សន្តិសុខ - ការពារប្រទេស ការពារប្រទេស

11/06/2026 - 06:22

រក្សាសន្តិសុខសណ្តាប់ធ្នាប់នៅតំបន់ជនបទហូដាក់គៀង

រយៈពេលកន្លង ឃុំហូដាក់គៀង ទីក្រុងកឹងធើ បានអនុវត្តទម្រង់ “ភ្លើងបំភ្លឺផ្លូវជនបទ” ដែលបាននិងកំពុងពង្រីកតួនាទី និងប្រសិទ្ធភាពវិជ្ជមាន ដើម្បីបង្កលក្ខណៈងាយស្រួលសម្រាប់ប្រជាជនធ្វើដំណើរនៅពេលយប់ផង រួមចំណែកបង្ការទប់ស្កាត់ និងប្រឆាំងបទល្មើសគ្រប់ប្រភេទនៅតំបន់ជនបទផង។

ទម្រង់ ”ភ្លើងបំភ្លឺផ្លូវជនបទ” នៅឃុំហូដាក់គៀង ទីក្រុងកឹងធើ។

ផ្តើមពីតថភាពខាងលើ នៅដើមឆ្នាំ២០២៥ រដ្ឋអំណាចភូមិភាគ រួមជាមួយនគរបាលឃុំហូដាក់គៀង បានឯកភាពដាក់ចេញនូវការកសាង ទម្រង់ “ភ្លើងបំភ្លឺផ្លូវជនបទ” ដើម្បីបង្កលក្ខណៈងាយស្រួលសម្រាប់ប្រជាជនក្នុងការធ្វើដំណើរពេលយប់ផងនិងរួមចំណែកបង្ការ និងបង្ក្រាបបទល្មើសគ្រប់ប្រភេទផង។ តាមទិសស្លោក “រដ្ឋនិងប្រជាជនរួមគ្នាធ្វើ” ភូមិភាគបានចលនាបណ្តាអង្គការនិងសប្បុរសជនរួមវិភាគទានបានចំនួន៧០លានដុង ដើម្បីដាក់ប្រព័ន្ធភ្លើងបំភ្លឺតាមបណ្តោយផ្លូវគិញគូ ភូមិដាក់ថើយ មានប្រវែងសរុបជាង ២.០០០ ម៉ែត្រ និងភូមិដាក់ថាំង មានប្រវែងផ្លូវទាំង ៣ សរុបជាង ៤.០០០ ម៉ែត្រ ដោយថវិកាសម្រាប់ដំឡើងប្រព័ន្ធភ្លើងបំភ្លឺនេះជាង១០០លានដុង។ ក្នុងឆ្នាំ២០២៦ ភូមិដាក់ថាំងបន្តកៀរគរប្រភពធនធានក្នុងសង្គម ដើម្បីដំឡើងប្រព័ន្ធភ្លើងបំភ្លឺដោយថាមពលព្រះអាទិត្យ តាមដងផ្លូវគមនាគមន៍ជនបទប្រវែង២.០០០ ម៉ែត្រ ដោយគម្រោងថវិកាជាង៣០លានដុង។ តាមរយៈការជំរុញដំឡើងភ្លើងបំភ្លឺផ្លូវជនបទនៅលើភូមិឋានឃុំហូដាក់គៀង បានជួយធានាសុវត្ថិភាពចរាចរណ៍ បន្ថយគ្រោះថ្នាក់ និងបន្ថយបទល្មើសចោរកម្ម ក៏ដូចជាអំពើអបាយមុខសង្គមនានា ដោយសារមានភ្លើងបំភ្លឺផ្លូវ ព្រមទាំងលើកកម្ពស់គុណភាពជីវភាពនិងជំរុញលក្ខឋានកសាងជនបទថ្មី។ បងស្រីឡេធីង៉ុកទីម ប្រធានគណៈប្រជាជនភូមិដាក់ថើយ បានឱ្យដឹង ចាប់តាំងពីមានប្រព័ន្ធភ្លើងអុជបំភ្លឺ ការធ្វើដំណើរនៅពេលយប់មានភាពងាយស្រួលជាងមុន ករណីគ្រោះថ្នាក់ចរាចរណ៍បានថយចុះ ចំណងសាមគ្គីភាពភូមិផងរបងជាមួយកាន់តែមានភាពជិតស្និទ្ធ។

