កីឡា - ទេសចរណ៍ ទេសចរណ៍

27/09/2021 - 09:09

ទស្សនាវត្តផឹកលើង

វត្ដផឹកលើង ជាទីតាំងទេសចរណ៍បែបសាសនាដ៏ពេញនិយមសម្រាប់ភ្ញៀវទេសចរ ពេលមកកាន់តំបន់បៃណូយ ខេត្ដអាងយ៉ាង។

នៅព្រះវិហារវត្តផឹកលើង សម្លឹងទៅឃើញបដិមាព្រះកច្ចាយនត្ថេរ។

ស្រះធ្វីលីមនៅចង្កេះភ្នំកឹម។

វត្តផឹកលើង។

តំបន់បៃណូយមានទីតាំងទេសចរណ៍បែបសាសនាជាច្រើន ប៉ុន្តែភ្ញៀវទេសចរភាគច្រើនពេលមកកាន់តំបន់បៃណូយដ៏ពិសិដ្ឋ តែងមកទស្សនាវត្តផឹកលើង។ វត្តមានទីតាំងនៅចង្កេះភ្នំកឹម ស្ថិតនៅឃុំអាងហៅ ស្រុកទិញបៀង ត្រូវបានសាងសង់លើផ្ទៃដីប្រមាណ ១៣ ហិកតា។ យោងតាមចាស់ព្រឹទ្ធាចារ្យនៅទីនេះ ៖ វត្តបានកសាងមុននេះប្រហែល ១០០ ឆ្នាំ ធ្លាប់ជាមូលដ្ឋានបដិវត្តន៍ប្រឆាំងពួកអាណានិគមនិងចក្រពត្តិ។ កាលទើបកសាង វត្តមានព្រះពុទ្ធបដិមាមួយអង្គកម្ពស់ ១,២ ម៉ែត្រ ហើយក៏បានរក្សានៅគង់វង់រហូតមកទល់សព្វថ្ងៃ។ វត្តបែរមុខទៅទិសបស្ចឹម សម្លឹងទៅឃើញស្រះធ្វីលីម។ ស្រះនេះចំណុះទឹកជាង ៦០.០០០ ម៉ែត្រគុប ជាកន្លែងស្ដុកទឹកសម្រាប់ប្រជាជនប្រើប្រាស់ ស្រោចស្រព និងជារមណីយដ្ឋានសម្រាប់ទស្សនាកម្សាន្ដ។

ក្រោយរយៈពេលបានជួសជុល វត្តផឹកលើង កាន់តែស្រស់ស្អាត ដោយមានសំណង់ជាច្រើន ដូច៖ ព្រះវិហារ សាលាទាន ចេតិយ ប្រាសាទសង់លើស្រះ សួនច្បារជាដើម។ល។ ជាពិសេស នៅឆ្នាំ ២០០៣ វត្តផឹកលើងបានកសាងបដិមាព្រះកច្ចាយនត្ថេរយ៉ាងធំ សាងពីបេតុង សរសៃដែកទម្ងន់ ៤០០ តោន កម្ពស់ ៣៣,៦០ ម៉ែត្រ លើផ្ទៃទំហំ ២ ហិកតា បែរព្រះភក្រ្តឆ្ពោះទៅព្រះវិហារ។ សំណង់បដិមាព្រះកច្ចាយនត្ថេរ នៅវត្តផឹកលើង ត្រូវបានកំណត់សម្គាល់ជាបដិមាធំបំផុត សម្រេចឯតទគ្គកម្មវៀតណាមនៅឆ្នាំ ២០០៦ និងសម្រេចឯតទគ្គកម្មអាស៊ីនៅឆ្នាំ ២០១៣។

មុននេះ ភ្ញៀវទេសចរចង់ទៅទស្សនាវត្តផឹកលើងត្រូវធ្វើដំណើរថ្មើរជើងប្រហែល ៤ គីឡូម៉ែត្រ ឆ្លងកាត់ជម្រាលភ្នំដ៏គ្រោះថ្នាក់។ នៅដំណាក់កាលវត្តជួសជុល ខេត្តអាងយ៉ាងក៏បានកសាងផ្លូវបេតុងចាប់ពីជើងភ្នំឡើងទៅដល់វត្ត។ តាមការពេញចិត្ត ភ្ញៀវទេសចរអាចជ្រើសជិះម៉ូតូឬរថយន្ដឡើងកាន់វត្ត។ ចំពោះភ្ញៀវទេសចរមិនចង់ឆ្លងកាត់ផ្លូវព្រៃភ្នំបត់បែន ក៏អាចឡើងភ្នំដោយកន្រ្តកខ្សែកាប។ អង្គុយក្នុងកន្រ្តកខ្សែកាប គន់មើលជួរដើមឈើធំៗ ផ្ទះតូចធំឆ្លងកាត់ស្រះស្ដុកទឹកថ្លាឆ្វេងក៏ជាការឆ្លងកាត់បទពិសោធន៍ម៉្យាងសម្រាប់ភ្ញៀវទេសចរ។

ពេលឡើងភ្នំ ក្រៅពីទៅកម្សាន្តវត្តផឹកលើង ភ្ញៀវទេសចរអាចទៅកាន់វត្តវ៉ាងលិញ ទស្សនាកម្សាន្តស្រះធ្វីលីម ឬភ្លក់នំចាក់អំបែងជាមួយអន្លក់បន្លែព្រៃយ៉ាងឆ្ងាញ់ពិសា។ ភ្នំកឹម នៅរក្សាបានដើមឈើធំៗជាច្រើន ម្ល៉ោះហើយមានខ្យល់អាកាសត្រជាក់ស្រួល ភ្ញៀវទេសចរអាចដើរកម្សាន្តទីនេះទីនោះពេញមួយថ្ងៃក៏មិនជិនណាយដែរ៕

ហាថាញ - ថាច់ធី

ចែករំលែកអត្ថបទ

ពាក្យគន្លឹះ