កីឡា - ទេសចរណ៍ កីឡា

16/01/2024 - 09:07

ចលនាកីឡាកាន់តែរីកចម្រើន

ទន្ទឹមនឹងការលើកកម្ពស់គុណភាពបង្រៀននិងរៀន វិទ្យាល័យជនជាតិអន្តេវាសិកហ្វិញកឿង ខេត្តសុកត្រាំង ថែមទាំងជំរុញសកម្មភាពកីឡាអប់រំកាយ ដើម្បីបង្កើតសួនកម្សាន្តដ៏មានប្រយោជន៍និងលត់ដំកាយសម្បទាដល់សិស្សសាលា។

ម៉ោងហាត់វិញ្ញាសាបាល់ទះនៃសិស្សវិទ្យាល័យជនជាតិអន្តេវាសិកហ្វិញកឿង។

ឧត្តមភាពរបស់វិទ្យាល័យជនជាតិអន្តេវាសិកហ្វិញកឿង គឺសិស្សស្នាក់នៅក្នុងអន្តេវាសិកដ្ឋាន ហើយសាលាត្រូវបានវិនិយោគកសាងពហុកីឡដ្ឋាន ជាសួនកម្សាន្តធានាបាននូវសកម្មភាពកីឡា ទាក់ទាញសិស្សចូលរួមយ៉ាងច្រើន។ រៀងរាល់ថ្ងៃ នៅពេលរសៀលសិស្សចូលរួមហ្វឹកហាត់លេងកីឡា មានដូច៖ បាល់ទាត់រត់ប្រណាំងលោតចម្ងាយ លោតកម្ពស់ បាល់បោះនិងវាយសីជាដើម។ ក្នុងឱកាសបុណ្យចូលឆ្នាំថ្មី និងថ្ងៃបុណ្យទានផ្សេងៗ សាលាតែងរៀបចំសកម្មភាពសិល្បៈ កីឡានិងល្បែងប្រជាប្រិយ ដើម្បីបង្កើតសួនកម្សាន្តដ៏មានប្រយោជន៍ ទាក់ទាញសិស្សចូលរួម។ ផ្តើមពីនោះ ចលនាកីឡាអប់រំកាយរបស់សាលាកាន់តែរីកចម្រើន ដូច្នេះ នៅរាល់លើកចូលរួមសមយុទ្ធកីឡាភូដុងថ្នាក់ខេត្ត សាលាតែងទទួលបានរង្វាន់លេខ១ទូទាំងក្រុម។ លោកគ្រូឌាំងថាញវ៉ូវ បង្រៀនវិញ្ញាសាកីឡា បានឱ្យដឹង៖ “តាំងពីដើមឆ្នាំសិក្សា សាលាបានកសាងផែនការរៀបចំសកម្មភាពកីឡាអប់រំកាយ អំណរថ្ងៃបុណ្យធំៗប្រចាំឆ្នាំ ដើម្បីជួយសិស្សលត់ដំទាំងសុខភាព រឹតចំណងសាមគ្គីភាព និងរួមចំណែកក្នុងការលើកកម្ពស់គុណភាពសិក្សាផង។ នេះក៏ជាឱកាសដើម្បីប្អូនៗពង្រីកទេពកោសល្យក្នុងវិស័យកីឡាអប់រំកាយ ហើយក៏ជាឱកាសល្អសម្រាប់សាលាពិនិត្យជ្រើសរើស សិស្សមានទេពកោសល្យចូលរួមសមយុទ្ធកីឡាភូដុងថ្នាក់ខេត្តផងដែរ”។

ឆ្នាំ២០២៣ វិទ្យាល័យជនជាតិអន្តេវាសិកហ្វិញកឿង ទទួលបានរង្វាន់លេខ១ទូទាំងក្រុម សម្រាប់វិញ្ញាសាអត្តពលកម្មថ្នាក់ខេត្ត។ ក្នុងនោះ ទទួលបានមេដាយមាស១គ្រឿង មេដាយប្រាក់១គ្រឿងនិងមេដាយសំរឹទ្ធ៤គ្រឿង។ យុវតីសិស្ស ដឿងធីត្វៀកទ្រិញ សិស្សថ្នាក់ទី១១ D ឱ្យដឹង៖ “ពេលសាលារៀបចំសកម្មភាពកីឡានិងល្បែងប្រជាប្រិយម្តងៗ ទាក់ទាញសិស្សចូលរួមយ៉ាងច្រើន។ ពិសេស បានមិត្តភក្តិគាំទ្រដោយអស់ពីចិត្ត បង្កើតបរិយាកាសសប្បាយរីករាយ បង្កើនការសាមគ្គី ដើម្បីដណ្ដើមយកជ័យជម្នះ។ នេះក៏ជាឱកាសដើម្បីពួកប្អូនលត់ដំសុខភាព និងលម្ហែអារម្មណ៍ក្រោយពីការសិក្សា។ សព្វថ្ងៃ ប្អូនកំពុងហាត់វិញ្ញាសាអត្តពលកម្មដើម្បីចូលរួមប្រកួតនៅសមយុទ្ធកីឡាភូដុងថ្នាក់ខេត្ត ឆ្នាំ២០២៤”។

តាមប្រសាសន៍លោកគ្រូ គឹមង៉យ នាយករងវិទ្យាល័យជនជាតិអន្តេវាសិកហ្វិញកឿង ឱ្យដឹង៖ ទន្ទឹមនឹងការយកចិត្តទុកដាក់ក្នុងការអប់រំ វប្បធម៌ បំណិនជីវិត បំណិនប្រជុំជីវភាពក្នុងអន្តេវាសិកដ្ឋាន គឺការងារអប់រំកាយសម្បទានិងរៀបចំសកម្មភាពកីឡាអប់រំកាយក្រៅម៉ោងសិក្សា ក៏ត្រូវបានសាលាផ្តោតការយកចិត្តទុកដាក់។ ដើម្បីបង្កលក្ខណសម្បត្តិសម្រាប់សិស្សរៀនសូត្រ លត់ដំ លើកកម្ពស់សុខភាព មានការលូតលាស់គ្រប់ជ្រុងជ្រោយទាំងកាយសម្បទានិងសតិបញ្ញា។ ជាច្រើនឆ្នាំកន្លង ពេលចូលរួមសមយុទ្ធកីឡាភូដុងថ្នាក់ខេត្ត សាលាតែងទទួលបានចំណាត់ថ្នាក់ខ្ពស់។ ឆ្នាំ២០២៣ ការប្រកួតដណ្តើមពានរង្វាន់អត្តពលកម្ម ហែលទឹក និងបាល់បោះដែលខេត្តរៀបចំ គឺសាលាទទួលបានរង្វាន់លេខ១ទូទាំងក្រុម។ បច្ចុប្បន្ន សាលាកំពុងហ្វឹកហាត់ដល់សិស្ស៤៧នាក់ ដើម្បីចូលរួមសមយុទ្ធកីឡាភូដុងថ្នាក់ខេត្តនាពេលខាងមុខ៕

លីធាន-មុនី

ចែករំលែកអត្ថបទ

ពាក្យគន្លឹះ