មហាសាមគ្គីជនជាតិ គំរូក្នុងសហគមន៍

22/08/2022 - 15:28

“ការងារណាមានប្រយោជន៍ដល់មាមីងខ្ញុំនឹងធ្វើ”

មកកាន់ភូមិង៉ាយហ្វា ឃុំតឹបង៉ាយ ស្រុកទីវកឹង ខេត្តត្រាវិញ សួររកលោក ត្រឹងកុងធុង លេខាសាខាបក្សភូមិ មាមីងនៅទីនេះស្គាល់សឹងតែគ្រប់គ្នា។ ពីព្រោះគាត់តែងបង្ហាញពីគំរូឈានមុខរបស់បក្ខជន អស់ពីចិត្តនឹងការងារ ជួយគ្រួសារមាមីងខ្មែរជាច្រើនចាកផុតពីភាពក្រីក្រ លំនឹងជីវភាព។

ដងផ្លូវខេត្តលេខ ៩១២ កសាងសម្រេចរួចរាល់ ក្នុងនោះក៏មានចំណែកដីដែលគ្រួសារលោកត្រឹងកុងធុង (អ្នកឈរខាងឆ្វេងដៃ) បរិច្ចាគផងដែរ។

ភូមិង៉ាយហ្វាមាន ៣៥៧ គ្រួសារ ក្នុងនោះ គ្រួសារជនជាតិខ្មែរស្រូបអត្រា ៣៤% ។ ជាច្រើនឆ្នាំមកនេះ មុខមាត់ជនបទភូមិង៉ាយហ្វា មានភាពរីកចម្រើនដោយឥតឈប់ឈរ ជីវភាពសម្ភារៈនិងស្មារតីរបស់ប្រជាជនត្រូវបានលើកស្ទួយ។ សម្រេចបានលទ្ធផលទាំងនេះ គឺអាស្រ័យដោយការខិតខំប្រឹងប្រែងយ៉ាងពេញទំហឹងរបស់រដ្ឋអំណាចភូមិភាគ ក្នុងនោះ ត្រូវរៀបរាប់ដល់តួនាទីរបស់លេខាសាបក្សភូមិ ត្រឹងកុងធុងផងដែរ។ លោកធុង យល់ច្បាស់ពីជីវភាព សុខទុក្ខរបស់មាមីង ម៉្លោះហើយ ជារៀងរាល់ឆ្នាំឱ្យតែដល់ថ្ងៃបុណ្យទានម្ដងៗ គាត់តែងចលនាសប្បុរសជនរៀបចំអំណោយរាប់សិបចំណែកជូនគ្រួសារក្រីក្រក្នុងភូមិ។ ចំពោះគ្រួសារក្រីក្រដែលខ្វះដើមទុន គាត់ចូលរួមពិនិត្យមើលនិងស្នើធនាគារគោលនយោបាយសង្គមឱ្យបុលទុន ជំនួយពូជឈើដំណាំ សត្វចិញ្ចឹម ដើម្បីពង្រីកការបង្កបង្កើនផល។ លោកត្រឹងកុងធុង ឱ្យដឹង៖ “ការងារណាមានប្រយោជន៍ដល់មាមីងខ្ញុំនឹងធ្វើ។ ពិសេស ពេលមានគោលនយោបាយអាទិភាពពិសេសរបស់រដ្ឋចំពោះមាមីងខ្មែរ ខ្ញុំរួមជាមួយនឹងអង្គការមហាជនបើកកិច្ចប្រជុំប្រជាជន ដើម្បីស្រង់មតិ ស្វែងយល់ពីទឹកចិត្តនិងបំណងប្រាថ្នារបស់មាមីង។ ផ្តើមពីនោះ ស្នើថ្នាក់លើពិនិត្យពិច័យ និងជំនួយសមស្របដើម្បីមាមីងមានលក្ខណសម្បត្តិពង្រីកសេដ្ឋកិច្ច”។

បងថាច់សម នៅភូមិង៉ាយហ្វា ឱ្យដឹង៖ “ពូត្រឹងកុងធុង តែងខ្នះខ្នែងជួយប្រជាជនអស់ពីចិត្ត។ ថ្មីៗនេះ ពូធុង ឧទ្ទេសនាមខ្ញុំបុលទុនពីធនាគារគោលនយោបាយសង្គមចំនួន ៧០ លានដុង ដើម្បីសង់ផ្ទះនិងពង្រីកសេដ្ឋកិច្ច។ ស្តាប់តាមការណែនាំរបស់ពូ ខ្ញុំកែប្រែផ្ទៃដីចម្ការចាស់ប្រមាណ ១ កុង ដាំដំណាំរួមផ្សំ មាន៖ ត្រកួន ភ្លៅកង្កែប ស្ពៃចង្កឹះ ស្ពៃខៀវ ។ល។ រកបានប្រាក់ចំណូលជាប្រចាំ។ ឥឡូវនេះ គ្រួសារខ្ញុំចាកផុតពីភាពក្រីក្រ ប្តីប្រពន្ធខ្ញុំដឹងគុណពូខ្លាំងណាស់”។

លោកង្វៀងតឹងខ្វា លេខាគណៈកម្មាធិការបក្សឃុំតឹបង៉ាយ បញ្ជាក់៖ “សមមិត្តត្រឹងកុងធុង ជាកម្មាភិបាលគំរូ តែងសម្រេចល្អភារកិច្ចដែលថ្នាក់លើប្រគល់ជូន។ ក្នុងការងារ សមមិត្ត តែងស្តាប់យោបល់ ចែករំលែកនិងជួយអ្នករាល់គ្នាដោយសុទ្ធចិត្ត។ ជាពិសេស គ្រួសារសមមិត្តនាំមុខបរិច្ចាគដីជាង ៥០០ ម៉ែត្រការ៉េ សម្រាប់រដ្ឋធ្វើផ្លូវខេត្តលេខ ៩១២ ។ សមមិត្តធុង តែងបានប្រជាជនស្រឡាញ់រាប់អាន ម៉្លោះហើយរាល់ករណីទំនាស់វិវាទក្នុងភូមិ សមមិត្តតែងចូលរួមសម្របសម្រួលសម្រេចជោគជ័យជាច្រើនករណី។ សមមិត្តធុង ជាកម្មាភិបាលខ្មែរគំរូ គួរឱ្យគោតសរសើរណាស់”៕

សឺនម៉ាល័យ-មុនី

ចែករំលែកអត្ថបទ

ពាក្យគន្លឹះ