គោលនយោបាយ -ការរស់នៅ គោលនយោបាយ

06/11/2026 - 21:58

កាម៉ាវយកចិត្តទុកដាក់បង្កប្រភពកម្មាភិបាលជនជាតិភាគតិច

យកចិត្តទុកដាក់រៀបចំផែនការ បណ្តុះបណ្តាល បំពាក់បំប៉ន និងចាត់ចែងកម្មាភិបាលជនជាតិភាគតិច គឺជាភារកិច្ចសំខាន់ ដើម្បីពង្រឹងប្រព័ន្ធនយោបាយមូលដ្ឋាន រឹតបន្តឹងផែនមហាសាមគ្គីទូទាំងជនជាតិ។ ផ្តើមពីគោលការណ៍ គោលនយោបាយជាក់ស្តែងនោះ កម្មាភិបាលខ្មែរជាច្រើនបានវិវឌ្ឍខ្លួន ពង្រីកសមត្ថភាព រួមចំណែកយ៉ាងសកម្មក្នុងការឃោសនា ចលនា និងគិតគូរជីវភាពប្រជាជន។

កំណត់ការងារកម្មាភិបាលជនជាតិភាគតិច គឺជាយុទ្ធសាស្ត្រយូរអង្វែង បានគណៈកម្មាធិការប្រជាជនខេត្តកាម៉ាវ ដាក់ឱ្យប្រើផែនការលេខ ៣៨០ អំពីរៀបចំផែនការ បណ្តុះបណ្តាល បំពាក់បំប៉ន ចាត់ចែង និងប្រើប្រាស់កម្មាភិបាល អ្នករដ្ឋការ បុគ្គលិកជនជាតិភាគតិច ដំណាក់កាល ២០២៦–២០៣០។ នេះគឺជាជំហានធ្វើឱ្យទៅជាភាពជាក់ស្តែងនូវសេចក្តីសម្រេចចិត្តរបស់បក្សអំពីការងារជនជាតិក្នុងស្ថានភាពថ្មី។

សាលាវិទ្យាល័យជនជាតិអន្តេវាសិកកាម៉ាវ ជាកន្លែងបណ្តុះបណ្តាលប្រភពកម្មាភិបាលជនជាតិភាគតិច។

