វប្បធម៌-សិល្បៈ វប្បធម៌

08/04/2020 - 14:38

ទំនៀមទទួលទេវតាឆ្នាំថ្មី

ទំនៀមទទួលទេវតាឆ្នាំថ្មី ជាពិធីមួយត្រូវបានជនរួមជាតិខ្មែរប្រារព្ធនៅថ្ងៃដំបូងនៃពិធីបុណ្យចូលឆ្នាំថ្មី ចូលឆ្នាំជូតនេះត្រូវប្រព្រឹត្តឡើងចំថ្ងៃទី១៣ ខែមេសា មានឆ្នាំខ្លះត្រូវថ្ងៃ១៤ ខែមេសា តាមសុរិយាគតិ។ តាមទំនៀមពីបុរាណ កាលបើដាច់ឆ្នាំចាស់ផ្លាស់ចូលឆ្នាំថ្មី ក៏មានទេពធីតាមួយអង្គក្នុងចំណោមបុត្រីកបិលមហាព្រហ្មទាំង៧អង្គ យាងចុះមកទទួលតំណែងបន្តវេនអភិបាលរក្សាចក្រវាឡក្នុងឆ្នាំថ្មី ដោយយោងទៅតាមក្បួនហោរាសាស្ត្របុរាណ គឺក្បួនមហាសង្ក្រាន្ត។

ពិធីទទួលទេវតាឆ្នាំថ្មី។

មាមីងជនរួមជាតិខ្មែររាប់បាត្រព្រះសង្ឃក្នុងឱកាសបុណ្យចូលឆ្នាំថ្មី។

យោងទៅតាមក្បួនខាងលើ ការដែលកំណត់ដឹងថាចូលឆ្នាំថ្មីជារៀងរាល់ឆ្នាំ តើត្រូវវេនទេពធីតាអង្គណាទទួលរក្សានោះ គឺលោកកំណត់ដឹងទៅតាមថ្ងៃដែលចូលឆ្នាំថ្មីនោះ តើត្រូវចំថ្ងៃណាក្នុងចំណោម៧ថ្ងៃក្នុងមួយសប្តាហ៍ ហើយលោកបានកំណត់ថា មានទេពធីតាមួយព្រះអង្គរបស់កបិលមហាព្រហ្មមានភារកិច្ចទទួលបន្ទុកទៅតាមថ្ងៃនោះៗផងដែរ។ រីឯចូលឆ្នាំជូតឆ្នាំនេះ សង្ក្រាន្តនឹងចូលមកដល់នៅវេលាម៉ោង២០:៤៨នាទី ថ្ងៃច័ន្ទ ៦រោច ខែចេត្រ ត្រូវនឹងថ្ងៃទី១៣ ខែមេសា គ្រឹស្តសករាជ២០២០។ ពេលនោះ ព្រះអាទិត្យចេញពីមីនរាសីទៅឋិតនៅឯមេសរាសី តាមគោវិថីគឺផ្លូវកណ្តាល ទើបមានទេពធីតាមួយព្រះអង្គជាមគ្គនាយិកា ព្រះនាមគោរាគទេវី ជាបុត្រីទី២ នៃកបិលមហាព្រហ្ម គង់នៅចាតុម្មហារាជិកា ទ្រង់អម្ពរពណ៌លឿង ព្រះកាណ៌សៀតផ្កាអង្គាបុស្ប គ្រឿងប្រដាប់កាយដោយកែវមុក្ដា សោយតេលំ (ប្រេង) ព្រះហស្ដស្ដាំកាន់ព្រះខ័ន ព្រះហស្ដឆ្វេងកាន់ឈើច្រត់ ទ្រង់គង់លើខ្នងព្យគ្ឃ (ស្ដេចខ្លា) ជាពាហនៈ។ លុះដល់គម្រប់១ឆ្នាំជាសង្ក្រាន្ត ទេពធីតាទាំង៧អង្គ ក៏ផ្លាស់វេនគ្នាមកទទួលដង្ហែព្រះសិរសាកបិលមហាព្រហ្មជាបិតា ប្រទក្សិណភ្នំព្រះសុមេរុតាមផ្លូវព្រះអាទិត្យចរចំនួន៦០នាទី រួចយកទៅតម្កល់ទុកនៅកន្លែងដើមវិញ។ល។ ដែលជាពិធីកិច្ចមួយជនរួមជាតិខ្មែរតែងនិយមប្រារព្ធជារៀងរហូតមក។

