សន្តិសុខ - ការពារប្រទេស ការពារប្រទេស

11/06/2026 - 22:46

ប៉ុស្តិ៍ការពារព្រំដែន វិញចូវ ផ្សព្វផ្សាយគ្រប់ជ្រុងជ្រោយលើបណ្តាវិស័យការងារការពារព្រំដែន

ព្រឹកថ្ងៃទី ១១ ខែមិថុនា ប៉ុស្តិ៍ការពារព្រំដែនវិញចូវ ចំណុះបញ្ជាការដ្ឋានកងទ័ពការពារព្រំដែនទីក្រុងកឹងធើ បានចាត់តាំងសន្និបាតបូកសរុបលទ្ធផលការងារការពារព្រំដែន និងការកសាងកម្លាំងកងទ័ពការពារព្រំដែនរយៈពេល ៦ ខែដើមឆ្នាំ ២០២៦។

ក្នុងរយៈពេល ៦ ខែដើមឆ្នាំ ២០២៦ នេះ អង្គភាពបានជ្រួតជ្រាប និងផ្សព្វផ្សាយយ៉ាងម៉ឺងម៉ាត់នូវបណ្តាសារាចរ សេចក្តីសម្រេចចិត្ត និងផែនការការងារការពារព្រំដែន។ អង្គភាពបានរក្សាប្រកបដោយប្រសិទ្ធភាពនូវភារកិច្ចគ្រប់គ្រង និងការពារអធិបតេយ្យភាព សន្តិសុខតំបន់ព្រំដែនសមុទ្រ ដែលបានប្រគល់ភារកិច្ចឱ្យគ្រប់គ្រង។ ទន្ទឹមនឹងនោះ បានម្ចាស់ការក្តាប់ជាប់យ៉ាងរឹងមាំនូវសភាពការណ៍ក្នុងភូមិសាស្ត្រ សភាពការណ៍នៅលើសមុទ្រ ដើម្បីផ្តល់យោបល់ទាន់ពេលក្នុងការដោះស្រាយល្អរាល់ករណីនានា ដែលពាក់ព័ន្ធនឹងសន្តិសុខនយោបាយ សណ្តាប់ធ្នាប់និងសុវត្ថិភាពសង្គម ដោយមិនទុកឱ្យមានភាពអសកម្ម ឬភ្ញាក់ផ្អើលក្នុងរាល់កាលៈទេសៈឡើយ។

លោកវរសេនីយ៍ឯកហាហ្វីទ្រឿង ស្នងការរងនយោបាយនៃកងទ័ពការពារព្រំដែនទី ក្រុងកឹងធើថ្លែងការណ៍ចង្អុលការ។

អង្គភាពបានរក្សាយ៉ាងម៉ឺងម៉ាត់នូវរបបប្រចាំការត្រៀមលក្ខណៈប្រយុទ្ធ បំពេញបន្ថែម និងកែសម្រួលផែនការជាច្រើនសម្រាប់ការពារភូមិសាស្ត្រ ធានាសុវត្ថិភាពក្នុងឱកាសបុណ្យទាន ទិវានិទាឃរដូវ និងព្រឹត្តិការណ៍នយោបាយសំខាន់ៗរបស់ប្រទេសជាតិ និងភូមិភាគ។ ការងារសហការអនុវត្តអនុក្រឹត្យលេខ០៣ របស់រដ្ឋាភិបាលរវាងកងកម្លាំងនានា ត្រូវបានដាក់ឱ្យដំណើរការយ៉ាងជិតស្និទ្ធ រួមចំណែករក្សាបាននូវស្ថិរភាពសន្តិសុខនយោបាយ និងសណ្តាប់ធ្នាប់សុវត្ថិភាពសង្គម នៅតំបន់ព្រំដែនសមុទ្រ។

ក្នុងការងារប្រប្រឆាំងនឹងបទល្មើស អង្គភាពបានបង្ក្រាបប្រកបដោយប្រសិទ្ធភាពនូវផែនការជំនាញចំនួន ០១ ចាប់ខ្លួនបាន ០១ ករណី/១មុខសញ្ញា ពីបទរក្សាទុកដោយខុសច្បាប់នូវគ្រឿងញៀន ដកហូតបានម៉េតំហ្វេតាមីន ១,៤២៣២ ក្រាម និងបានចាត់វិធានការលើករណីល្បែងស៊ីសងចំនួន ០២ ករណី ក្នុងទម្រង់កត់កន្ទុយលេខ រួមចំណែកធ្វើឱ្យភូមិដ្ឋានមានភាពស្អាតស្អំ។ ជាមួយគ្នានេះដែរ អង្គភាពបានចាត់តាំងការល្បាតឯករាជ្យ និងសហការចំនួន៩២លើក ដោយមានចម្ងាយផ្លូវល្បាតជិត ២.០០០ គីឡូម៉ែត្រ ធានាបាននូវសុវត្ថិភាពដាច់ខាតទាំងមនុស្ស និងអាវុធយុទ្ធភណ្ឌបំពាក់។

