កំសាន្ត រឿងពីនេះពីនោះ

08/10/2025 - 19:20

តិចនិចចិញ្ច្រាំសាច់ដោយមិនចំណាយពេលច្រើន

មានពេលខ្លះការចិញ្រ្ចាំសាច់ត្រូវចំណាយពេលច្រើន ខ្ញុំនឹងបង្ហាញលោកអ្នកនូវតិចនិចម៉្យាងដែលឆាប់ផងនិងមានប្រយោជន៍ នៅពេលចម្អិនម្ហូបអាហារ។

រូបជាឧទាហរណ៍។

ពេលច្នៃម្ហូបអាហារច្រើនមុខ មានពេលខ្លះយើងត្រូវការចិញ្ច្រាំសាច់។ ថ្វីដ្បិតដូច្នេះក្តី ការចិញ្រ្ចាំសាច់ត្រូវចំណាយពេលនិងកម្លាំងច្រើន។ មានអ្នកខ្លះជ្រើសទិញសាច់កិនស្រាប់នៅផ្សារ ពីព្រោះខ្លាចរំខាន។ ប៉ុន្តែធាតុពិតទៅ ឱ្យតែយើងក្តាប់ច្បាស់ពីបច្ចេកទេសចិញ្ច្រាំសាច់ឱ្យបានត្រឹមត្រូវនោះ យើងមិនត្រឹមតែអាចលើកកម្ពស់ប្រសិទ្ធភាពគួរឱ្យកត់សម្គាល់ប៉ុណ្ណោះទេ ថែមទាំងធ្វើឱ្យសាច់ចិញ្ច្រាំកាន់តែទន់ និងស្មើជាងទៀតផង។ ថ្ងៃនេះខ្ញុំនឹងបង្ហាញលោកអ្នកពីតិចនិចងាយៗ ជួយឱ្យលោកអ្នកងាយស្រួលក្នុងការចិញ្ច្រាំសាច់ត្រឹមតែ១នាទី។

ដំបូងលោកអ្នកត្រូវជ្រើសរើសសាច់ឱ្យបានសមស្របដើម្បីចិញ្ច្រាំ។ និយាយរួមទៅ អត្រាសាច់សុទ្ធនិងសាច់លាយខ្លាញ់ សមស្របបំផុត គឺអត្រា ៧:៣ ឬ ៨:២ ដើម្បីសាច់ចិញ្ច្រាំមិនស្ងួតពេក ឬខ្លាញ់ពេក។ បន្ទាប់មកការហាន់សាច់គឺជាជំហានសំខាន់។

ដាក់សាច់លើក្តារជ្រញ់ និងយកកាំបិតហាន់បណ្តោយសាច់ ប្រយ័ត្នកុំហាន់ឱ្យដាច់ចេញពីគ្នា។ ជំហាននេះគឺដើម្បីកាត់សរសៃសាច់ តែមិនធ្វើឱ្យបាត់រសជាតិសាច់។ ដំណាក់កាលនេះ ត្រូវអនុវត្តវិធីហាន់របស់លោកអ្នកឱ្យសមស្រប។ ប្រការសំខាន់គឺរក្សាសាច់មិនឱ្យដាច់ជាបំណែក។

បនា្ទប់មកត្រឡប់បំណែកសាច់ រួចហាន់ទទឹងវិញ ហើយទុកចន្លោះតូចមួយរវាងបំណែកសាច់។ បន្ទាប់ពីហាន់ពីរដងតាមរបៀបនេះ សរសៃសាច់បានដាច់ទាំងស្រុង ក្រោយមកហាន់បញ្ឆៀងជាបំណែកតូចៗ។ ជំហានចុងក្រោយគឺយកកាំបិតហាន់ស្រាលៗជាចំណិតតូចៗ ដើម្បីឱ្យសាច់ទន់និងស្មើជាង។

ក្នុងដំណើរការនេះ លោកអ្នកអាចបន្ថែមគ្រឿងទេសមួយចំនួនដូចជា អំបិល ម្រេច។ល។ ទៅតាមចំណង់ចំណូលចិត្ត ដើម្បីធ្វើឱ្យសាច់កាន់តែមានរសជាតិឆ្ងាញ់។ ការហាន់សាច់តាមវិធីនេះ គឺល្អិតល្អ។ ប្រភេទសាច់ហាន់បែបនេះនឹងមានរសជាតិឆ្ងាញ់ណាស់ បើធ្វើនំប៉ាវឬឆាក៏បានដែរ៕

យោង Thuong Hieu va Phap Luat-ប្រែសម្រួល៖ វិមាន

ចែករំលែកអត្ថបទ

ពាក្យគន្លឹះ