប់រំ បំបាត់អនក្ខរកម្មដល់ជនរួមជាតិ ត្រូវបានយកចិត្តទុកដាក់អនុវត្ត។ ប្រព័ន្ធសាលាជនជាតិអន្តេវាសិកនិងបណ្ដាញសាលារៀន ទ្រង់ទ្រាយអប់រំគ្រប់កម្រិតសិក្សា ត្រូវបានវិនិយោគកសាងសម្រេចបទដ្ឋានជាតិ; គុណភាពប្រសិទ្ធភាពអប់រំបណ្តុះបណ្តាលត្រូវបានកើនឡើងជាលំដាប់។ ការថែទាំសុខភាពជូនជនរួមជាតិក៏ត្រូវបានផ្តោតការយកចិត្តទុកដាក់ពីមួយថ្ងៃទៅមួយថ្ងៃ; ប្រព័ន្ធសុខាភិបាលមូលដ្ឋាន កម្មវិធីទិសដៅជាតិអំពីសុខាភិបាល និងការងារបង្ការបង្រ្កាបជំងឺរាតត្បាតត្រូវបានបង្កើន៘

ផ្តើមពីលទ្ធផលខាងលើ លោកណុងក្វឹកត្វឹង អនុរដ្ឋមន្ត្រី អនុប្រធានគណៈកម្មាធិការជនជាតិ គូសបញ្ជាក់៖ រាល់គោលការណ៍ គោលមាគ៌ា គោលនយោបាយប្រាកដប្រជាក់ស្តែងត្រូវបានផ្សព្វផ្សាយអនុវត្តក្នុងតំបន់ជនរួមជាតិខ្មែររយៈពេលកន្លង បានសម្តែងពីការយកចិត្តទុកដាក់របស់បក្ស រដ្ឋ គ្រប់ថ្នាក់ គ្រប់ផ្នែកចំពោះជនរួមជាតិខ្មែរ។ ផ្ដើមពីនោះ ក្តីទំនុកចិត្តរបស់ជនរួមជាតិលើការដឹកនាំរបស់បក្ស រដ្ឋ ត្រូវបានពង្រឹងនិងបង្កើនជាបន្ត។ ជនរួមជាតិមិនត្រឹមតែអនុវត្តល្អនូវគោលការណ៍ គោលមាគ៌ារបស់បក្ស គោលនយោបាយ ច្បាប់របស់រដ្ឋប៉ុណ្ណោះទេ ថែមទាំងមានឆន្ទៈឈានឡើងដោយខ្លួនឯង រវៀសរវៃ ច្នៃប្រតិដ្ឋក្នុងការពលកម្មផលិត ធ្វើអាជីវកម្ម សកម្មចូលរួមរាល់ចលនាប្រឡងប្រណាំងស្នេហាជាតិទៀតផង។ ទន្ទឹមនឹងនោះ សាមគ្គី រួបរួមជាមួយជនរួមជាតិគ្រប់ជនជាតិលើភូមិសាស្ត្រ ខិតខំកសាងភូមិស្រុកឱ្យកាន់តែរីកចម្រើនពីមួយថ្ងៃទៅមួយថ្ងៃ៕

ថាញឡុង- លីសៀ

ចែករំលែកអត្ថបទ

ពាក្យគន្លឹះ