សកម្មភាពការងារបក្ស ការងារនយោបាយ និងសុខុមាលភាពសង្គម នៅតែបន្តអនុវត្តយ៉ាងមានប្រសិទ្ធភាព ដែលលេចធ្លោជាងគេគឺកម្មវិធី "បុណ្យចូលឆ្នាំថ្មីនៅតាមព្រំដែន-ផ្ដល់ភាពកក់ក្ដៅដល់ប្រជាជននៅក្នុងភូមិ" កម្មវិធី "ជំនួយប្អូនៗទៅសាលារៀន-កូនចិញ្ចឹមរបស់ប៉ុស្តិ៍ការពារព្រំដែន" និងសកម្មភាពថែទាំគ្រួសារគោលនយោបាយ គ្រួសារក្រីក្រ និងសិស្សានុសិស្សដែលមានជីវភាពលំបាក។ តាមរយៈកម្មវិធីទាំងនេះ ជូនអំណោយជាង ៥០០ ចំណែក ជូនដល់គ្រួសារជនជាតិភាគតិចក្រីក្រ និងអ្នកវ័យចាស់គ្មានទីពឹង ព្រមទាំងបានប្រគល់អាហារូបករណ៍ជាង៥០ចំណែកជូនដល់សិស្សក្រីក្ររៀនពូកែ ដោយមានថវិកាសរុបជាង ១៨៤ លានដុង។ ទន្ទឹមនឹងនោះ អង្គភាពក៏បានជំរុញការឃោសនាផ្សព្វផ្សាយអំពីការបង្ការនិងទប់ស្កាត់គ្រឿងញៀនក្នុងសាលារៀន និងប្រឆាំងនឹងការនេសាទខុសច្បាប់ (IUU) រួមចំណែកលើកកម្ពស់ការយល់ដឹងអំពីច្បាប់ដល់ប្រជាជននៅតំបន់ព្រំដែនសមុទ្រ។

ថ្លែងការណ៍ចង្អុលការក្នុងសន្និបាត លោកវរសេនីយ៍ឯក ហាហ្វី ទ្រឿង ស្នងការរងនយោបាយនៃកងទ័ពការពារព្រំដែនទី ក្រុងកឹងធើ បានស្ងើចសរសើរចំពោះលទ្ធផលទាំងឡាយដែលប៉ុស្តិ៍ការពារព្រំដែនវិញចូវសម្រេចបាន។ ទន្ទឹមនឹងនោះ លោកបានតម្រូវឱ្យអង្គភាពនាពេលខាងមុខ បន្តម្ចាស់ការក្តាប់ជាប់ស្ថានការណ៍ភូមិសាស្ត្រ រក្សាឱ្យបានម៉ឺងម៉ាត់នូវរបបប្រចាំការត្រៀមលក្ខណៈប្រយុទ្ធ; សហការជិតស្និទ្ធជាមួយកម្លាំងនានា ដើម្បីប្រយុទ្ធប្រឆាំងប្រកបដោយប្រសិទ្ធភាពជាមួយប្រភេទបទល្មើសគ្រប់ប្រភេទ រក្សាឱ្យបានរឹងមាំនូវសន្តិសុខនយោបាយ សណ្តាប់ ធ្នាប់ និងសុវត្ថិភាពសង្គមនៅតំបន់ព្រំដែនសមុទ្រ។ រួមជាមួយគ្នានោះ ប្រមូលផ្តុំលើការលើកកម្ពស់គុណភាពនៃការហ្វឹកហ្វឺន កសាងរបៀបរៀបរយ គ្រប់គ្រងវិន័យ ជម្រុញការងារឃោសនា និងចលនាប្រជាជនឱ្យចូលរួមការពារអធិបតេយ្យភាព សន្តិសុខព្រំដែនសមុទ្រ រួមចំណែកកសាងខឿនការពារព្រំដែនប្រជា ជនទាំងមូលឱ្យបានរឹងមាំ៕

យ្វីអាញ់-ដាលីន

ចែករំលែកអត្ថបទ

ពាក្យគន្លឹះ