វប្បធម៌-សិល្បៈ វប្បធម៌

29/08/2026 - 10:29

ពិធីបើកសប្តាហ៍ម្ហូបអាហារទីក្រុងកឹងធើ ឆ្នាំ២០២៦ និងប្រកាសដាក់ឱ្យប្រើប្រាស់ប្រព័ន្ធទេសចរណ៍ឆ្លាតវៃទីក្រុងកឹងធើ

(អ.ឡ) - យប់ថ្ងៃទី២៨ ខែសីហា សប្តាហ៍ម្ហូបអាហារទីក្រុងកឹងធើ ឆ្នាំ២០២៦ ក្រោមប្រធានបទ "ម្ហូបអាហារតៃដូ - ធាតុខ្លឹមពិសេសនៃតំបន់ព្រែកទន្លេ" បានបើកឆាកជាផ្លូវការនៅសួនច្បារទន្លេហូវ សង្កាត់កៃខេ។

កម្មវិធីសិល្បៈក្នុងពិធីបើកឆាក។

លោកត្រឹងក្វឹកវ៉ូវ អនុប្រធានក្រុមប្រឹក្សាប្រជាជនទីក្រុងកឹងធើ; លោកស្រី ង្វៀងធីង៉ុកឌេប អនុប្រធានគណៈកម្មាធិការប្រជាជនទីក្រុងកឹងធើ; ថ្នាក់ដឹកនាំមន្ទីរ ផ្នែកនានា សមាគមទេសចរណ៍ទីក្រុង ព្រមទាំងប្រជាជននិងភ្ញៀវទេសចរយ៉ាងច្រើនកុះករចូលរួម។

អ្នកតំណាងចូលរួមពិធីបើកឆាក។

ពិធីប្រព្រឹត្តទៅជាមួយកម្មវិធីសិល្បៈដ៏គួរឱ្យទាក់ទាញ ស្ងើចសរសើរអំពីសម្រស់ស្រស់ស្អាតនៃមាតុភូមិវៀតណាម ការអភិវឌ្ឍរបស់កឹងធើក្នុងចង្វាក់នៃជីវភាពទំនើប។

ក្នុងឱកាសនេះ មន្ទីរវប្បធម៌ កីឡានិងទេសចរណ៍ទីក្រុងបានប្រកាសជាផ្លូវការនិងដាក់ឱ្យប្រើប្រាស់ប្រព័ន្ធទេសចរណ៍ឆ្លាតវៃទីក្រុងកឹងធើ។

នេះជាជំហានវិវឌ្ឍន៍ដ៏សំខាន់មួយ បើកឱកាសម្រាប់ឆ្លងបទពិសោធន៍ថ្មីៗ បង្កភាពងាយស្រួលជាងសម្រាប់ភ្ញៀវទេសចរ ព្រមទាំងរួមចំណែកលើកកម្ពស់ប្រសិទ្ធភាពគ្រប់គ្រងនិងជំរុញការអភិវឌ្ឍប្រកបដោយចីរភាពរបស់វិស័យទេសចរណ៍ទីក្រុង។

អ្នកតំណាងអនុវត្តពិធីបើកឆាកសប្តាហ៍ម្ហូបអាហារនិងប្រកាសប្រព័ន្ធទេសចរណ៍ឆ្លាតវៃទីក្រុងកឹងធើ។

សប្តាហ៍ម្ហូបអាហារទីក្រុងកឹងធើ ឆ្នាំ២០២៦ ជាព្រឹត្តិការណ៍អាស្រ័យមជ្ឈមណ្ឌលជំរុញការវិនិយោគ-ពាណិជ្ជកម្មនិងទេសចរណ៍ទីក្រុងកឹងធើចាត់តាំង។ ព្រឹត្តិការណ៍សំដៅផ្សព្វផ្សាយ សាយភាយតម្លៃពិសេសនិងធាតុខ្លឹមនៃវប្បធម៌ម្ហូបអាហារកឹងធើ និងតំបន់វាលរាបទន្លេគឺវឡុង។ ទន្ទឹមនឹងនោះ ស្ងើចសរសើរចំពោះសិល្បករ ចុងភៅនិងអ្នកខិតខំរក្សា ច្នៃប្រតិដ្ឋនិងពង្រីកតម្លៃម្ហូបអាហារវៀតណាម; ជាជំហានៗពង្រីកតម្លៃវប្បធម៌ម្ហូបអាហារ កសាងម៉ាកយីហោ "ម្ហូបអាហារតៃដូ" ក្លាយជាផលិតផលទេសចរណ៍ពិសេសរបស់កឹងធើ។

