សន្តិសុខ - ការពារប្រទេស ការពារប្រទេស

01/06/2021 - 08:32

ជំហររឹងមាំទីតាំងជួរមុខ

ជាកងកម្លាំងការពារព្រំដែនលើភូមិសាស្រ្តខេត្តកាម៉ាវ ប៉ុស្តិ៍ការពារព្រំដែនសុងដុក (ស្រុកត្រឹងវ៉ាន់ថើយ) តែងជំហរច្បាមទីតាំងជួរមុខដើម្បីសម្រេចនូវភារកិច្ចការពារព្រំដែន និងបង្ការ ប្រឆាំងជំងឺ COVID-១៩ ។

ប៉ុស្ដិ៍ត្រួតពិនិត្យព្រំដែនសុងដុក ផ្សព្វផ្សាយជូននេសាទករគប្បីអនុវត្តយ៉ាងម៉ឺងម៉ាត់នូវវិធានការបង្ការប្រឆាំងជំងឺ COVID-១៩។

មានវត្តមាននៅប៉ុស្តិ៍ត្រួតពិនិត្យព្រំដែនសុងដុក កន្លែងដែលមានចំនួនទូកកប៉ាល់នេសាទចេញចូលច្រើនបំផុតក្នុងខេត្តកាម៉ាវ យើងខ្ញុំសង្កេតឃើញទឹកមុខតានតឹងរបស់កម្មាភិបាលនិងយុទ្ធជននៅទីនេះ។ អនុសេនីយ៍ឯក ដោវ៉ាន់ឡាញ ប្រធានប៉ុស្តិ៍ត្រួតពិនិត្យព្រំដែនសុងដុក ឱ្យដឹង៖ ចាប់ពីជំងឺ COVID-១៩ កើតមានឡើង កម្មាភិបាល យុទ្ធជនប៉ុស្តិ៍ត្រូវធ្វើការងារច្រើនជាង បើប្រៀបនឹងថ្ងៃធម្មតា។ ពិសេស នៅវេលាប្រថុចញ៉ុចដែលអស់ជំនោរទឹកធ្វើនេសាទនៅសមុទ្រ អ្នកនេសាទឡើងមកកាន់ដីគោក មធ្យមភាគក្នុងមួយថ្ងៃមានទូកកប៉ាល់ជិត ១០០ គ្រឿង ដោយមានមនុស្សចេញចូលច្រកសមុទ្រជាង ៥០០ នាក់។ “មាមីងអ្នកនេសាទចេញចូលច្រកសមុទ្រ គ្មានកំណត់ម៉ោងវេលាអ្វីទេ ឬក៏មានករណីកើតឡើងនៅសមុទ្ររៀងរាល់ថ្ងៃ ដូច៖ គ្រោះថ្នាក់ ការងារទំនាស់ដែនទឹកនេសាទ។ល។ ម្ល៉ោះហើយ ការប្រចាំការមួយយប់ទល់ភ្លឺ ដើម្បីធ្វើសំណុំបែបបទនិងដោះស្រាយករណីជូនមាមីងជាកិច្ចការប្រចាំថ្ងៃរបស់អង្គភាព” - អនុសេនីយ៍ឯក ដោវ៉ាន់ឡាញ បានឱ្យដឹងដូច្នេះ។

