មហាសាមគ្គីជនជាតិ គំរូក្នុងសហគមន៍

04/11/2025 - 06:10

សិល្បករស្នេហាសិល្បៈខ្មែរ

អាស្រ័យមានទេពកោសល្យនិងជក់ចិត្តដិតអារម្មណ៍ជាមួយនឹងសិល្បៈយូកេរតាំងពីកុមារ ឆ្នាំ១៩៩៨ ថាច់ចើនសុផារ៉ា បានទទួលចូលក្រុមសិល្បៈរស្មីប្រទីប ព្រមទាំងបានការណែនាំដោយអស់ពីចិត្តពីសំណាក់សិល្បកររៀមច្បង មួយអន្លើដោយការខិតខំយ៉ាងពេញទំហឹងរបស់ខ្លួន។ បងថាច់ ចើនសុផារ៉ា ក៏មានឈ្មោះបោះសំឡេងក្នុងមជ្ឈដ្ឋានសិល្បៈជំនាញ មិនត្រឹមតែមានទឹកដមសំឡេងពីរោះប៉ុណ្ណោះទេ ថែមទាំងជាសិល្បករមួយរូបមានទេពកោសល្យសម្បូរបែបទៀតផង។

សិល្បករ ថាច់ ចើនសុផារ៉ា កំពុងប្រគំឧបករណ៍ភ្លេងខ្មែរ "ឃឹម"។

សិល្បករ ថាច់ចើនសុផារ៉ា កើតឆ្នាំ១៩៨០ ក្នុងគ្រួសារកសិករ នៅភូមិសំពោងសក់ធំ ឃុំង៉ូវឡាក ខេត្តវិញឡុង យុវវ័យរបស់បងបានប្រឡូកក្នុងវិស័យសិល្បៈពេលមានកម្មវិធីបុណ្យផ្សេងៗ។ ការជក់ចិត្តដិតអារម្មណ៍ទាំងនេះ បានផ្តល់ជាកម្លាំងចិត្តដើម្បីគាត់មានគោលជំហររឹងមាំ ចូលប្រឡូកក្នុងវិស័យសិល្បៈ។ សម្រាប់គាត់សិល្បៈ មិនត្រឹមតែជាអត្តសញ្ញាណវប្បធម៌ប៉ុណ្ណោះទេ ថែមទាំងអាជីពរបស់គាត់ទៀតផង។ អស់រយៈពេលជាង២០ឆ្នាំ គាត់បានក្លាយជាសិល្បករម្នាក់ក្នុងចំណោមសិល្បករ-ការិនី ដែលមានឈ្មោះបោះសំឡេងក្នុងក្រុមសិល្បៈរស្មីប្រទីប។ បងសុផារ៉ា សំណេះសំណាល៖ “ពេលឈរលើឆាកម្តងៗ ខ្ញុំមានអារម្មណ៍ថាមិនត្រឹមតែសម្តែងសិល្បៈប៉ុណ្ណោះទេ ថែមទាំងបានរួមចំណែកក្នុងការអភិរក្សវប្បធម៌ សិល្បៈរបស់ជនរួមជាតិខ្មែរ។ សម្រាប់ខ្ញុំ សំណាងបំផុតគឺបានរៀនសូត្របទពិសោធន៍ពីសិល្បករ-ការិនីរៀមច្បង។ ហេតុនេះ ខ្ញុំចាត់ទុកការបង្រៀនសិល្បៈដល់យុវវ័យជំនាន់ក្រោយគឺភារកិច្ចដ៏សំខាន់ ឱ្យតែយុវវ័យជំនាន់ក្រោយចេះដេញចាប៉ីដងវែង ចេះច្រៀងចម្រៀងប្រជាប្រិយ ឬសម្តែងឈុត សិល្បៈយូកេរ ដូច្នេះ វប្បធម៌សិល្បៈរបស់ជនរួមជាតិខ្មែរនឹងបន្តរក្សាបានយូរអង្វែង”។

សិល្បករ ថាច់ចើនសុផារ៉ាកំពុងប្រគំឧបករណ៍ភ្លេងខ្មែរ "ទ្រសោ"។

លោក ត្រឹងវុាំងដាយ ប្រធានការិយាល័យរដ្ឋបាលទូទៅនៃក្រុមសិល្បៈរស្មីប្រទីប បញ្ជាក់៖ “បងសុផារ៉ា ជាសិល្បករម្នាក់ក្នុងចំណោមសិល្បករ មានទេពកោសល្យសម្បូរបែប ទទួលបានការគាំទ្រនិងសរសើរមិនដាច់ពីមាត់ពីសំណាក់ទស្សនិកជន។ គាត់មិនត្រឹមតែអ្នកចម្រៀងនិងជាតួសម្តែងល្ខោនយូកេរប៉ុណ្ណោះទេ ថែមទាំងមានទេពកោសល្យខាងចម្រៀងចាប៉ីដងវែង ចេះដេញតាខេ និងឧបករណ៍ភ្លេងផ្សេងៗជាច្រើនទៀត។ នោះគឺជាការរួមចំណែកដ៏មានអត្ថន័យក្នុងការអភិរក្សនិងពង្រីកតម្លៃវប្បធម៌ជនជាតិ។ បងសុផារ៉ា ទទួលបានរង្វាន់ជាច្រើន មានដូច៖ រង្វាន់លេខ ២ ក្នុងសមោសរចម្រៀងប្រជាប្រិយខ្មែរឆ្នាំ២០០២ រង្វាន់ A ចម្រៀងទោលនៅទិវាបុណ្យវប្បធម៌-កីឡាជនរួមជាតិខ្មែរណាមបូ ឆ្នាំ២០០៥ មេដាយប្រាក់ក្នុងសមោសរសិល្បៈច្រៀងរាំជំនាញទូទាំងប្រទេស ឆ្នាំ២០០៥ ។ល។ ព្រមទាំងទទួលបានប័ណ្ណសរសើរនិងលិខិតសរសើរជាច្រើនរបស់ខេត្ត និងផ្នែកនានា”។

មិនត្រឹមតែជាតួសម្តែងសិល្បៈល្ខោនយូកេរប៉ុណ្ណោះទេ ចើនសុផារ៉ា ក៏បាន “ជួយបង្ហាត់ភ្លេង” ដល់និស្សិតនិងយុវជនដែលស្រឡាញ់ចូលចិត្តឧបករណ៍ភ្លេងប្រពៃណីទៀតផង។ ជិត១០ឆ្នាំមកនេះ គាត់ជួយបង្រៀនវិញ្ញាសាភ្លេងប្រពៃណីខ្មែរនៅសាកលវិទ្យាល័យត្រាវិញ។ ជាពិសេស គាត់នៅទាំងបើកថ្នាក់បង្រៀនឧបករណ៍ភ្លេងខ្មែរដោយឥតគិតថ្លៃនៅសង្កាត់ត្រាវិញ ដោយមានយុវវ័យជាច្រើនមកសិក្សាហាត់សម ផ្តើមពីនោះ ធ្វើឱ្យពួកគេរឹតតែមានចំណូលចិត្តស្រឡាញ់ឧបករណ៍ភ្លេងខ្មែរ៕

អត្ថបទនិងរូបថត៖ សើុងម៉ាល័យ-មុនី

ចែករំលែកអត្ថបទ

ពាក្យគន្លឹះ