បច្ចុប្បន្ន រដ្ឋអំណាចខេត្តកាម៉ាវ មានកម្មាភិបាល អ្នករដ្ឋការ បុគ្គលិកជាជនជាតិភាគតិចចំនួន១.២៣៨នាក់ ក្នុងចំណោម ៣២.៩៥៩នាក់ (ស្រូបអត្រា ៣,៧៥%) ក្នុងនោះជនរួមជាតិខ្មែរចំនួន ៨៣៣នាក់ ជនជាតិចិន៣២២នាក់ និងជនជាតិផ្សេងៗទៀតចំនួន៨៣នាក់។ អំពីគុណភាពមុខជំនាញ សមមិត្តមានកម្រិតវិជ្ជាក្រោយឧត្តមសិក្សាចំនួន១៥៥នាក់ និងមានកម្រិតវិជ្ជាបរិញ្ញាបត្រ៨៧៨នាក់។ ទោះបីដូច្នេះក្តី បច្ចុប្បន្នទូទាំងខេត្តមានកម្មាភិបាលជនជាតិភាគតិចកាន់មុខតំណែងដឹកនាំ និងគ្រប់គ្រង ចំនួន៨៥នាក់ (ស្រូបអត្រា៦,៨៧%)។ ភាពជាក់ស្តែងនេះ ទាមទារគណៈកម្មាធិការបក្ស រដ្ឋអំណាចគ្រប់ថ្នាក់ យកចិត្តទុកដាក់ប្រទះឃើញ និងបណ្តុះបណ្តាលប្រភពកម្មាភិបាលស្នងបន្ត ពិសេសគឺកម្មាភិបាលវ័យក្មេង និងកម្មាភិបាលនារី។ តាមប្រសាសន៍លោក ង៉ោវ៉ូវថាំង អនុប្រធានគណៈកម្មាធិការប្រជាជនខេត្តកាម៉ាវ ដំណាក់កាល ២០២៦ – ២០៣០ ខេត្តបានកំណត់ទិសដៅ រាល់មុខតំណែងថ្នាក់ដឹកនាំ និងគ្រប់គ្រងសំខាន់ៗនៅតំបន់ជនជាតិភាគតិច យ៉ាងហោចណាស់មានប្រភពកម្មាភិបាលស្នងបន្តម្នាក់; កម្មាភិបាលទាំងអស់ដែលស្ថិតក្នុងក្របខណ្ឌរៀបចំផែនការបានធ្វើឱ្យសុក្រឹតតាមបទដ្ឋានមុខតំណែង; រាល់ឆ្នាំយ៉ាងហោចណាស់បានបំប៉នលើកកម្ពស់សមត្ថភាព១៥% និងកម្មាភិបាលគ្រប់គ្រងទាំងអស់បានបំប៉នចំណេះដឹងផ្លាស់ប្តូរឌីជីថល និងកែទម្រង់រដ្ឋបាល។ ទន្ទឹមនឹងនោះ កម្មាភិបាល អ្នករដ្ឋការដែលជា ជនជាតិភាគតិចទាំងអស់ខិតខំមានកម្រិតវិជ្ជាបរិញ្ញាបត្រឡើងទៅ ក្នុងនោះយ៉ាងហោចណាស់១០% មានកម្រិតវិជ្ជាអនុបណ្ឌិត។ តាមរយៈនោះ គណៈកម្មាធិការប្រជាជនខេត្តសំណូមពរមន្ទីរជនជាតិ និងសាសនា បន្តយកចិត្តទុកដាក់បណ្តុះបណ្តាល និងអភិវឌ្ឍប្រភពធនធានមនុស្ស បំផុតគឺកម្មាភិបាលជនជាតិភាគតិច កសាងកងជួរបំពេញការងារជនជាតិមានភាពអង់អាចខាងនយោបាយរឹងមាំ ប្តូរផ្តាច់ និងមានសមត្ថភាពអនុវត្ត ឆ្លើយតបនឹងតម្រូវការភារកិច្ចក្នុងដំណាក់កាលអភិវឌ្ឍថ្មី។

*វិវឌ្ឍន៍ខ្លួនពីមូលដ្ឋាន អស់ពីចិត្តដើម្បីជនរួមជាតិ

មានប្រៀបធំបំផុតរបស់កម្មាភិបាលជាជនជាតិភាគតិច គឺនិយាយភាសាខ្មែរ យល់ដឹងពីទំនៀមទម្លាប់ ប្រពៃណី និងជីវភាពជំនឿផ្លូវចិត្តរបស់ប្រជាជន។ ផ្តើមពីគោលការណ៍បង្កប្រភព បណ្តុះបណ្តាល និងបំពាក់បំប៉ន ទើបកម្មាភិបាលខ្មែរជាច្រើនបានពង្រីកឧត្តមភាព រួមចំណែកនាំយកគោលការណ៍ គោលមាគ៌ារបស់បក្ស គោលនយោបាយ ច្បាប់របស់រដ្ឋកាន់តែជិតដិតនឹងជនរួមជាតិខ្មែរជាងទៀត។ លេចធ្លោបំផុតគឺបងស្រី ថាច់ធីហ្វា អ្នកឯកទេសនៃគណៈកម្មាធិការរណសិរ្សមាតុភូមិវៀតណាមសង្កាត់ហ៊ីបថាញ់ ខេត្តកាម៉ាវ។

