ព្រឹត្តិការណ៍ - នយោបាយ ព្រឹត្តិការណ៍

09/11/2026 - 09:38

ទូទាំងប្រព័ន្ធនយោបាយរួមគ្នាខិតខំប្រឹងប្រែង ដើម្បីរួមចំណែកសម្រេចបាននូវគោលដៅកំណើន

ក្រុមអ្នកតំណាងលេខ ៤ នៃក្រុមប្រឹក្សាប្រជាជនទីក្រុងកឹងធើ រួមមាន៖ លោកដុងវ៉ាំងថាញ សមាជិកគណៈប្រតិបត្តិការមជ្ឈិមបក្ស អនុប្រធានប្រចាំការនៃគណៈកម្មាធិការបក្សទីក្រុង ប្រធានក្រុមប្រឹក្សាប្រជាជនទីក្រុង; លោកត្រឹងថាញលីម លេខាគណៈកម្មាធិការបក្ស ប្រធានក្រុមប្រឹក្សាប្រជាជនសង្កាត់វីថាញ និងលោកស្រីឡេធីថាញញ៉ាង អនុប្រធានគណៈកម្មការសេដ្ឋកិច្ច-ថវិកានៃក្រុមប្រឹក្សាប្រជាជនទីក្រុង បានជួបសំណេះសំណាលជាមួយអ្នកបោះឆ្នោតនៅសង្កាត់វីតឹង និងឃុំវីថាញ ១។

អ្នកតំណាងចំណុះក្រុមអ្នកតំណាងលេខ ៤ នៃក្រុមប្រឹក្សាប្រជាជនទីក្រុងកឹងធើ។

នៅក្នុងកិច្ចជំនួបនេះ អ្នកបោះឆ្នោតបានជូនដំណឹងអំពីសម័យប្រជុំចុងឆ្នាំរបស់ក្រុមប្រឹក្សាប្រជាជនទីក្រុង ដែលនឹងប្រព្រឹត្តទៅរយៈពេល ២ ថ្ងៃ (ថ្ងៃទី ៨ និងទី ៩ ខែធ្នូ) ដោយមាន៥កិច្ចប្រជុំ និងបានផ្សាយបន្តផ្ទាល់តាមរលកធាតុអាកាសរបស់សារព័ត៌មាននិងវិទ្យុ ទូរទស្សន៍កឹងធើ; សម័យប្រជុំនេះនឹងពិនិត្យនិងផ្តល់យោបល់លើរបាយការណ៍ចំនួន ៣៤ និងសេចក្តីព្រាងសេចក្តីសម្រេចចំនួន ៣២ ហើយខ្លឹមសារជាច្រើនពាក់ព័ន្ធនឹងសិទ្ធិ ផលប្រយោជន៍របស់អ្នកបោះឆ្នោតលើភូមិឋាន។

ក្នុងរយៈពេល ១០ ខែកន្លងមកនេះ កម្រិតផែនការចំនួន ២៥ ដែលក្រុមប្រឹក្សាប្រជាជនទីក្រុងបានដាក់ចេញសម្រេចលទ្ធផលជាវិជ្ជមាន។ ចំណុចដែលគួរឱ្យកត់សម្គាល់គឺការទាក់ទាញវិនិយោគ មានគម្រោងវិនិយោគក្នុងស្រុកចំនួន ៣៦ និងគម្រោងវិនិយោគផ្ទាល់ពីបរទេស (FDI) ចំនួន ៥។ មានអាជីវកម្មចំនួន ៣.៥៤៦ បានទទួលវិញ្ញាបនបត្រចុះបញ្ជីថ្មី ដោយមានទុនចុះបញ្ជីសរុបជាង ២៣.៦០០ ពាន់លានដុង។ បច្ចុប្បន្ន ទីក្រុងមានគម្រោងសាងសង់លំនៅឋានសង្គមចំនួន ២០; អត្រាគ្របដណ្តប់ធានារ៉ាប់រងសុខាភិបាលសម្រេចបានជាង ៩៦%; សកម្មភាពទេសចរណ៍មានការវិវឌ្ឍគួរឱ្យកត់សម្គាល់គិតត្រឹមរយៈពេល ១០ ខែ មានភ្ញៀវទេសចរមកស្នាក់នៅសរុបជាង ៤,៦ លាននាក់ និងទទួលបានចំណូលសរុបចំនួន ១១.១១០ ពាន់លានដុង។

