សន្តិសុខ - ការពារប្រទេស ការពារប្រទេស

27/10/2026 - 20:48

ជាទីបង្អែករបស់ប្រជាជនកោះហងជូយ

ចាប់តាំងពីការជួយប្រជាជនរុះរើលំនៅឋានដើម្បីបញ្ជៀសរលកធំ គិតគូរពីទឹកប្រើប្រាស់ សុខភាព រហូតដល់ការណែនាំពីរបៀបប្រើប្រាស់សេវាកម្មឌីជីថល កម្មាភិបាល យុទ្ធជននៃប៉ុស្តិ៍ការពារព្រំដែនកោះហងជូយ ខេត្តកាម៉ាវ តែងរួមដំណើរជាមួយប្រជាជនតាមរយៈសកម្មភាពជាក់ស្តែង។ ការអស់ពីចិត្តពីថ្លើម និងការទទួលខុសត្រូវរបស់យុទ្ធជនពាក់ស័ក្តិខៀវ បានរួមចំណែកជួយឱ្យមាមីងលំនឹងជីវភាព និងផ្សារភ្ជាប់ជាមួយកោះសមុទ្រនៃមាតុភូមិ។

*ជួយប្រជាជនលំនឹងជីវភាព

កោះហងជូយ ស្ថិតនៅឃុំសុងដុក ខេត្តកាម៉ាវ នៅចម្ងាយពីដីគោកប្រមាណ ១៨ គាវុត បច្ចុប្បន្នមានប្រជាជនរស់នៅ ៦៥ គ្រួសារ ដែលភាគច្រើនចិញ្ចឹមជលផលនិងនេសាទជលផលតាមសមុទ្រ។ ដោយនៅឆ្ងាយពីដីគោក ការធ្វើដំណើរអាស្រ័យទាំងស្រុងលើទូកកប៉ាល់ ហើយជីវភាពរស់នៅជួបការលំបាកជាច្រើន ប្រជាជនកាន់តែត្រូវការការជួយឧបត្ថម្ភរាល់ពេលដែលអាកាសធាតុប្រែប្រួលខុសប្រក្រតី និងសមុទ្ររំជួលខ្លាំង។ វរសេនីយ៍ទោ ង្វៀងវ៉ាំងវឿន ស្នងការនយោបាយនៃប៉ុស្តិ៍ការពារព្រំដែនកោះហងជូយ បានឱ្យដឹងថា អង្គភាពទើបតែកៀរគរយុទ្ធជនចំនួន ៨ រូប ដើម្បីជួយប្រជាជន ៥ គ្រួសាររុះរើលំនៅឋានពីហ្គេនចឿង ទៅកាន់ហ្គេនណាម ដោយធានានូវសុវត្ថិភាពអាយុជីវិតនិងទ្រព្យសម្បត្តិ។ ក្នុងរយៈពេលមួយថ្ងៃអនុវត្តការងារយ៉ាងបន្ទាន់ យុទ្ធជន និងប្រជាជនបានសហការគ្នារុះរើផ្ទះ ដឹកជញ្ជូនសម្ភារៈ គ្រឿងឧបភោគបរិភោគ និងសង់ទីជម្រកឡើងវិញ។ ដោយភូមិឋានជម្រាលចោត ផ្លូវធ្វើដំណើរក៏លំបាក ធ្វើឱ្យការដឹកជញ្ជូនជួបការលំបាកមិនតិច។ ដោយស្មារតីទទួលខុសត្រូវ យុទ្ធជនបានខិតខំប្រឹងប្រែងជួយដល់គ្រួសារនីមួយៗឱ្យឆាប់មានទីលំនៅស្ថិរភាព មានការលំនឹងចិត្តនិងបន្តសកម្មភាពផលិត។

កម្មាភិបាលយុទ្ធជនប៉ុស្តិ៍ការពារព្រំដែនកោះហងជួយប្រជាជនរុះរើលំនៅឋានទៅកាន់ទីកន្លែងមានសុវត្ថិភាព។

យោងតាមវរសេនីយ៍ទោ ង្វៀងវ៉ាំងវឿន ការរុះរើកន្លែងរស់នៅតាមរដូវកាលបានផ្សារភ្ជាប់នឹងជីវភាពរបស់ប្រជាជនកោះហងជូយតាំងពីយូរយារណាស់មកហើយ។ ក៏ប៉ុន្តែការរុះរើជញ្ជូនទាំងផ្ទះ ទាំងសម្ភារៈប្រើប្រាស់ និងមធ្យោបាយផលិតក្នុងលក្ខខណ្ឌផ្លូវធ្វើដំណើរនៅមានកម្រិត គឺជាការងារដ៏លំបាកនឿយហត់ខ្លាំងណាស់។ ដោយយល់ច្បាស់ពីការលំបាកទាំងនោះ អង្គភាពបានម្ចាស់ការរៀបចំកម្លាំងដើម្បីជួយប្រជាជន ដោយធានាការរុះរើលំនៅឋានប្រព្រឹត្តទៅដោយសុវត្ថិភាពនិងឆាប់រហ័ស។