វាយតម្លៃពីប្រសិទ្ធភាពនៃទម្រង់នេះ វរសេនីយ៍ទោយ៉ីបឃឿងចូវ អនុប្រធាននគរបាលឃុំហូដាក់គៀង បានឱ្យដឹង ក្រោយរយៈពេលមួយឆ្នាំដំណើរការទម្រង់ “ភ្លើងបំភ្លឺផ្លូវជនបទ” បានបង្ហាញពីប្រសិទ្ធភាពយ៉ាងច្បាស់ក្នុងកិច្ចការធានាសន្តិសុខ សណ្តាប់ធ្នាប់ និងសុវត្ថិភាពចរាចរណ៍នៅតំបន់ជនបទ។ នៅតាមមណ្ឌលដែលបានដំឡើងប្រព័ន្ធភ្លើងអុជបំភ្លឺ ស្ថានភាពលួចឆក់ទ្រព្យសម្បត្តិលែងកើតមាន និងអំពើអបាយមុខផ្សេងៗបានទប់ស្កាត់ ធ្វើឱ្យប្រជាជនស្ងប់អារម្មណ៍ក្នុងការពលកម្មផលិត។ នៅពេលខាងមុខ កងកម្លាំងនគរបាលឃុំនឹងបន្តពង្រីកនូវលទ្ធផលដែលសម្រេចបានជំរុញកិច្ចការឃោសនា និងចលនាប្រជាជនឱ្យចូលរួមចលនាទូទាំងប្រជាជនការពារសន្តិសុខមាតុភូមិ ពង្រឹងវិធានការជំនាញ ម្ចាស់ការក្នុងការបង្ការនិងប្រឆាំងប្រកបដោយប្រសិទ្ធភាពប្រឆាំងនឹងបទល្មើសគ្រប់ប្រភេទ ដើម្បីរួមចំណែកកសាងភូមិភាគឱ្យមានសុវត្ថិភាពនិងអភិវឌ្ឍន៍ដោយចីរភាព។

ទម្រង់ “ភ្លើងបំភ្លឺផ្លូវជនបទ” បានធ្វើឱ្យទិដ្ឋភាពជនបទផ្លាស់ថ្មី។ គ្រប់អំពូលភ្លើងដែលបានដំឡើង តាមបណ្តោយដងផ្លូវ មិនត្រឹមតែជួយអុជបំភ្លឺក្នុងរាត្រីកាលប៉ុណ្ណោះទេ ថែមទាំងបាននាំមកនូវក្តីរីករាយ ក្តីទំនុកចិត្តនិងសុវត្ថិភាពសម្រាប់ប្រជាជនគ្រប់គ្នា។ កុមារដែលត្រឡប់មកពីរៀនបន្ថែមពេលយប់លែងមានការភ័យខ្លាចទៀតហើយ ប្រជាជនមានភាពងាយស្រួលជាងក្នុងការធ្វើដំណើរ ការផលិតនិងការប្រាស្រ័យទាក់ទងគ្នាក្នុងជីវភាពរស់នៅ ហើយថែមទាំងរួមចំណែកក្នុងការបង្ការនិងប្រឆាំងនឹងបទល្មើសគ្រប់ប្រភេទ ដូចជាការឆក់ប្លន់ និងចោរកម្ម ធានាបាននូវភាពសុខសាន្តសម្រាប់តំបន់ជនបទហូដាក់គៀង៕

ដាលីន

ចែករំលែកអត្ថបទ

ពាក្យគន្លឹះ