ច្រើនឆ្នាំកន្លង បងស្រីហ្វា តែងចុះទៅតាមភូមិស្រុក ជួបទំនាក់ទំនងជាមួយគណៈកម្មការវត្ត អ្នកមានប្រិយភាព និងមាមីង ដើម្បីក្តោបក្តាប់មតិគោលបំណង។ ដោយចលនាជាភាសាខ្មែរ ហេតុនោះមានភាពជិតស្និទ្ធ ងាយយល់ ហើយគាត់ប៉ិនប្រសប់ក្នុងការផ្គួបបញ្ចូលនូវខ្លឹមសារសេចក្តីសម្រេចជាមួយនឹងទម្រង់អភិវឌ្ឍសេដ្ឋកិច្ច ឧបត្ថម្ភគ្រួសារក្រីក្រ សង់លំនៅឋាន ការពារបរិស្ថាន និងថែរក្សាអត្តសញ្ញាណវប្បធម៌ជាតិ។ បងស្រីហ្វា ឱ្យដឹង៖ "ខ្ញុំជាជនជាតិខ្មែរ ហេតុនោះពេលជួបមាមីងខ្ញុំតែងនិយាយ និងផ្សព្វផ្សាយដោយភាសាខ្មែរ អ្នកណាក៏ចូលចិត្តពីព្រោះងាយយល់ ងាយចាំ។ ជំនួសឱ្យនិយាយតែខ្លឹមសារសេចក្តីសម្រេច ខ្ញុំតែងផ្សារភ្ជាប់ជាមួយទម្រង់អភិវឌ្ឍសេដ្ឋកិច្ច ឧបត្ថម្ភគ្រួសារក្រីក្រ សង់លំនៅឋាន ការពារបរិស្ថាន ថែរក្សាអត្តសញ្ញាណវប្បធម៌ជាតិ… ដើម្បីមាមីងឃើញច្បាស់នូវសេចក្តីសម្រេចចិត្ត បានធ្វើឱ្យទៅជាភាពជាក់ស្តែងតាមរយៈការងារជាក់ស្តែង"។

កម្មាភិបាលខ្មែរនៅមូលដ្ឋានគឺជា "ស្ពានតភ្ជាប់" នាំយកគោលការណ៍របស់បក្ស គោលនយោបាយ ច្បាប់របស់រដ្ឋដល់ជនរួមជាតិខ្មែរ។

លើវិស័យអប់រំ លោកគ្រូឡឹមថាញញ៉ា – គ្រូបង្រៀនសាលាវិទ្យាល័យជនជាតិអន្តេវាសិកកាម៉ាវ ក៏ជាភស្តុតាងបង្ហាញពីគោលនយោបាយបណ្តុះបណ្តាលប្រភពពីសាលាជនជាតិអន្តេវាសិកដែរ។ ក្រោយពីបញ្ចប់បរិញ្ញាបត្រគរុកោសល្យ លោកគ្រូបានត្រឡប់មកបង្ហាត់បង្រៀនដល់សិស្សជនជាតិភាគតិច។ លោកគ្រូញ៉ា ឱ្យដឹង៖ "គោលនយោបាយរបស់បក្ស និងរដ្ឋបានបើកឱកាសឱ្យខ្ញុំបានរៀនសូត្រ ។ ព្រោះហេតុនោះ ក្រៅពីផ្តល់ចំណេះដឹង ខ្ញុំតែងក្រើនរំលឹកសិស្សឱ្យខិតខំរៀនសូត្រ ដើម្បីអនាគតក្លាយជាប្រភពកម្មាភិបាលស្នងបន្ត វិលត្រឡប់មកកសាងភូមិស្រុក"។

ការបង្កប្រភពកម្មាភិបាលជនជាតិភាគតិចមិនត្រឹមតែជាការលើកកម្ពស់កម្រិតវប្បធម៌ និងមុខជំនាញប៉ុណ្ណោះទេ ថែមទាំងជាដំណើរការបំប៉នភាពអង់អាចខាងនយោបាយ ទទួលខុសត្រូវ ប្តូរផ្តាច់ និងមានស្មារតីផ្សារភ្ជាប់ជាមួយប្រជាជនទៀតផង។ ជាមួយនឹងដំណោះស្រាយព្រមៗគ្នា និងយូរអង្វែង កាម៉ាវបានកសាងកងជួរកម្មាភិបាលជនជាតិភាគតិច មានសមត្ថភាពគ្រប់គ្រាន់ជាបណ្តើរៗ មានរចនាសម្ព័ន្ធសមស្រប រួមចំណែកពង្រឹងផែនមហាសាមគ្គីទូទាំងជនជាតិ កសាងប្រព័ន្ធនយោបាយរឹងមាំ និងជំរុញតំបន់ជនជាតិភាគតិចអភិវឌ្ឍដោយចីរភាព៕

យ្វីអាញ - វិមាន

ចែករំលែកអត្ថបទ

ពាក្យគន្លឹះ