ការរួមដំណើររបស់កងទ័ពក៏បានបង្ហាញច្បាស់តាមរយៈការយកចិត្តទុកដាក់និងគិតគូរដល់តម្រូវការចាំបាច់ក្នុងជីវភាពប្រចាំថ្ងៃ។ នៅរដូវប្រាំងក្តៅខ្លាំង ពេលដែលប្រភពទឹកធម្មជាតិរីងស្ងួត អង្គភាពបានសហការដឹកជញ្ជូនទឹកស្អាតមកកាន់កោះ ដើម្បីសម្រាលការលំបាកដល់មាមីង។ បណ្តាសកម្មភាពពិនិត្យព្យាបាលជំងឺ ផ្តល់ថ្នាំពេទ្យដោយឥតគិតថ្លៃ និងណែនាំពីការបង្ការជំងឺក៏បានជួយឱ្យប្រជាជនមានឱកាសបន្ថែមក្នុងការថែទាំសុខភាពផងដែរ។ ចំពោះសិស្សានុសិស្ស យុទ្ធជនតែងយកចិត្តទុកដាក់ជូនអំណោយ ឧបករណ៏សិក្សា និងលើកទឹកចិត្តដល់ប្អូនៗឱ្យខិតខំជម្នះការលំបាកទៅកាន់សាលារៀន។ នៅពេលដែលអ្នកនេសាទជួបការលំបាកលើផ្ទៃសមុទ្រ ឬអាកាសធាតុប្រែប្រួលខុសប្រក្រតី អង្គភាពតែងត្រៀមខ្លួនជាស្រេចដើម្បីជួយសង្គ្រោះបន្ទាន់។

*នាំយកផលប្រយោជន៍ឌីជីថលមកកាន់កោះដាច់ស្រយាល

ទន្ទឹមនឹងការយកចិត្តទុកដាក់គិតគូរដល់ជីវភាព ប៉ុស្តិ៍ការពារព្រំដែនកោះហងជូយ នៅទាំងសហការជំនួយប្រជាជនឱ្យទទួលបានបច្ចេកវិទ្យា ជាជំហានៗប្រើប្រាស់ផលប្រយោជន៍ឌីជីថលដើម្បីបម្រើដល់ជីវភាព និងសកម្មភាពផលិត។ តាមនោះ អង្គភាពបានឱ្យដឹងថា ទើបតែបានសហការជាមួយនគរបាលឃុំសុងដុក និងនគរបាលភូមិបៀងតី ចាត់តាំងយុទ្ធនាការចំណុចកំពូលដើម្បីជួយប្រជាជនចុះឈ្មោះបង្កើតគណនីអត្តសញ្ញាណអេឡិចត្រូនិក និងលើកកម្ពស់បំណិនអនុវត្តបច្ចេកវិទ្យាព័ត៌មាន។

កម្មាភិបាលយុទ្ធជនប៉ុស្តិ៍ការពារព្រំដែនកោះហងជួយ រួមជាមួយកម្លាំងនគរបាលណែនាំប្រជាជនរួមបញ្ចូលអត្តសញ្ញាណអេឡិចត្រូនិក។

ដោយសារហេដ្ឋារចនាសម្ព័ន្ធបណ្តាញនៅមានកម្រិត ការទទួលបានសេវាកម្មរដ្ឋតាមប្រព័ន្ធអនឡាញរបស់ប្រជាជននៅលើកោះជួបលំបាកជាច្រើន។ កម្មាភិបាល យុទ្ធជន និងកម្លាំងនគរបាលបានណែនាំដោយផ្ទាល់ ដល់មាមីងនូវរាល់សកម្មភាពចូលប្រើប្រាស់ បើកដំណើរការ និងប្រើប្រាស់កម្មវិធីកំណត់អត្តសញ្ញាណអេឡិចត្រូនិចជាតិ VNeID តាមរបៀប “បង្ហាញផ្ទាល់ដៃ”។ ក្នុងពេលជាមួយគ្នានេះ ក្រុមការងារក៏បានណែនាំនូវបំណិនជាមូលដ្ឋានដើម្បីមាមីងស្គាល់ ទប់ស្កាត់ការបោកប្រាស់តាមប្រព័ន្ធអនឡាញ និងបណ្តាជំហានប្រើប្រាស់ប្រអប់សំបុត្រអេឡិចត្រូនិកសម្រាប់រាយការណ៍បទល្មើស។ ក្នុងរយៈពេលមួយម៉ោង កម្លាំងសហការបានជួយការចុះឈ្មោះ និងណែនាំបំណិនឌីជីថលជូនដល់ប្រជាជនចំនួន ២៤ នាក់។ វរសេនីយ៍ទោ ង្វៀងវ៉ាំងវឿន បានឱ្យដឹងថា នាពេលខាងមុខ អង្គភាពនឹងបន្តសហការឧបត្ថម្ភគ្រួសារដែលនៅសល់ដើម្បីបើកដំណើរការ និងប្រើប្រាស់ VNeID ព្រមទាំងណែនាំមាមីងអនុវត្តបំណិនឌីជីថលដើម្បីបម្រើតម្រូវការប្រចាំថ្ងៃ។

ចាប់ពីទីលំនៅដែលមានសុវត្ថិភាព រហូតដល់ការណែនាំផ្ទាល់លើទូរសព្ទ រាល់ការងារទាំងអស់សុទ្ធតែចេញពីតម្រូវការជាក់ស្តែងរបស់ប្រជាជន។ ភាពជិតស្និទ្ធ និងភាពអស់ពីចិត្តពីថ្លើមនោះបានបន្តពូនជ្រំមនោសញ្ចេតនារវាងកងទ័ពនិងប្រជាជន បង្កទំនុកចិត្តបន្ថែមទៀតដើម្បីឱ្យមាមីងលំនឹងចិត្តច្បាមសមុទ្រ រួមជាមួយកម្លាំងការពារព្រំដែនការពារអធិបតេយ្យភាព រក្សាសន្តិសុខ និងសណ្តាប់ធ្នាប់នៅតំបន់កោះឆ្ងាយដាច់ស្រយាល៕

យ្វីអាញ - ថាច់ធី

ចែករំលែកអត្ថបទ

ពាក្យគន្លឹះ