មហាសាមគ្គីជនជាតិ គំរូក្នុងសហគមន៍

28/07/2026 - 08:45

គ្រូបង្រៀនអស់ពីចិត្តនឹងអាជីព ឈានមុខក្នុងការបរិច្ចាគឈាមស្ម័គ្រចិត្ត

រំលឹកដល់លោកគ្រូឡឹមចៀង គ្រូបង្រៀនសាលាបឋមសិក្សាទ្រុងប៊ិញ B ឃុំត្រឹងដេ ទីក្រុងកឹងធើ គឺសិស្សានុសិស្សអ្នកណាក៏គោរពរាប់អាន មិត្តរួមអាជីពកោតសរសើរពីព្រោះទឹកចិត្តមនុស្សធម៌។ លោកគ្រូ តែងឈានមុខក្នុងការចលនាបរិច្ចាគឈាមស្ម័គ្រចិត្ត ស្ងៀមស្ងាត់ផ្តល់នូវដំណក់ឈាមដ៏មានតម្លៃ ដើម្បីជួយសង្គ្រោះជីវិតអ្នកជំងឺ។

លោកគ្រូ ឡឹមចៀង តែងញញឹមនៅពេលរំលឹកដល់ការបរិច្ចាគឈាមស្ម័គ្រចិត្ត។

ចំពោះលោកគ្រូ ឡឹមចៀង អាជីពជាគ្រូបង្រៀន មិនត្រឹមតែផ្ទេរចំណេះដឹងប៉ុណ្ណោះទេ ថែមទាំងជាដំណើរបណ្តុះពន្លកនៃទឹកចិត្តមនុស្សធម៌ទៀតផង។ អាស្រ័យហេតុនោះ ទោះបីការបង្ហាត់បង្រៀនមមាញឹកយ៉ាងណាក៏ដោយ លោកគ្រូនៅតែចំណាយពេលចូលរួមក្នុងចលនាបរិច្ចាគឈាមស្ម័គ្រចិត្ត ដែលផ្នែកអប់រំនិងភូមិភាគបំផុសចលនា។ ចាប់តាំងពីឆ្នាំ ២០១២ មកទល់បច្ចុប្បន្ន លោកគ្រូបានចូលរួមបរិច្ចាគឈាមចំនួន ២៤ លើក។ ចំពោះលោកគ្រូ ការបរិច្ចាគឈាមគឺជាគុណធម៌ដ៏ឧត្តុង្គឧត្តម និងជាអំពើដែលមានអត្ថន័យធំធេង ដើម្បីជួយអ្នកជំងឺមាន ក្តីរីករាយ និងសុភមង្គលបន្ថែមទៀត។ លោកគ្រូចៀង ចែករំលែក៖ “ក្នុងមួយឯកតាឈាមដែលបានផ្តល់ជូន មិនត្រឹមតែជាគុណធម៌ដ៏ឧត្តុង្គឧត្តមប៉ុណ្ណោះទេ ថែមទាំងជាអំណោយកាត់ថ្លៃមិនបាន ជួយអ្នកជំងឺដែលកំពុងប្រឈមនឹងសេចក្តីស្លាប់ ឱ្យមានក្តីសង្ឃឹមបន្ថែមទៀតនៅពេលអនាគត។ ប្រការនោះ បានជំរុញឱ្យខ្ញុំមានភាពក្លាហាននិងបន្តរក្សាការបរិច្ចាគឈាមជាច្រើនឆ្នាំបន្តបន្ទាប់។ ហើយខ្ញុំនឹងថែរក្សាសុខភាពឱ្យបានល្អ ដើម្បីបន្តបរិច្ចាគឈាមជួយសង្គ្រោះជីវិតអ្នកជំងឺតទៅទៀត”។

