កីឡា - ទេសចរណ៍ ទេសចរណ៍

30/08/2021 - 08:00

មកទស្សនាទីសក្ការបូជាលោក ង្វៀងសិនសាក់

ដុងថាបមានមណ្ឌលទេសចរណ៍ជាច្រើនដ៏ទាក់ទាញ មានដូច៖ ភូមិរបរដាំផ្កាតឹងក្វីដុង ឧទ្យានជាតិត្រាមចីម បឹងឈូកថាបមើុយ។ល។ ពិសេស គឺមណ្ឌលកេរដំណែលលោក ង្វៀងសិនសាក់ ឪពុករបស់អ៊ំហូនៅក្រុងកាវឡាញ់។

ទិដ្ឋភាពខាងក្នុងបរិវេណមណ្ឌលកេរដំណែលលោកង្វៀងសិនសាក់។

មណ្ឌលកេរដំណែលលោក ង្វៀងសិនសាក់ ជាប្រជុំស្ថាបត្យកម្មដ៏អស្ចារ្យ ត្រូវបានកសាងចាប់ពីឆ្នាំ ១៩៧៥ ដល់ឆ្នាំ ១៩៧៧ លើផ្ទៃដីទំហំប្រមាណ ៣,៦ ហិកតា។ មណ្ឌលកេរដំណែលចែកជាមណ្ឌលសំខាន់ៗចំនួន ៣ នោះគឺមណ្ឌលប្រាង្គបញ្ចុះសពលោក ង្វៀងសិនសាក់ ផ្ទះរតអ៊ំហូ និងស្រះឈូក។ មណ្ឌលប្រាង្គបញ្ចុះសពលោក ង្វៀងសិនសាក់ ត្រូវបានរចនាប្លង់ប្រកបដោយលក្ខណៈពិសេស ដំបូលមានសណ្ឋានដូចស្លឹកឈូកផ្កាប់ចុះ ហើយមានបន្តុបចម្លាក់រូបនាគ ៩ ក្បាល តំណាងឱ្យខេត្តទាំងឡាយនៅតំបន់វាលរាបទន្លេគឺវឡុង។ ស្រះឈូកនៅខាងមុខប្រាង្គបញ្ចុះសពត្រូវបានរចនាសមរម្យ តំណាងឱ្យតំបន់ឈូកក្រហមថាបមើុយ។ និងជីវិតដ៏បរិសុទ្ធរបស់លោក ង្វៀងសិនសាក់។ ផ្ទះរតអ៊ំហូ ត្រូវបានស្ថាបនាតាមគំរូដើម ដូច្នេះមកទីនេះ ភ្ញៀវទេសចរនឹងបានស្វែងយល់ពីរបៀបរស់នៅ របៀបធ្វើការរបស់ អគ្គមគ្គុទេសក៍ដ៏មហិមា គឺលោកប្រធានហូជីមិញ ។

នៅក្នុងបរិវេណធំទូលាយ មណ្ឌលកេរដំណែលគឺជាកន្លែងប្រជុំជីវកិច្ច អប់រំប្រវតិ្តសាស្រ្ត ប្រពៃណីដល់សិស្ស និស្សិតនៅតំបន់វាលរាបទន្លេគឺវឡុង។ ទន្ទឹមនឹងនោះ គឺជាកន្លែងប្រជុំទស្សនកិច្ចដ៏ទាក់ទាញ ជាទីកន្លែងស្រឡះស្រឡំសម្រាប់អ្នកស្រុក។ ប្អូនស្រីហ្វិញធីធ្វីវី ផ្ទះនៅក្រុងកឹងធើ ជានិស្សិតសាកលវិទ្យាល័យដុងថាប ឱ្យដឹង៖ “ខ្ញុំតែងមកទីនេះពេញមួយថ្ងៃ ដើម្បីសិក្សាឬធ្វើនិក្ខេបបទ។ ទោះបីឋិតនៅក្នុងមណ្ឌលក្រុងកាវឡាញ់ ប៉ុន្តែកន្លែងនេះ មានខ្យល់អាកាសបរិសុទ្ធដោយសារមានដើមឈើធំៗ ស្រះឈូក។ល។”។

ឆ្នាំ ១៩៩២ មណ្ឌលកេរដំណែល ង្វៀងសិនសាក់ ត្រូវបានក្រសួងវប្បធម៌រៀបចំណាត់ថ្នាក់ ជាកេរដំណែលថ្នាក់ជាតិ។ ចំពោះមនុស្សគ្រប់រូប មណ្ឌលកេរដំណែលនេះតែងមានភាពទាក់ទាញ ដោយសារសំណង់នីមួយៗបានកសាងឡើងមានលំដាប់លំដោយសមស្រប មានភាពសាមញ្ញ ស្រឡះស្រឡំ។ បងស្រីត្រឹងធូធ្វី ផ្ទះនៅក្រុងកាវឡាញ់ ឱ្យដឹង៖ “ដើម្បីសម្ដែងនូវការដឹងគុណលោក ង្វៀងសិនសាក់ ដូច្នេះ ក្នុងបរិវេណមណ្ឌលកេរដំណែលមានដាំឈើលម្អ ផ្កាលម្អនិងរុក្ខជាតិដ៏កម្រជាច្រើន ដែលមាមីងនៅគ្រប់ទិសទីក្នុងទូទាំងប្រទេសផ្ញើមកដាំ។ ដូច្នេះ ថ្ងៃណាមានអារម្មណ៍ស្មុគស្មាញ ខ្ញុំតែងមកទីនេះដើម្បីលម្ហែអារម្មណ៍។ ចូលធ្វើសក្ការបូជាលោក ង្វៀងសិនសាក់ ដើរកម្សាន្តមួយរំពេចក្នុងបរិវេណដ៏ត្រជាក់ ធំទូលាយ ក៏បានល្ហែល្ហើយស្បើយពីទុក្ខកង្វល់គ្រប់យ៉ាង”៕

ហាថាញ-មុនី

ចែករំលែកអត្ថបទ

ពាក្យគន្លឹះ