មុនថ្ងៃចូលឆ្នាំថ្មីឈានមកដល់ គេនាំគ្នារៀបចំតុបតែងសម្អាតទីធ្លា វត្តអារាម ផ្លូវថ្នល់ ចេតិយ រមណីយដ្ឋាន ផ្ទះសម្បែង និងកាត់សម្លៀកបំពាក់ថ្មីៗ ដើម្បីត្រៀមទទួលទេវតាឆ្នាំថ្មី។ នៅតាមវត្តអារាម ភូមិឋាន ផ្ទះសម្បែង គេតុបតែងលម្អដោយអំពូលភ្លើងអគ្គិសនីចម្រុះពណ៌ ប្រទីបជ្វាលា ផ្កាភ្ញី ដោយមានបដាស្វាគមន៍ ទេវតាឆ្នាំថ្មី និងរៀបចំគ្រឿងពលិការផ្សេងៗសម្រាប់បូជាទេវតាឆ្នាំថ្មី។ នៅតាមផ្ទះ គេនិយមរៀបរានទេវតានៅមុខផ្ទះតែរៀងៗខ្លួន។ គេរៀបរានទេវតានៅលើតុមួយសម្រាប់ដាក់គ្រឿងពលិការ ដែលមានក្រាលកម្រាលផង។ គេនិយមជ្រើសយកកម្រាលតុឱ្យត្រូវនឹងសម្លៀកបំពាក់ទេវតាប្រចាំឆ្នាំនោះ ដូចជាឆ្នាំនេះ គួរប្រើកម្រាលពណ៌លឿង ដ្បិតទេវតាឆ្នាំថ្មី ព្រះនាមគោរាគទេវី ទ្រង់អម្ពរពណ៌លឿង នៅលើតុគេរៀបគ្រឿងសក្ការបូជាមានដូច បាយសីមួយគូ ស្លាធម៌មួយគូ ទៀន៥ ធូប៥ លាជ៥ ផ្កា៥ ទឹកអប់មួយគូ ទឹកមួយផ្ដិលនិងភេសជ្ជៈ នំនែក ផ្លែឈើជាដើម។

លុះដល់វេលាកំណត់ទេវតាយាងចុះមក ស្នូរស្គររគាំង សំឡេងធម៌ពរជ័យលាន់ឮរន្ទឺអឹងកងចេញពីវត្តអារាម។ នៅតាមផ្ទះ គេក៏នាំកូនចៅក្នុងគ្រួសារមកអង្គុយជុំគ្នា នៅជិតកន្លែងរៀបគ្រឿងសក្ការៈបូជានោះ អុជទៀនធូប បាញ់ទឹកអប់គន្ធពិដោរ នមស្សការព្រះរតនត្រ័យ ដើម្បីទទួលទេវតាឆ្នាំថ្មី។ ហើយនេះក៏ជាពិធីជូនដំណើរទេវតាឆ្នាំចាស់ ប្រកាសស្វាគមន៍ទេវតាឆ្នាំថ្មីផងដែរ ដើម្បីមានសិរីសួស្តី មានលាភ មានជ័យ ទេវតាឆ្នាំថ្មីប្រទានពរដល់ក្រុមគ្រួសារកាន់តែមានសំណាងល្អ ចាប់ពីថ្ងៃចូលឆ្នាំថ្មីនេះតរៀងទៅ។ ម្យ៉ាងទៀត ដើម្បីកម្ចាត់បង់នូវអពមង្គល ឧបទ្រពចង្រៃទាំងឡាយទាំងពួងដែលកើតមានក្នុងឆ្នាំចាស់ឱ្យជ្រះស្រឡះ ជួបតែសិរីសួស្ដី ជ័យមង្គល វិបុលសុខគ្រប់ប្រការ ត្រជាក់ប្រជុំ សុខដុមរមនា រកទទួលទានមានបានសុខភាពល្អតរៀងទៅ។ ម្យ៉ាងវិញទៀត ដើម្បីជម្រះចិត្តឱ្យស្អាតបរិសុទ្ធចាកនូវមន្ទិលសៅហ្មងទាំងពួងក្នុងឆ្នាំថ្មី បំពេញកិច្ចការអ្វីក៏បានសម្រេចដូចប្រាថ្នា។ល។