មិនត្រឹមតែសកម្មបរិច្ចាគឈាមទេ ក្នុងការបង្ហាត់បង្រៀនលោកគ្រូចៀង រស់នៅស្និទ្ធស្នាល អស់ពីចិត្ត និងតែងផ្លាស់ប្តូរវិធីសាស្ត្របង្រៀនឱ្យសមស្របទៅនឹងសមត្ថភាពរបស់សិស្ស។ ចំពោះសិស្សខ្សោយ មានជីវភាពខ្វះខាត លោកគ្រូសុខចិត្តបង្រៀនបន្ថែម ដោយឥតគិតថ្លៃ លើកទឹកចិត្តដើម្បីប្អូនៗមានចំណេះដឹងគ្រប់គ្រាន់ ជឿជាក់លើខ្លួនឯងទៅកាន់សាលា។ លោកគ្រូចៀង រៀបរាប់៖ “សិស្សានុសិស្សក្នុងសាលា ភាគច្រើនជាជនជាតិខ្មែរ ម្ល៉ោះហើយត្រូវតែមានវិធីសាស្ត្រពន្យល់ សមស្របទើបជួយឱ្យប្អូនៗរៀនបានល្អ។ ក្រៅពីនេះ ក្នុងការបង្ហាត់បង្រៀន ខ្ញុំបានបញ្ចូលមេរៀនអំពីទឹកចិត្តមនុស្សធម៌ ស្មារតីចែករំលែកការ ទទួលខុសត្រូវចំពោះគ្រួសារនិងសហគមន៍។ តាមរយៈនោះ ជួយឱ្យប្អូនៗយល់ច្បាស់ក្រៅពីការរៀនអក្សរ យើងត្រូវមានចិត្តសប្បុរសនិងសេចក្តីស្រឡាញ់។ ទង្វើជាក់ស្តែងដូចជា ការបរិច្ចាគឈាមជួយសង្គ្រោះមនុស្ស ចែករំលែកជាមួយសហគមន៍ ក៏ជាមេរៀនដ៏រស់រវើកជួយឱ្យសិស្សយល់កាន់តែច្បាស់អំពីតម្លៃនៃទឹកចិត្តមនុស្សធម៌ និងសេចក្តីស្រឡាញ់”។

លោកគ្រូ ហ្វិញឌឹក ចាងហ្វាងសាលាបឋមសិក្សា ទ្រុងប៊ិញ B ឱ្យដឹង៖ “លោកគ្រូឡឹមចៀង ជាគំរូឆ្នើមអំពីការរស់នៅសាមញ្ញ ស្និទ្ធស្នាល មានស្មារតីទទួលខុសត្រូវក្នុងការបង្ហាត់បង្រៀន និងជាគំរូឈានមុខក្នុងចលនាបរិច្ចាគឈាមរបស់សាលា។ តាមរយៈការចែករំលែកដោយស្មោះរបស់លោកគ្រូចៀង ក្រោយពីបរិច្ចាគឈាមម្តងៗ បានផ្តល់ជាកម្លាំងចលករដល់គ្រូបង្រៀនក្នុងសាលាត្រៀមលក្ខណៈជាស្រេចចូលរួមបរិច្ចាគឈាម ដើម្បីរួមដៃគ្នាជួយសង្គ្រោះមនុស្ស។ ដោយសារលោកគ្រូចៀង បានវិភាគអំពីអត្ថប្រយោជន៍ និងការបរិច្ចាគឈាមមិនប៉ះពាល់ដល់សុខភាព ថែម ទាំងជួយឱ្យរាងកាយបង្កើតឈាមថ្មីបានល្អ និងធ្វើឱ្យរាងកាយមាំមួន ម្ល៉ោះហើយខ្ញុំមានភាពក្លាហានចូលរួមបរិច្ចាគឈាមបានចំនួន ៣ លើក”។

រូបភាពគ្រូបង្រៀនដែលអស់ពីចិត្តក្នុងការបង្រៀន អស់ពីចិត្តដើម្បីសិស្ស និងខ្ជាប់ខ្ជួនក្នុងការបរិច្ចាគឈាម បានបន្សល់ទុកនូវមនោសញ្ចេតនាល្អប្រសើរជាច្រើន ក្នុងសមូហភាពគ្រូបង្រៀននៃសាលាបឋមសិក្សាទ្រុងប៊ិញ B។ ដំណក់ឈាមដែលលោកគ្រូចៀង បានបរិច្ចាគ មិនត្រឹមតែរួមចំណែកបន្តអាយុជីវិតដល់អ្នកជំងឺប៉ុណ្ណោះទេ ថែមទាំងជាមេរៀនអំពីទឹកចិត្តមនុស្សធម៌ បន្តសាយភាយក្នុងសមូហភាពរបស់សាលា និងសិស្សានុសិស្សជាច្រើនជំនាន់ទៀតផង៕

លីធាន- លីសៀ

ចែករំលែកអត្ថបទ

ពាក្យគន្លឹះ