សន្តិសុខ - ការពារប្រទេស ការពារប្រទេស

13/09/2021 - 07:18

ភាពកក់ក្ដៅនៃមនោសញ្ចេតនាកងទ័ព-ប្រជាជន

ប៉ុន្មានថ្ងៃកន្លង កងកម្លាំងប្រដាប់អាវុធយោធភូមិភាគ ៩ បានចាត់តាំងសកម្មភាពជាក់ស្ដែងជាច្រើននិងមានអត្ថន័យ ជួយឧបត្ថម្ភទាន់ពេលដល់ប្រជាជនដែលមានស្ថានភាពលំបាកឆ្លងកាត់ជំងឺ COVID-១៩។

កម្មាភិបាល យុទ្ធជនកងពលធំលេខ ៣៣០ នៃយោធភូមិភាគ ៩ ជួយប្រជាជនប្រមូលផលស្រូវ។

វរសេនីយ៍ឯក ង្វៀងវៀតហុង ប្រធានកងពលធំលេខ ៣៣០ ឱ្យដឹង៖ “អនុវត្តគម្លាតសង្គម កសិករភាគច្រើនជួបលំបាក ខណៈពេលប្រមូលផល។ ដើម្បីជួយមាមីង កងពលធំបានចាត់កម្មាភិបាល យុទ្ធជនប្រចាំការ ២០០ នាក់ និងរថយន្តដឹកទំនិញឯកទេស ១០ គ្រឿង រួមជាមួយនឹងរថយន្តបញ្ជាការ ២ គ្រឿង រៀបចំត្រៀមចេញដំណើរដើម្បីជួយប្រជាជនប្រមូលផល ដឹកជញ្ជូនកសិផល និងនាំទៅលក់”។

បញ្ជាការដ្ឋានយោធាក្រុងកឹងធើ បានបញ្ជូនកងកម្លាំងចុះទៅជួយប្រជាជននៅ ២ ស្រុក គឺ វិញថាញនិងកើ-ដ ជួយប្រមូលផលនិងលក់កសិផល។ អ្នកមីង ឡេធីហឿង នៅឃុំថាញឡុក ស្រុកវិញថាញ ក្រុងកឹងធើ ឱ្យដឹង៖ គ្រួសារគាត់មានផ្ទៃដីដាំស្ពៃមើម ១.០០០ ម២ ដល់ពេលប្រមូលផល ប៉ុន្តែគ្មានឈ្មួញចុះមកទិញ។ កំពុងតែបារម្ភមិនដឹងធ្វើយ៉ាងណា ស្រាប់តែបានកម្មាភិបាល យុទ្ធជននៃបញ្ជាការដ្ឋានយោធាក្រុងកឹងធើ ចុះប្រមូលទិញនិងជួយប្រមូលផល។ “នៅពេលមានការលំបាក ក្រៅពីបក្ស រដ្ឋ និរដ្ឋអំណាចភូមិភាគ គឺកម្លាំងកងទ័ព តែងមានមុខទាន់ពេល ដើម្បីជួយប្រជាជនយើងខ្ញុំ។ ចំនួនមើមស្ពៃដែលលក់បានគឺគ្រប់ដើមទុន។ ប្រសិនបើគ្មានក្មួយៗកងទ័ពជួយ គ្រួសារខ្ញុំច្បាស់ជាគ្មានដើមទុនសម្រាប់ផលិត រដូវបន្ទាប់នោះទេ” អ្នកមីងហឿង បានរ៉ាយរ៉ាប់ដូច្នោះ។

កងកម្លាំងប្រដាប់អាវុធយោធភូមិភាគ ៩ នៅទាំងផ្សព្វផ្សាយទម្រង់ “ល្វែងទំនិញ ០ ដុង” សំដៅចែករំលែកជួយមាមីងដែលមានស្ថានភាពលំបាកឆ្លងកាត់ជំងឺរាលដាល។ ទន្ទឹមនឹងនោះ ការអនុវត្តកម្មវិធី “រថយន្តលឿនស្លេវ ប្ដេជ្ញាយកឈ្នះជំងឺ COVID-១៩ ដើម្បីភាពសុខសាន្តរបស់ប្រជាជន” បញ្ជាការដ្ឋានយោធភូមិភាគ ៩ បានជូនអំណោយជាសម្ភារៈប្រើប្រាស់ចាំបាច់ផ្សេងៗជាង ៧.៣០០ ចំណែក រួមមាន៖ អង្ករ ១៣៩ តោន និងទឹកប្រាក់ជូនដល់មាមីងជនជាតិខ្មែរ ចាម គ្រួសារក្រីក្រ គ្រួសារក្របខ័ណ្ឌគោលនយោបាយ; សួរសុខទុក្ខ ជូនអំណោយដល់វិហារឥស្លាម វត្តពុទ្ធសាសនាទក្ខិណនិកាយខ្មែរ ដែលរងផលប៉ះពាល់ដោយជំងឺឆ្លងរាលដាលនៅខេត្តនានា ដូច៖ ត្រាវិញ ដុងថាប សុកត្រាំង អាងយ៉ាង តៀងយ៉ាង និងក្រុងកឹងធើ; សួរសុខទុក្ខជូនអំណោយ ឧបត្ថម្ភនៅតាមទីតាំងដែលបង្ការប្រឆាំងជំងឺឆ្លងរាលដាល ។ល។ សរុបថវិកាប្រមាណ ៦ ពាន់លានដុង។

ឧត្ដមសេនីយ៍ត្រី ង្វៀងមិញទ្រីវ មេបញ្ជាការរង ប្រធានគណៈចង្អុលការបង្ការ ប្រឆាំងជំងឺ COVID-១៩ នៃយោធភូមិភាគ ៩ មានប្រសាសន៍៖ “យោធភូមិភាគ ៩ បានឧបត្ថម្ភស្បៀងអាហារ និងសម្ភារៈប្រើប្រាស់ចាំបាច់ដល់ប្រជាជន សរុបតម្លៃទឹកប្រាក់ជាង ៤៦ ពាន់លានដុង។ ទន្ទឹមនឹងនោះ កងកម្លាំងប្រដាប់អាវុធយោធភូមិភាគ នៅទាំងចាត់តាំងរថយន្តចេញដំណើរចំនួន ១២៩ ជើង ដោយមានកម្មាភិបាល យុទ្ធជនជាង ២.០០០ នាក់ ចូលរួមជួយប្រជាជនប្រមូលផលចំនួន ៧៤,៥ ហិកតា និងប្រមូលទិញកសិផលជិត ២៤០ តោន ទង្វើទាំងនេះត្រូវនឹងស្មារតី “ទីណាត្រូវការ ទីណាលំបាក គឺមានកងទ័ព”៕

ធ្វីអាង - ថាច់ធី

ចែករំលែកអត្ថបទ

ពាក្យគន្លឹះ