មហាសាមគ្គីជនជាតិ គំរូក្នុងសហគមន៍

17/11/2020 - 08:29

ទឹកចិត្តគ្រូបង្រៀនភាសាបាលី

លោកឡឹមញឹម នាយកសាលាមធ្យមសិក្សាបំពេញវិជ្ជាបាលីណាមបូសុកត្រាំង មានប្រសាសន៍៖ “ម៉ាយយុងត្រាង ជាគ្រូបង្រៀនមួយរូបមានគុណសម្បត្តិ សីលធម៌ល្អ ទឹកចិត្តពោរពេញដោយក្ដីស្រឡាញ់ តែងគោរពឱ្យតម្លៃសមណៈសិស្សនិងមិត្តរួមការងារ។ គាត់តែងមានស្មារតីឈានឡើង ស្វ័យសិក្សាលើកកម្ពស់មុខជំនាញ។ សាលាបានប្រគល់ឱ្យគាត់ទទួលបន្ទុកបង្រៀនភាសាបាលី”។

លោកគ្រូម៉ាយយុងត្រាង ក្នុងម៉ោងបង្រៀនភាសាបាលី។

ឆ្នាំ ១៩៩៨ លោកគ្រូត្រាង ចូលបង្រៀនអក្សរសាស្ត្រខ្មែរនៅសាលាអនុវិទ្យាល័យវិញហ្វា លើភូមិសាស្ត្រក្រុងសុកត្រាំង។ បង្រៀនបណ្តើរ រៀនមហាវិទ្យាល័យបណ្ដើរ ឆ្នាំ ២០០៨ លោកគ្រូបានបញ្ចប់មហាវិទ្យាល័យគរុកោសល្យផ្នែកអក្សរសាស្ត្រ។ ឆ្នាំ ២០១៤ លោកគ្រូក៏មកបង្រៀនភាសាបាលីនៅសាលាមធ្យមសិក្សាបំពេញវិជ្ជាបាលីណាមបូសុកត្រាំង រហូតមកដល់សព្វថ្ងៃ។ លោកគ្រូត្រាង រៀបរាប់៖ “ ខ្ញុំសុំវត្តសំរោងទីក្រុងសុកត្រាំង បួសរៀនតាំងពីតូច។ រយៈពេលបួសរៀន ខ្ញុំសូមព្រះឧបជ្ឈាយ៍ទៅសិក្សានៅវត្តពាងសំរិទ្ធ (ឃុំអាងនិញ) រៀនធម្មវិន័យនិងបាលីអស់រយៈពេល ៦ ឆ្នាំ។ បន្ទាប់មក ប្រឡងជាប់ចូលសាលាមធ្យមសិក្សាបំពេញវិជ្ជាបាលីណាមបូសុកត្រាំង ជំនាន់ដំបូងបង្អស់របស់សាលា។ រៀននៅសាលានេះ បានសិក្សាជាមួយលោកគ្រូចំណានៗ មានបទពិសោធន៍និងចំណេះដឹងខាងភាសាបាលី ខ្ញុំកាន់តែជក់ចិត្តនិងបន្តក្តីប្រាថ្នា ចង់ក្លាយជាគ្រូបង្រៀនភាសាបាលី ”។

លោកគ្រូ ម៉ាយយុងត្រាង អស់ពីចិត្តនឹងការងារបង្ហាត់បង្រៀនភាសាបាលី។

សមណៈសិស្សយ័ញទៀង មានសង្ឃដីកា៖ “លោកគ្រូត្រាង ស្លូតបូត តែងតែគោរពសិស្សជានិច្ច ដូច្នេះអង្គណាក៏គោរពស្រឡាញ់លោកគ្រូដែរ។ លោកគ្រូពូកែខាងវេយ្យាករណ៍បាលី អក្សរសាស្ត្រខ្មែរ និងធម្មវិន័យ ដូច្នេះពេលបង្រៀនវេយ្យាករណ៍បាលី គាត់វែកញែកច្បាស់លាស់ បង្ហាញរូបមន្តសិស្សរៀនមេរៀនឆាប់ចេះ និងងាយចាំ”។

ទន្ទឹមនឹងនោះដែរ លោកគ្រូត្រាង នៅទាំងបានបង្រៀនភាសាបាលីនៅសាលាពុទ្ធិកសិក្សាវត្តពាងសំរិទ្ធ វត្តពោធិសត្ថារាម និងវត្តសំរោងទៀតផង។ បង្រៀនអក្សរសាស្ត្រខ្មែរដល់កម្មាភិបាល បុគ្គលិក អ្នករដ្ឋការ តាមគម្រោងរបស់គណៈកម្មាធិការបក្សខេត្តសុកត្រាំង។ លោកគ្រូត្រាង ឱ្យដឹង៖ “ការឡើងថ្នាក់បង្រៀនភាសាបាលីនៅសាលាគឺជាសម្ពាធមួយ ពីព្រោះសិស្សសុទ្ធតែជាព្រះសង្ឃ ការយល់ដឹងបង្គួរខាងភាសាបាលី ធម្មវិន័យ និងអក្សរសាស្ត្រខ្មែរផងដែរ។ ខ្ញុំបង្រៀនបណ្តើរ ស្រាវជ្រាវបណ្ដើរ ដើម្បីស្វែងយល់បង្កើនសមត្ថភាពខាងភាសាបាលីបន្ថែម។ ខ្ញុំពិតជាសប្បាយរីករាយនិងមានកិត្តិយសណាស់ ពេលបានក្លាយជាគ្រូបង្រៀនភាសាបាលី ”៕

លីធាន-លេងមី

ចែករំលែកអត្ថបទ

ពាក្យគន្លឹះ