អ្នកតំណាងទាំងឡាយទស្សនាល្វែងដាក់លក់ទំនិញផ្សព្វផ្សាយទេសចរណ៍
និងផលិតផល OCOP។

ព្រឹត្តិការណ៍ជាឱកាសឧទ្ទេសនាមអំពីសក្ដានុភាព ប្រៀបខ្លាំងអំពីទេសចរណ៍ វប្បធម៌ ជំរុញតម្រូវការទេសចរណ៍ ទាក់ទាញភ្ញៀវទេសចរក្នុងប្រទេសនិងភ្ញៀវអន្តរជាតិមកទស្សនា ឆ្លងបទពិសោធន៍និងបង្កើនការចំណាយទៅលើទេសចរណ៍។

ក្រៅពីនេះ បង្កើតការចងសម្ព័ន្ធរវាងផ្នែកទេសចរណ៍ កសិកម្ម ឧស្សាហកម្ម-ពាណិជ្ជកម្មនិងភូមិភាគនានា; បង្កលក្ខណៈឱ្យអាជីវកម្ម សហករណ៍ ផ្សព្វផ្សាយផលិតផល ពង្រីកទីផ្សារ ភ្ជាប់ពាណិជ្ជកម្មនិងអភិវឌ្ឍខ្សែសង្វាក់តម្លៃផលិតផលរបស់ភូមិភាគ។

លោកស្រី ង្វៀងធីកេវយៀង នាយកមជ្ឈមណ្ឌលជំរុញការវិនិយោគ-ពាណិជ្ជកម្មនិងទេសចរណ៍ទីក្រុងកឹងធើ ថ្លែងបើកពិធី។

ថ្លែងបើកពិធី លោកស្រី ង្វៀងធីកេវយៀង នាយកមជ្ឈមណ្ឌលជំរុញការវិនិយោគ-ពាណិជ្ជកម្មនិងទេសចរណ៍ទីក្រុង យល់ឃើញថា ម្ហូបអាហារមិនត្រឹមតែឆ្លើយតបតម្រូវការភ្លក់រសជាតិរបស់ប្រជាជននិងភ្ញៀវទេសចរប៉ុណ្ណោះទេ ថែមទាំងជាផលិតផលទេសចរណ៍ ម៉ាកយីហោវប្បធម៌និងជាស្ពានតភ្ជាប់ផ្សព្វផ្សាយរូបភាពរបស់កឹងធើដល់ភ្ញៀវទេសចរនៅក្នុងនិងក្រៅប្រទេស។

ដូច្នេះ សប្តាហ៍ម្ហូបអាហារទីក្រុងកឹងធើ ឆ្នាំ២០២៦ ត្រូវបានចាត់តាំងឡើងសំដៅឧទ្ទេសនាម ផ្សព្វផ្សាយតម្លៃពិសេសនៃវប្បធម៌ម្ហូបអាហារ រូបភាពស្រស់ស្អាតអំពីទេសចរណ៍ ក៏ដូចជាផលិតផលពិសេសនៃភូមិភាគនានារបស់កឹងធើ តំបន់វាលរាបទន្លេគឺវឡុង ឈានឆ្ពោះទៅកំណត់សម្គាល់ម៉ាកយីហោទេសចរណ៍ម្ហូបអាហារសម្រាប់កឹងធើ។

ថ្នាក់ដឹកនាំទីក្រុងជូនបាច់ផ្កាដល់ម្ចាស់ឧបត្ថម្ភដែលបានរួមដំណើរជាមួយពិធីនេះ។

ភ្ញៀវទេសចរយ៉ាងច្រើនកុះករថតរូបអនុស្សរណីយ៍នៅក្នុងព្រឹត្តិការណ៍។

មានជាង១០០ល្វែងទំនិញផ្សេងៗ៖ ម្ហូបអាហារតៃដូ ធាតុខ្លឹមពិសេសម្ហូបអាហារវៀតណាម ទំនិញរែកដើរលក់ ផ្សារជនបទ ឧទ្ទេសនាមនិងលក់ផលិតផល OCOP ផ្សព្វផ្សាយទេសចរណ៍ តាំងពិព័រណ៍រូបភាពស្រស់ស្អាតទេសចរណ៍កឹងធើ...ក៏បានបើកសកម្មភាពជាផ្លូវការចាប់ពីពេលនេះដល់ថ្ងៃទី២ ខែកញ្ញា បង្កបរិយាកាសកម្សាន្តរីករាយនិងឆ្លងបទពិសោធន៍គួរឱ្យទាក់ទាញជាច្រើនសម្រាប់ប្រជាជននិងភ្ញៀវទេសចរអំពីម្ហូបអាហារ។