តាមទំនៀម បុណ្យចូលឆ្នាំថ្មីប្រពៃណីប្រព្រឹត្តទៅក្នុងរយៈពេល៣ថ្ងៃ។ ថ្ងៃទី១ ជាវារៈមហាសង្ក្រាន្ត៖ គេយកចង្ហាន់ទៅប្រគេនព្រះសង្ឃ។ ពេលល្ងាច នាំគ្នាជញ្ជូនខ្សាច់សាងវាលុកចេតិយ។ ពេលយប់ប្រគេនភេសជ្ជៈដល់ព្រះសង្ឃ និមន្តព្រះសង្ឃចម្រើនព្រះបរិត្ត និងសម្ដែងធម៌ទេសនា។ ថ្ងៃទី២ ជាវារៈវ័នបត៖ កូនចៅជូនសម្លៀកបំពាក់ នំចំណី លុយកាក់ដល់មាតាបិតា ជីដូនជីតាជាដើម។ ពេលល្ងាច គេនាំគ្នាពូនភ្នំខ្សាច់បន្តទៀត ហើយសូត្រធម៌អធិដ្ឋានភ្នំខ្សាច់ សន្មតទុកដូចជាចូឡាមណីចេតិយ រួចនិមន្តព្រះសង្ឃបង្សុកូលចេតិយ ឧទ្ទិសមគ្គផលដល់វិញ្ញាណក្ខ័ន្ធបុព្វការីជនដែលបានស្លាប់ទៅ។ ថ្ងៃទី៣ ជាវារៈឡើងស័ក៖ ពេលព្រឹកនិមន្តព្រះសង្ឃឆ្លងភ្នំខ្សាច់ ដាក់បាត្រព្រះសង្ឃ។ ពេលល្ងាចស្រង់ទឹកព្រះ និងនិមន្តព្រះសង្ឃស្រង់ទឹក (នៅតាមភូមិស្រុកខ្លះ គេនៅទាំងអញ្ជើញមាតាបិតា ជីដូនជីតា ចាស់ទុំក្នុងភូមិ មកផ្ងូតទឹកទៀតផង)។ ថ្ងៃឡើងស័កក៏ជាថ្ងៃឆ្លងបុណ្យ ជនរួមជាតិខ្មែរគោរពប្រតិបត្តិព្រះពុទ្ធសាសនា គេនិយមនិមន្តព្រះសង្ឃបង្សុកូលនិងសូត្រមន្តលើករាសី ចម្រើនសិរីសួស្ដីជ័យមង្គលសម្រាប់ឆ្នាំថ្មី ។

ក្រៅពីពិធីសាសនា ក្នុងរយៈពេល៣ថ្ងៃនៃបុណ្យចូលឆ្នាំ ក៏មានសកម្មភាពផ្សេងៗសម្រាប់លេងកម្សាន្ត ទាំងចាស់ទាំងក្មេង ទាំងក្រមុំកំលោះ ប្រជុំគ្នាលេងសប្បាយតាមចំណង់ចំណូលចិត្ត។ ភាគច្រើននៅតាមភូមិឋាន វត្តអារាម គេនាំគ្នាលេងល្បែងប្រជាប្រិយ ដូចជា បោះឈូង លាក់កន្សែង ទាញព្រ័ត្រ ចាប់កូនខ្លែង វាយក្អម។ល។ ព្រមទាំងនាំគ្នារាំលេងទៅតាមការនិយមចូលចិត្ត អ្នកខ្លះដើរកម្សាន្តតាមតំបន់រមណីយដ្ឋាននានា បង្កើតនូវសាមគ្គីភាព ភាតរភាព រឹតចំណងមនោសញ្ចេតនាថែរក្សាប្រពៃណី ទំនៀមទម្លាប់ វប្បធម៌ឱ្យបានគង់វង្ស រុងរឿងតរៀងទៅ។ ក្នុងឱកាសបុណ្យចូលឆ្នាំថ្មី សូមជូនពរដល់លោកអ្នកនាង និងក្រុមគ្រួសារ មានសេចក្ដីរីករាយ សុខភាពល្អបរិបូណ៌ និងសុភមង្គលគ្រប់ពេលវេលាកុំបីអាកខានឡើយ៕

អត្ថបទ រូបថត៖ ពេជ្រសឿន

ចែករំលែកអត្ថបទ

ពាក្យគន្លឹះ