អ្នកបោះឆ្នោតនៅសង្កាត់វីតឹង លើកសំណើជូនចំពោះអ្នកតំណាងក្រុមប្រឹក្សាប្រជាជនទីក្រុង។

អ្នកបោះឆ្នោតបានវាយតម្លៃខ្ពស់ចំពោះកិច្ចខិតខំប្រឹងប្រែងរបស់ក្រុមប្រឹក្សាប្រជាជនទីក្រុង ក្នុងការអនុម័តសេចក្តីសម្រេចជាច្រើនសមស្របទៅនឹងលំហអភិវឌ្ឍន៍ថ្មី។ ទន្ទឹមនឹងនោះ អ្នកបោះឆ្នោតក៏បានបង្ហាញពីក្តីបារម្ភដោយសារអត្រាកំណើននៅមានកម្រិតទាប បើប្រៀបធៀបនឹងផែនការប្រចាំឆ្នាំ។ អគារទីស្នាក់ការ និងដីដែលមិននៅមានតម្រូវការប្រើប្រាស់ជាច្រើនត្រូវបានទុកចោល សំណង់និងគម្រោងនានាមានភាពយឺតយ៉ាវក្នុងការអនុវត្តអូសបន្លាយ ពេលវេលាបង្កការប៉ះពាល់ដល់សោភណភាពទីក្រុង។ អ្នកបោះឆ្នោតបានស្នើឱ្យទីក្រុង គប្បីយកចិត្តទុកដាក់បន្ថែមលើការវិនិយោគក្នុងវិស័យសុខាភិបាលមូលដ្ឋានគ្រប់គ្រង ឱ្យបានតឹងរ៉ឹងនូវសណ្តាប់ធ្នាប់ទីក្រុង និងយកចិត្តទុកដាក់លើការវិនិយោគជួសជុលនិងកែលម្អផ្លូវថ្នល់ស្ពានដែលទ្រុឌទ្រោមជាដើម។

ថ្លែងនៅក្នុងកិច្ចជំនួប លោកដុងវ៉ាំងថាញ បានឱ្យដឹង ក្នុងរយៈពេល ៩ ខែ ឆ្នាំ ២០២៦ ផលិតផល (GRDP) សរុបរបស់ទីក្រុងសម្រេចបានកំណើន ៧,៨៩%។ ដើម្បីឱ្យកំណើនពេញមួយឆ្នាំសម្រេចបាន ១០,០៧% ក្នុងត្រីមាសទី៤ ទីក្រុងត្រូវសម្រេចឱ្យបានអត្រាកំណើន ១៦,០៨%។ នេះគឺជាបញ្ហាដែលមិនងាយស្រួលនោះទេ ដូច្នេះទូទាំងប្រព័ន្ធនយោបាយនិងប្រជាជនត្រូវរួមគ្នាខិតខំប្រឹងប្រែងដើម្បីសម្រេចទិសដៅរួម។ ទីក្រុងបានដាក់ទិសដៅឱ្យដំណាក់សុខាភិបាលនីមួយៗមានវេជ្ជបណ្ឌិតពី ៤-៥ នាក់ ព្រមទាំងបំពាក់បន្ថែមនូវឧបករណ៍បរិក្ខារពេទ្យដែលសមស្រប ដើម្បីបម្រើដល់ការពិនិត្យនិងព្យាបាលជំងឺដំបូងជូនប្រជាជន។ ពាក់ព័ន្ធនឹងអគារនិងដីដែលមិននៅមានតម្រូវការប្រើប្រាស់ នៅទូទាំងទីក្រុងមាន ៦៧២ ទីតាំង។ បច្ចុប្បន្ន ទីតាំងចំនួន ៣៧៦ បានកំណត់ផែនការសម្រាប់ប្រើប្រាស់ ក្នុងនោះ មានទីតាំងចំនួន ២១៤ កំពុងអនុវត្តនីតិវិធីប្រគល់ដី និងជួលដី ស្របតាមបទប្បញ្ញត្តិជាធរមាន។

ប្រធានក្រុមប្រឹក្សាប្រជាជនទីក្រុង បានស្នើឱ្យរដ្ឋអំណាចភូមិភាគពិនិត្យឡើងវិញនូវសំណើរបស់អ្នកបោះឆ្នោត ពិសេស គឺសំណើដែលពាក់ព័ន្ធនឹងផ្លូវថ្នល់ ស្ពានដែលមានសភាពទ្រុឌទ្រោម ព្រមទាំងពិនិត្យលទ្ធភាពប្រើប្រាស់ប្រភពទុនវិនិយោគនានា ដើម្បីយកមកជួសជុលកែលម្អ។ ទន្ទឹមនឹងនោះ ត្រូវរៀបចំឱ្យបានម៉ត់ចត់ ប្រកបដោយជោគជ័យសម្រាប់ការបោះឆ្នោតជ្រើសរើសប្រធានគណៈប្រជាជនភូមិ ប្រធានគណៈប្រជាជនមណ្ឌល និងសមាជិកនៃគណៈកម្មការអធិការកិច្ចប្រជាជន អាណត្តិកាល ២០២៦-២០៣០៕

ហ្វាងង្វៀង - ពេជ្រសឿន

ចែករំលែកអត្ថបទ

ពាក្យគន្លឹះ