កម្មាភិបាលក្រុម និងប៉មប្តូរវេនគ្នាប្រចាំការ ២៤/២៤ ម៉ោង។

ចេញពីប៉ុស្តិ៍ត្រួតពិនិត្យព្រំដែនសុងដុក យើងខ្ញុំទៅកន្លែងប៉មយាមបង្ការប្រឆាំងជំងឺ COVID-១៩ របស់អង្គភាពនៅតំបន់ព្រែកក្វាងថែប ទីប្រជុំជនសុងដុក។ ដោយសារគ្មានប៉ុស្ដិ៍ត្រួតពិនិត្យជាប់លាប់ ម្ល៉ោះហើយកន្លែងបោះទីតាំងត្រូវបានរៀបចំនៅក្រោមជើងស្ពាន ដើម្បីងាយស្រួលក្នុងការពិនិត្យតាមដានមនុស្ស និងមធ្យោបាយចេញចូលតាមច្រកសមុទ្រនៅពេលថ្ងៃ រីឯពេលយប់បងប្អូនសូមអាស្រ័យផ្ទះប្រជាជននៅក្បែរៗនោះ។ ក្រុមការងារមានតែកម្មាភិបាលប៉ុស្តិ៍ ២ រូបប៉ុណ្ណោះ ប៉ុន្តែនៅតែប្រចាំការ ២៤/២៤ ម៉ោង។ អនុសេនីយ៍ត្រី ឡឹមហ្វាងហាវ កម្មាភិបាលក្រុមប្រដាប់អាវុធ ប្រធានប៉ម ឱ្យដឹង៖ “អាកាសធាតុរដូវនេះ ភ្លៀងខ្យល់ខុសប្រក្រតី។ ថ្ងៃកំពុងក្តៅ ប៉ុន្តែមួយសន្ទុះក្រោយមកអាចនឹងមានភ្លៀងខ្យល់ក៏មានពេលយប់ក៏ដូច្នោះដែរ ភ្លៀងខ្យល់ផ្គររន្ទះរហូត ប៉ុន្តែបងប្អូននៅតែច្បាមប៉ម ច្បាមភូមិសាស្រ្ត តែងល្បាតពិនិត្យជារឿយៗ និងដោះស្រាយល្អរាល់ហេតុការណ៍ ប្តេជ្ញាចិត្តទប់ស្កាត់មិនឱ្យមនុស្សឆ្លងដែនខុសច្បាប់ចូលមកភូមិសាស្រ្តឡើយ”។ល។

អមដំណើរកងល្បាតមានអនុសេនីយ៍ឯក ឡេត្វឹងខាញ ប្រធានក្រុមប្រដាប់អាវុធធ្វើជាប្រធានកង ដើរល្បាតតាមដងព្រៃបង្ការនៅឆ្នេរសមុទ្រនិរតី ចាប់ពីម៉ោង ១-៥ ព្រឹក ទើបយល់ពីការលំបាក នឿយហត់របស់កម្មាភិបាល យុទ្ធជនការពារព្រំដែន។ ធ្វើដំណើរតាមផ្លូវ បងៗតែងពិនិត្យយកចិត្តទុកដាក់ពីស្លាកស្នាម ដូចជាដានស្នាមជើងតាមវាលល្បាប់នៃតំបន់ដងព្រៃ មែកឈើបាក់ សន្លឹកឈើជ្រុះ។ល។ ដងផ្លូវដើរល្បាតនៅពេលយប់ជ្រៅស្ងាត់ជ្រងំ ប៉ុន្តែបងៗកងទ័ពពាក់ស័ក្តិខៀវនៅតែបោះជំហានឈានជើងដើរល្បាតតាមឆ្នេរសមុទ្រជានិច្ច។ ម្យ៉ាងទៀត តំបន់និរតីកំពុងឈានចូលរដូវភ្លៀងព្យុះ ខ្យល់បក់បោកខុសធម្មតា ជាពិសេសគឺតំបន់ឆ្នេរសមុទ្រ។ ទោះបីស្ថិតក្នុងស្ថានភាពអាកាសធាតុបែបណាក៏ដោយ បងៗនៅតែជំហរច្បាមទីតាំងជួរមុខរឹងមាំ ដើម្បីសម្រេចនូវភារកិច្ចការពារព្រំដែន ទប់ស្កាត់ការឆ្លងដែន ខុសច្បាប់ និងបង្ការប្រឆាំងជំងឺ COVID -១៩៕

អាញវី - លីសៀ

ចែករំលែកអត្ថបទ

ពាក្យគន្លឹះ